Дарамсала, (Tibet.net) - Энэ өглөө Дээрхийн гэгээн Далай лам Төвөд сургуулийн танхимд тус сургуулийн оюутнуудын зохион байгуулж буй гуравдугаар “Энх тайвны чуулган” бага хурлыг нээлээ.
Зураг. Дээрхийн гэгээн Далай лам, Бетти Уильямс нар...
Тус хуралд дурдсанаар “Энх тайвны чуулган” нь дэлхий дахины залуучуудад зориулсан хөтөлбөр бөгөөд энэхүү санаачилгад Нобелийн Энх тайвны 12 шагналтан оролцон өөрсдийн туршлага, ур чадвараа хуваалцдаг аж.
“Энх тайвны чуулган”-ы зорилго нь орон нутаг, өөрийгөө болон дэлхийг өөрчлөх энх тайвны төлөөх шинэ үеийн тэмцэгчдэд урам зориг өгөх явдал юм.
Энэ удаагийн бага хуралд Нобелийн Энх тайвны шагналт Бетти Уильямс хүндэт зочноор оролцов. 1976 онд Бетти Уильямсын Умард Ирланд дахь Ромын католик, протестант бүлэглэлийн хоорондох хүчирхийллийг зогсоох үйл хэрэгт оруулсан үнэт хувь нэмрийг үнэлэн Нобелийн Энх тайвны шагналыг хүртээсэн бөгөөд тэрээр энэхүү шагналыг Умард Ирландын энх тайвны идэвхтэн Мэйред Корриганы хамтаар хүртсэн билээ.
Зураг. Нээлтийн ёслолд TХT-ын сурагчид, багш ажилтнууд оролцов.
Дээрхийн гэгээн Далай лам хурлыг нээж, залууст энх тайвны талаарх ойлголтыг түгээж буй “Энх тайвны чуулган” хөтөлбөрийн зохион байгуулагчдад талархал илэрхийлэв. Тэрбээр ийм үйл ажиллагааг асуудалтай нийгэм, бүс нутагт өрнүүлж, хүчирхийллийн асуудалд хамтын шийдэл олоход туслахыг уриалав.
Дээрхийн гэгээн “Хүн бүр аз жаргалыг хүсэж, зовлонгоос ангижрахыг эрмэлздэг. Үүний тулд бид бусдыг мөлжих ёсгүй. Харин хайр, өрөвдөх сэтгэл, энэрэл, уучлал, тэвчээрийг хөгжүүлэх ёстой. Ингэснээр бид дотооддоо болон нийгэмдээ амар амгалангаа хадгалж чадна. Өрөвдөх, энэрэх сэтгэлийг бид шинээр сурч бүтээх шаардлагагүй. Энэ мэдрэмж бидэнд төрөлхийн байдаг. Бид тэр мэдрэмж, сэтгэл хөдлөл, ах дүүстээ хандах хандлагаа хөгжүүлэх хэрэгтэй” хэмээжээ.
Дэлхий дээр байгалийн гамшгаас үүдэлтэй олон асуудал байдаг ч ихэнх асуудал нь хүний буруутай үйл ажиллагаанаас үүдэлтэй. Бидэнд сэтгэн бодох чадвар, ухаан заяагдсан. Хэрэв бид энэхүү бодох чадвараа зөв, эерэг зүйлд ашиглавал байгалийн гамшгийг хүртэл бууруулах гарцыг олж чадна.
Энэрэнгүй сэтгэл, хайр, тэвчээр нь хүнийг эрүүл, тэнцвэртэй байлгаж, тайван нойрсох боломжийг олгодог. Энэ бол шашнаас ангид ёс зүй юм”.
(Зураг) “Энх тайвны чуулган” бага хурлын зохицуулагч
Түүнчлэн Дээрхийн гэгээн нийгэмд тулгамдсан аливаа асуудлыг энхийн замаар, яриа хэлэлцээрийн аргаар шийдвэрлэх ёстойг онцлон хэлэв.
Дээрхийн гэгээнийг үг хэлсний дараа Бетти Уильямс гол илтгэлийг тавьж, оролцогчдын асуултад хариулав.
Нээлтийн ёслолд “Энх тайвны чуулган” бага хурлын ерөнхийлөгч, дэд ерөнхийлөгч, Төвөд сургуулийн сурагч, багш, ажилтнууд оролцсон бөгөөд бага хурал маргааш өндөрлөх юм.
Орчуулсан: Н.Долгар
