Хирошима, Япон улс, 2006 оны 11-р сарын 1 (Tsering Tsomo) –
“Энэрэн нигүүлсэл, энх тайван бол хүн төрөлхтний оршин тогтнохын үндсэн тулгуур юм” хэмээн Дээрхийн гэгээн XIV Далай лам Лхагва гарагийн үдээс хойш Хирошима хотноо айлдлаа.
|
Тэрээр Хирошимагийн Олон улсын Энх тайвны 2 өдрийн дээд хэмжээний уулзалтын нээлтийн үеэр “Энэрэн нигүүлсэл ба хүнлэг чанарын үүднээс ирээдүйдээ санаа тавих нь ” сэдвээр үндсэн илтгэл тавьж, бүх нийтийн хариуцлагын үзэл санаа болон түүний өнөөгийн бодит нөхцөл байдал дахь ач холбогдлын талаар айлдав.
Далай лам дэлхийн эдийн засгийн хамтын ажиллагаа, байгаль орчны асуудал зэрэг өнөөгийн харилцан хамаарал, уялдаа холбоо нь үндэсний хил хязгаарын ойлголтыг бараг утгагүй болгож байгааг онцлон тэмдэглээд “Эдэнэт хүний бие нь хүний зохиосон хил хязгаараас хавьгүй үнэтэй” хэмээн айлдлаа.
Тэрээр шашин, үндэс угсаанаас үл хамааран хүн төрөлхтний нийтлэг аз жаргалд энэрэн нигүүлсэл, энх тайванд суурилсан шашнаас ангид ёс зүй нэн чухал болохыг онцолж, цөмийн зэвсгийн аймшигт хор уршгийг биеэр туулсан Хирошима хотоос энх тайвны тухай уриалга илгээж буй нь онцгой ач холбогдолтойг дурдлаа.
“Хэрэв хүний оюун ухаан, технологийн хөгжлийг зөв зүйтэй ашиглахгүй бол хүний хүчирхийлэл туйлын аюултай” хэмээн Далай лам Астер Плаза төвийн Их танхимд цугласан 1200 орчим сонсогчдод хандан анхаарууллаа.
Тус уулзалтад оролцсон Нобелийн Энх тайвны шагналт, Өмнөд Африкийн хамба лам асан Десмонд Туту Далай ламыг “хүн төрөлхтөнд заяасан онцгой бэлэг” хэмээн үнэлж, эх орноосоо 50 гаруй жилийн турш хилийн чандад амьдарч, нутгаасаа хагцах шаналлыг туулсан ч уур хилэн, үзэн ядалтад автаагүйг нь онцлон биширч буйгаа илэрхийллээ.
Мөн 1976 оны Нобелийн Энх тайвны шагналт, Умард Ирландын иргэн Бетти Уильямс чуулганы үеэр “Хүүхдэд хандах энэрэн нигүүлсэл” сэдвээр илтгэл тавив.
Орой нь хамба лам Десмонд Туту, Бетти Уильямс нар Хирошимагийн Дэлхийн Энх тайвны сүмд зохион байгуулагдсан шашин хоорондын хамтарсан залбиралыг удирдан явуулж, Төвөдийн лам нар ч дэлхийн энх тайвны төлөө залбиралаа.
Уулзалтын хэлэлцүүлгийг Цүкүбагийн их сургуулийн амьдралын шинжлэх ухааны профессор Мураками Касүо хөтлөн явуулсан бөгөөд гурван Нобелийн шагналтнууд идэвхтэй оролцов. Энэхүү дээд хэмжээний уулзалт Пүрэв гарагийн орой хүртэл үргэлжилнэ. |
| 
