Вашингтон Д.С, АНУ (ICT) – Далай лам 2006 оны 6 дугаар сард Йорданы Петрад болох Нобелийн шагналтнуудын хоёр дахь бага хуралд оролцох урилга хүлээн авчээ. Уг хурлаар Нобелийн шагналтнуудын “Дэлхийн хямралын хариу арга хэмжээ”-нд гүйцэтгэх үүргийг хэлэлцэн тодорхойлох зорилготой юм. Далай лам 2005 оны 5 дугаар сард Петрад болсон анхны хуралд мөн оролцож байсан билээ.
2006 оны 4 дүгээр сарын 26-нд “Жордан Таймс” сонинд мэдээлснээр “Нобелийн шагналыг жил бүр олгодог 6 салбар болох “Энх тайван”, “Эдийн засаг”, “Утга зохиол”, “Физик”, “Хими”, “Физиологи ба анагаах ухаан”-ы чиглэлийн Нобелийн шагналтнууд хуралд оролцоно” гэжээ.
Тэдний дунд:
Химийн салбар - Петер Агре, Аарон Чехановер, Йохан Дайзенхофер, Аврам Хершко, Юань Т.Ли;
Анагаах ухааны салбар - Ричард Аксел, Барух С.Блумберг, Кристиан де Дюв, Эрик Р.Кандел;
Физикийн салбар - Жорж Шарпак, Клод Коэн-Таннуджи, Вал Фитч, Дональд А.Глейзер;
Эдийн засгийн салбар - Финн Э.Кидланд, Роберт А.Манделл;
Уран зохиолын салбар - Воле Шойинка;
Энх тайваны салбар - Фредерик В. де Клерк, Жозе Рамос-Хорта мөн Далай лам нар оролцох ажээ.
Йордан улсын мэдээний агентлаг 4 дүгээр сарын 26-нд Амман хотоос мэдээлэхдээ, II Абдулла хааны үгийг эш татан, “Нобелийн шагналтнууд сүүлийн 100 гаруй жилийн турш хүн төрөлхтний хөгжил дэвшлийг төлөөлж ирсэн билээ. Ирээдүйн хойч үеийн өмнө хүлээсэн амлалтаа биелүүлж, энх тайванд заналхийлж буй тэнцвэргүй, тэгш бус байдлыг хамтдаа шийдвэрлэхийн тулд Эли Визель болоод миний бие энэ нэр хүндтэй бүлгийн гишүүдийг мөн бусад салбарын удирдагчдыг Петрад дахин цугларахыг урьж байна” хэмээжээ.
Нобелийн шагналтнуудын бага хурлыг Йордан улсын II Абдулла хааны хөгжлийн сан, Эли Визелийн “Хүн төрөлхтний төлөөх сан” хамтран зохион байгуулж байна.
“Хоёр өдрийн турш үргэлжлэх энэ хуралд дэлхийн аюулгүй байдал, хөгжлийн бэрхшээлүүд, өнгөрсөн онд эхлүүлсэн Нобелийн шагналтнуудын санаачилгын стратеги, үйл ажиллагаа, Израил, Палестины энхийн үйл явц болон бүс нутгийн бусад асуудлыг хэлэлцэх төлөвтэй байна” гэж Йорданы мэдээллийн агентлаг мэдээлэв.
“Хүн төрөлхтний төлөөх сан”-гийн үүсгэн байгуулагч, 1986 оны Нобелийн энх тайвны шагналтан Эли Визель дараах мэдэгдлийг хийжээ.
“Нобелийн шагналтнууд, удирдагчид болон Йордан улсын II Абдулла хаантай хамт хүн төрөлхтний хамгийн хүнд асуудлуудыг хэлэлцэнэ гэдэг даруухан боловч урам зориг төрүүлэхүйц зүйл билээ. Өнгөрсөн жил бид Петрад Нобелийн шагналтнуудын санаачилгыг эхлүүлж, хамтын ажиллагаа, харилцаагаа гүнзгийрүүлэхийг зорьсон юм. Энэ жил бид уг санаачилгын хүрээнд хийгдсэн ажлын ахиц дэвшлийг тайлагнаж, хүмүүнлэгийн салбарт Нобелийн шагналтнуудын гүйцэтгэх үүргийг тодорхойлох болно”.
“Йордан Таймс” сонинд өгүүлснээр энэхүү бага хуралд төр, хувийн хэвшлийн болон иргэний нийгмийн нэр хүндтэй төлөөлөгчид оролцоно. Үүнд:
АНУ-ын НҮБ дахь элчин сайд асан Ричард С.Холбрук;
“Хил хязгааргүй эмч нар” байгууллагын үүсгэн байгуулагч Бернар Кушнер;
АНУ-ын Ерөнхий мэс засалч асан Дэвид Сэтчер;
Тайландын дэд сайд Сатхиратай Сураткиарт;
Холливудын жүжигчин, продюсер Майкл Дуглас;
“Рокфеллерийн ах дүүс” сангийн төлөөлөгч Стивен Хайнц;
Александрын номын сангийн төлөөлөгч Исмаил Серагеддин нар багтжээ.
Тус мэдээний төгсгөлд “Оролцогчид хүн төрөлхтний уран сэтгэмж, бүтээлч оюуны гайхамшгийг илтгэдэг, хүний гараар бүтсэн, байгалийн орчны зохицлыг харуулсан эртний хот Петрагийн ариун дурсгалт газарт цуглах болно” хэмээжээ.
Орчуулсан: Н.Долгар
