Сринагар хот, Жамму, Кашмир муж, Энэтхэг улс. Бурхны шашны оюун санааны удирдагч Дээрхийн гэгээн Далай лам Кашмирын хөндийд хийж буй 6 өдрийн айлчлалынхаа хүрээнд энэ өдөр тус хотын шашны сүм, ариун газруудаар зочлон, хүндэтгэл үзүүллээ. Мөн Үндэсний Конференц намыг үүсгэн байгуулагч, ерөнхий сайд Омар Абдуллагийн өвөө Шейх Мохаммад Абдуллагийн бунханд зочилжээ.
|
Энэтхэг улсын Жамму Кашмир мужийн Сринагар хотод Үндэсний Конференц намыг үүсгэн байгуулагч, мужийн рөнхий сайд Омар Абдуллагийн өвөө Шейх Мохаммад Абдуллагийн бунхнаас гарч буй агшин. 2012 оны 7 дугаар сарын 17. ЗургийгТэнзин Чойжор/OHHDL |
Далай лам мөн Сринагар хотын Хазараатбалын ариун сүм, Гупт Ганга Шивагийн сүм мөн Чатти Падшахи гурдварад зочлон, хүндэтгэл үзүүлэв. Оюун санааны удирдагч дэлхий дахинд, ялангуяа тус мужид энх тайван, хөгжин цэцэглэхийн ерөөлийг талибан залбирсан байна. Дээрхийн гэгээнийг шашны ариун дагшин газраар зочлоход мужийн Аялал жуулчлал, соёлын сайд Наванг Ригзин Жора дагалдан явжээ.
Абдуллагийн бунханд Далай лам “Кашмирын нэрт удирдагч Шейх Мохаммад Абдулла эрхэм бол Төвөдийн үйл хэрэгт чинхүү сэтгэлийн дэмжлэг үзүүлж ирсэн билээ. Бурхан болооч Шейх Мохаммад Абдулла миний дотны найз байлаа. Би түүнтэй хэд хэдэн удаа уулзаж байсан бөгөөд тэр хүн миний үйл хэрэгт үргэлжид чин сэтгэлээсээ санаа тавьдаг байв” хэмээжээ.
Мөн Далай лам Кашмирын ард түмний найрсаг зочломтгой зан, халуун дотноор угтаж авсан чин сэтгэлийн хариуд машид талархсанаа илэрхийлсэн юм.
“Айлчлалын минь хугацаанд халуун дотноор хүлээн авсан Кашмирын ард түмэн мөн та бүхний гайхамшигтай зочломтгой занг үргэлжид санаж явах болно” хэмээн хэлжээ.
Түүнчлэн бүх шашин ахан дүүсийн ёс, эв нэгдэл, найрамдлын тухай ижил санааг илэрхийлдгийг онцлон айлдав. Чатти Падшахи гүрдварагийн Их гранти Далай ламд хүндэтгэл үзүүлэн, “сароопа” буюу хүндэтгэлийн уламжлалт ороолтыг бэлэглэжээ.
