Энэтхэг, Химачал Прадеш, Дарамсала, Тэгчин Чойлин хийд – Дээрхийн гэгээн Далай лам Нихон Хиданкёо байгууллагын тэргүүн ноён Тэрүми Танака, ноён Шигемицү Танака, ноён Тошиюүки Мимаки болон нийт хамт олонд Нобелийн Энх тайвны шагналт байгууллага болсонд баяр хүргэн захидал илгээлээ.
Тэрбээр захидалдаа "Япон улсад айлчлахдаа танай байгууллагын зарим хүнтэй уулзах завшаан тохиож байлаа. Танай хийж буй ажилд би гүнээ талархаж байна. Цөмийн зэвсгээс ангид ертөнцийг бүтээхийн төлөөх хүчин чармайлт болон үүнийг дахин хэзээ ч ашиглах ёсгүй гэдгийг гэрчийн мэдүүлгээр нотолсны төлөө Норвегийн Нобелийн хорооноос Нихон Хиданкёо байгууллагад 2024 оны Нобелийн Энх тайвны шагналыг олгосон шийдвэрийг би бахархан дэмжиж байна.
Хирошима, Нагасаки хотод би өөрөө айлчилж байсан тул цөмийн бөмбөгдөлтөд өртсөн хохирогчид, ялангуяа амьд үлдсэн хүмүүсийн туулсан асар их шаналлыг бага ч болов мэдэрсэн билээ. Цөмийн дэлбэрэлтийн аймшигт үйл явдлыг биеэр туулж, амьд гарсан тэдгээр хүмүүс энэхүү байгууллагыг үүсгэн байгуулснаараа эл аюулт зэвсгийг устгахыг шаардан, дуу хоолойгоо илэрхийлж байгааг би ойлгож байна.
"Цөмийн зэвсгийг бүхэлд нь устгах, дэлхий даяар зэвсэг хураахын төлөө тууштай тэмцэгчийн хувьд би энэхүү шагнал НҮБ, түүний гишүүн орнуудад цөмийн зэвсгийн аюулыг арилгахын төлөө чин үнэнээр хамтран зүтгэх, цөмийн зэвсгийг бүрэн устгах үйлсэд өөрсдийгөө зориулах урам зориг өгнө гэдэгт гүнээ итгэж байна” хэмээн дурджээ.
Дээрхийн гэгээн Далай лам захидлынхаа төгсгөлд, "Өнөөгийн дэлхийн олон асуудал, бэрхшээлийг хүн төрөлхтөн бид өөрсдөө бүтээсэн билээ. Хүн бүр аз жаргалыг хүсэж, зовлонгоос зугтах хүсэлтэй байдгийн адил уур хилэн, үзэн ядах зэрэг хөнөөлт сэтгэл хөдлөлүүдийг даван туулахын төлөө хичээж, хүн төрөлхтний нийтлэг мөн чанарыг хүлээн зөвшөөрөх учиртай. Дан ганц залбирлаар энх тайванд хүрэхгүй тул бодит үйл хийх хэрэгтэйг ойлгох нь чухал юм" хэмээн дүгнэжээ.
Орчуулсан Б.Ганчимэг
