Энэтхэг, Химачал Прадеш, Дарамсала, Тэгчин Чойлин хийд – Дээрхийн гэгээн Далай лам Японы шинээр сонгогдсон Ерөнхий сайд Шигэрү Ишибад баяр хүргэсэн захидалдаа, "Өнгөрсөн хугацаанд надад Япон оронд айлчлах сайхан завшаан хэдэнтээ тохиосон билээ. Миний санаа тавьж ажилладаг бусдыг энэрэх зэрэг хүмүүнлэг суурь үнэт зүйлсийг төлөвшүүлэх, шашин хоорондын эв нэгдлийг бэхжүүлэх, цөмийн зэвсэггүй, энх тайван ертөнцийг бий болгох зэрэг чиглэлд танай улсын нийгмийн бүх давхаргын хүмүүс идэвх зүтгэл гаргаж, урам зоригтой ажиллаж буйг би гүнээ үнэлж явдаг.
Япончууд эх орноо дэлхийн хамгийн орчин үеийн үндэстнүүдийн нэг болгохын төлөө хэрхэн ажиллаж ирснийг би ихэд сайшаан биширдэг. Япон улс мөн дэлхий дахинд энх тайвныг тогтоох үйл хэргийг ямагт түүчээлсээр ирсэн. Танай улсын оюун санааны уламжлалууд ч мөн энх тайвныг сургаж, эрхэмлэдэг тул таныг энэ байр суурь, албан тушаалыг хаших хугацаандаа дээр талбарт улам бүр амжилт гаргана гэдэгт би найдаж байна. Ялангуяа дэлхийн олон оронд тодорхойгүй байдал, үймээн самуун үүсээд буй энэ үед асуудлуудыг яриа хэлцэл, дипломат аргаар шийдвэрлэхийн тулд чин сэтгэлээсээ хамтран зүтгэх нь нэн чухал болж байна" хэмээн дурджээ.
Дээрхийн гэгээн захидлынхаа төгсгөлд ерөнхий сайд Ишибад Японы ард түмний итгэл найдвар, эрмэлзлийг биелүүлэх, илүү энх тайван, энэрэнгүй ертөнцийг бүтээх үйлсэд нь амжилт хүссэн байна.
