Ванкувер, Канад — 2006 оны 9-р сарын 11 (Гленда Люймс / CP)
Ням гарагт Далай лам Ванкуверт түүний хошигнон дууддаг хонь, ямаанууд буюу корпорацийн болон нийгмийн салбарын тэргүүлэгчидтэй уулзлаа. Энэхүү уулзалт нь түүний нэрэмжит боловсролын төвийг нээхээр ирсэн гурван өдрийн айлчлалын сүүлийн арга хэмжээ байв. “Өөрчлөлтийн төлөө хамтрах нь” хэмээх нэртэй бага хуралд дэлхийн өнцөг булан бүрээс 120 гаруй хүн оролцохоор иржээ, тэдний дунд Канадын хуучин ерөнхий сайд Ким Кэмпбелл, тэргэнцэрт тамирчин Рик Хансен нар байлаа.
Энэхүү арга хэмжээний зорилго нь “хоорондоо тэр болгон таараад уулзаад байдаггүй өөр өөр салбарынхан нэг танхимд цуглуулах” хэмээн хөтлөгч Чарльз Холмс тайлбарлаад “Далай ламын айлдсанчлан, заримдаа хонь, ямаа хоёр нийлж, хамтран ажиллах хэрэгтэй болдог… Бид өөр өөр бүлэгийн хүмүүс хэрхэн нэг зорилго, өөрчлөлтийн төлөө хамтарч болох вэ гэдгийг нээн илэрүүлэх” хэмээн нэмэн дурдав.
Ням гарагт сонгогдсон оролцогчид дэлхий нийтэд тулгарч буй болон нийгэмд хөндөгдөж байгаа бэрхшээлүүдээр Далай ламд өөрийн асуултуудаа тавив.
Сэдвүүд нь өөр өөр байсан ч Далай лам бараг үргэлж нэг гол санаандаа буцаж ирж байв. Харилцан асуултын үеэр бизнесийн ёс зүйн талаар асуухад тэрбээр орчуулагчаар дамжуулан “Ёс зүйг түүний үндэс болох энэрэл хайр, харамгүй сэтгэлээс нь таслан салгаж болохгүй” хэмээн хариу айлдлаа.
Тэрбээр оролцогчидтой хөгжилдөн ярилцаж, өөрийгөө “хонь, ямаан дунд байгаа йети” хэмээн тоглоом хийж байлаа.
Энэхүү уулзалтын үеэр тарьсан “ургамлын үр” ирээдүйд заавал үр жимсээ өгнө гэдэгт найдаж байна Далай лам үнэхээр гайхалтай хүн гэж Рик Хансен хэллээ.
“Дээрхийн гэгээнтэнд асар их билиг билгүүн, туршлага байгаа бөгөөд, бид бүгд түүнээс суралцах хэрэгтэй. Корпорацийн болон нийгмийн салбарынхан адилхан үнэт зүйлтэй, харин өнөөдөр бид нийтлэг зорилгоо хайж байна” хэмээн нэмж хэлэв.
“Энэхүү уулзалт нийгмийн салбарт хэрэгтэй сайн зүйл боллоо бид ганцаараа хийж чадахгүй. Гэхдээ бизнесийн салбарт ч мөн адил сайн зүйл болсон гэж найдаж байна учир нь тэд ч бас ганцаараа хийж чадахгүй.”
