Денвер, АНУ, 2006 оны 9-р сарын 18 (Chase Squires / AP) — Далай лам бямба гарагт болсон Дэлхийн энх тайвны бага хуралд оролцогч мянга мянган өсвөр насны залуучуудад хандан хүн төрөлхтний даяаршилийг хүлээн зөвшөөрч, дэлхийн өнцөг булан бүрээс ирсэн хүмүүсийг өрсөлдөгч бус, хамтрагч хэмээн сэтгэн хүлээн авахыг уриаллаа.
Хуралын үеэр “Үндэсний хил хязгаар улам бүдгэрч, дэлхий нэгэн цул болж байна,” хэмээн Дээрхийн гэгээн айлдаад “Ийм нөхцөлд би дайныг хуучирсан зүйл гэж үзэж байна… Өөрийн хөршийг устгах нь үнэндээ өөрийгөө устгахтай адил юм.” хэмээн нэмэн дурдав.
Дайн нь байгаль орчны асуудал, худалдааны зогсолт, хүний эрхийн зөрчил зэргийг үүсгэдэг бөгөөд энэ бүгдийг хүн бүр тэвчих ёстой хэмээн онцоллоо. Уг хуралд арван Нобелийн Энх Тайвны шагналтан оролцсон бөгөөд тэрээр нэг цаг гаруй айлдвар айлдав. Дээрхийн гэгээн 1989 онд Нобелийн Энх Тайвны шагнал хүртсэн билээ.
Денверийн их сургуульд бага хурал зохион байгуулагдаж, уг хуралд 31 орноос цугларсан өсвөр насныхан оролцсон бөгөөд Нобелийн шагналтнуудтай хамт эхний өдрийн лекц болон харилцан ярианы хичээлүүд эхэллээ.
Дээрхийн гэгээн өсвөр насныханд хандан бүх дайныг өөрсдөө зогсоох ёстой мэт бүү бодоорой, түүнчлэн урам зоригоо хэзээч алдаж болохгүй гэж уриаллаа.
Тэдний гол үүрэг нь өмнөх үеийн алдаанаас суралцаж, одооноос эхлэн бие биетэйгээ харилцан ярилцаж, ирээдүйд маргаан, буруу ойлголт, хүчирхийлэл багатай байх нөхцлийг бүрдүүлэхэд орших ёстой хэмээн тайлбарлав. Дээрхийн гэгээн “Хэрэв бид анхааралтай ажиглавал хүмүүс бид нийгмийн амьтад, бидэнд анхаарал халамж, бусдын төлөө санаа тавих мэдрэмж хэрэгтэй.” хэмээн мөн айлдлаа.
Колорадо мужийн Форт Коллинс хотоос ирсэн 15 настай Таллеу Маклеин Африкийн хүүхдийн мөлжлөг, Холокост, геноцидын талаархи сургалтад оролцсон ба тэрээр сэтгэлээр унаагүй бөгөөд харин ч эрч хүч авсан гэж хэлэв.
“Би энд сургуульд суралцаж байгаагаасаа илүү ихийг сурч байна,” хэмээн өгүүллээ.
