Энэтхэг улс, Дармасала хот. 2010 оны 6 дугаар сарын 15-ны өдөр Далай лам Энэтхэгийн уулын хотод болсон Энэтхэг, Төвөдийн “Найрамдал, ойлголцлын 50 жилийн ой”-н баярын арга хэмжээнд оролцов. Баярын үеэр хиндү шашны лам нар Дээрхийн гэгээнийг урт удаан наслах, сайн сайхан байхын төлөө галын тахилга (хаваан), залбирлын ёслол үйлдэв. Арга хэмжээнд Төвөдийн Төв Захиргааны удирдах албан тушаалтнууд, зохион байгуулах хорооны гишүүд мөн хэдэн зуун төвөд, энэтхэгчүүд, олон олон жуулчин оролцсон бөгөөд төвөдийн гол сүм Зүлэгхан дуганд болж өнгөрлөө. “Бид Далай ламын урт удаан наслах, сайн сайхан байхын төлөө залбирч мөн энд байгаа болон дэлхий даяарх бүх төвөд хүний аз жаргал, амжилт, сайн сайхны төлөө залбирлаа” хэмээн Сваами Ананда Жи лам өгүүлжээ.
 |
| Дээрхийн гэгээн хиндү шашны санваартнуудаас өөрт нь зориулан үйлдэж буй галын тахилгад морилж байгаа нь...Хиндү шашны санваартнууд Дээрхийн гэгээнийг эрүүл энх урт наслахыг ерөөн галын тахилга үйлдэж байна. Энэ ёслол Маклеод Ганж дахь “Энэтхэг, Төвөдийн ард түмний найрамдал, ойлголцлын 50 жилийн ой”-н нэг хэсэг юм. Энэтхэг, Дарамсала, Намжал дацан. 2010 оны 6-р сарын 15-ны мягмар гараг. (Гэрэл зургийг: Дэвид Хуанг) |
Дээрхийн гэгээн Далай лам, Төв захиргааны албан тушаалтнууд, энэтхэгийн нэр хүндтэй зочид Зүлэгхан дуганд үдийн зоог барьжээ. Арга хэмжээг Энэтхэг, Дээрхийн гэгээн Далай ламын найрамдлын нийгэмлэг (ITFS), Зочид буудлуудын холбоо, Биопар Мандал, Багсу таксины холбоо, Авто холбоо, мөн Маклеод Ганжийн уулын аялагчдын холбоо хамтран зохион байгуулжээ. Энэтхэг, Дээрхийн гэгээн Далай ламын найрамдлын нийгэмлэгийн (ITFS) ерөнхийлөгч Ажай Синг Манкотиа арга хэмжээг нээх үеэр энэхүү арга хэмжээг “Энэтхэг, Дээрхийн гэгээн Далай лам хийгээд ард түмэн хамтдаа оршсон найрамдлын 50 жилийн баяр” хэмээн тодорхойлжээ. Тэрбээр “Энэхүү баяр бол Дээрхийн гэгээн Далай ламд талархал илэрхийлэхийн зэрэгцээ, түүний ивээл оршихуй бидэнд аз завшаан авчирч буйн илэрхийлэл юм. Далай ламын ивээл дор өнгөрсөн 50 жилийн хугацаанд хоёр орны ард түмэн эв найртай, энх амгалан оршин амьдарч, хөгжин дэвшиж чадсаныг энд онцолмоор байна. Дээрхийн гэгээн өнгөрсөн 50 жил энд оршин сууж ирсэн нь биднийг хамтдаа хөгжихөд хүргээд зогсохгүй, Дармасала хотыг оюун санааны хувьд цэцэглэн хөгжихөд ч тус болжээ. Энэ бүхэн Дармасалад өнөөдрийн энэ ариун нэр хүндийг авчирсан билээ”
хэмээжээ. Эх орноосоо дүрвэсэн Төвөдийн удирдагч Далай лам баярын энэхүү арга хэмжээг зохион байгуулагчид болоод Дармасала хотын иргэдэд чин сэтгэлийн талархал илэрхийлэв. Далай лам төвөдүүдийг өөрсдийн соёл, үндэсний үнэт зүйлсээ хадгалж, хамгаалж байхыг сануулав. Тэрбээр “Бид орчин үеийн хөгжил, дэвшлийг хүлээн авч байгаа ч өвөг дээдсийнхээ өвлүүлсэн хүний үнэт чанаруудыг орхиж үл болно. Энэ үнэт зүйлс л бидний өвөрмөц соёлыг бүрдүүлдэг агаад бидний соёл, амьдралын хэв маягт гүн гүнзгий шингэж, энэ л биднийг онцгой болгон, дэлхий дахинд хайрлуулдаг. Хэрвээ бид энэ үнэт зүйлсээ гээж орхивол үнэхээрийн гунигт байдалд хүрнэ” хэмээн айлдсан юм. Далай лам 1960 оноос Химачал Прадеш мужийн уулын бэлийн Маклеод Ганж хэмээх хотод амьдарч байгаа бөгөөд 1959 онд Хятад Төвөд рүү түрэмгийлэх үед нутгаасаа дүрвэсэн юм. Тэрбээр Энэтхэгт ирснийхээ дараа жил буюу 1960 оны 4 дүгээр сард өнөөгийн Уттаракханд мужийн Муссури хотоос Маклеод Ганж руу нүүж ирсэн билээ. Түүнээс хойш Дармасала хот Дээрхийн гэгээний Засгийн Газрын төв болсон юм. Өнгөрөгч 4 дүгээр сард дүрвэгч төвөдүүд “Талархъя, Химачал” (“Thank You, Himachal”) хэмээх 2 өдрийн арга хэмжээг зохион байгуулж, Далай ламын морилон ирсний 50 жилийн ойд зориулан Химачал мужийн ард түмэнд болон засгийн газарт талархал илэрхийлжээ. \ Дармасала болон тус мужийн уулын бүсийн дагуу 14 төвөд сууринд 35,000 гаруй
төвөд иргэн амьдарч байна.
