Оксфорд хот, Их Британи, 2008 оны 5-р сарын 30 (Төвдийн оффис, Лондон) – Дээрхийн гэгээн Далай лам өчигдөр Блэкфрайарс дүүрэгт болсон арга хэмжээнд хүрэлцэн ирэхэд олон нийт хүндэтгэлтэй, халуун дулаан хүлээн авсан бөгөөд өнөө өглөө тэрбээр Оксфорд хотын Шелдон театрт морилон ирлээ. Тус театрын танхим 1200 гаруй суудалтай бөгөөд хэдэн сарын өмнөөс оюутнууд, эрдэмтэн багш нар, олон нийт суудал захиалсан тул, танхим дүүрэн оролцогчид хүрэлцэн иржээ. Нобелийн энх тайвны шагналт Дээрхийн гэгээн Оксфордын Бурханы шашны судлалын төв болон Оксфордын Их сургуулийн Блэкфрайарс Холл танхимын урилгаар 5-р сарын 20-31-ний өдрүүдэд Оксфорд хотод айлчилна. Дээрхийн гэгээн Шелдон Театрт орж ирэхэд олон нийт алга ташин угтаж, тэднийг суудалдаа суухыг тэрбээр гараар даллан урихад бүгд хүндэтгэлтэй нам гүм болов. “Дээрхийн гэгээнтэн, Таныг өнөөдөр энд бид хүндэтгэн хүлээж авч байгаадаа туйлын их баяртай байна. Та дэлхий дахинд онцгой, өвөрмөц байр суурьтай эрхэм билээ. Хүмүүс дан ганц чанар чансаа, ур чадвараар танигдсан хүнтэй уулзахыг бус харин зан чанар, үйл хэргийг нь биширч, хүндэлдэг хүнтэйгээ уулзахыг хүсдэг. Түүнчлэн өнөө цагт ихэнх хүмүүс өөртэй нь дорд харьцахыг хүсдэггүй. Та мэргэн ухааныг даруу зан төлөвтэй хослуулж, гүнзгий сэтгэж, энгийнээр ярьж чаддаг. Та өөрийн бүхий л бэрхшээлийг үл харгалзан, та өөдрөг үзлийг хөхиүлэн дэмжиж, бидэнд энх тайвны боломжид итгэх итгэлийг өгч чаддаг” гэж Оксфордын Буддын шашны судалгааны төвийн дарга Профессор Ричард Гомбрих нээлтийн мэндчилгээнд онцлон дурдаад Дээрхийн гэгээнтнийг үг хэлэхийг урив. “Буддын шашны уламжлалыг илүү өргөн хүрээнд ойлгох нь яагаад чухал вэ, үүнийг хэрхэн хэрэгжүүлэх вэ?” сэдэвт олон нийтийн лекцийн үеэр Дээрхийн гэгээн хэлсэн үгэндээ дэлхийн бүх томоохон шашны уламжлалт сургаалиуд ижил хүч боломж, энэрэнгүй сэтгэлийн үртэй байдаг ч, бидний оюун санааны ялгаатай түвшнээс бидэнд өөр өөр арга зам хэрэгтэй гэв. “Бид бодитой судалгаа хийж, бусад шашин, шүтлэгийн жинхэнэ шавь/сүсэгтнүүдтэй ууулзаж, тэдний зан үйлийн талаар үнэн зөв ойлголттой болох хэрэгтэй” гэж Дээрхийн гэгээн хэлээд, зарим шашны байгууллага, төвүүд сургаалийн жинхэнэ мөн чанарт анхаарлаа хандуулахаас илүүтэйгээр өөрсдийн оршин тогтнох байр суурийн талаар илүү их санаа тавьж ханддаг нь харамсалтай гэж нэмж дурдав. Дээрхийн гэгээн өөрийн амьдралын хоёр гол хүчин чармайлтыг тайлбарласан ба (i) хүмүүний суурь үнэт зүйлс, (ii) шашны эв найрамдлыг дэмжин дэлгэрүүлэх ажээ. Дээрхийн гэгээн Оксфордын Их сургуулийн Бурханы шашны судлалын багшийн асуултад хариулахдаа түүний шашин бол энэрэн нигүүлсэхүй буюу сайхан сэтгэл гэж урьд өмнө тайлбарлаж байснаа дахин хэлсэн. “Хайр дүүрэн сайхан сэтгэл бол энэрэл нигүүсэл юм. Энэ нь бүх хүнд хамаатай үнэт зүйл бөгөөд үүнд сүм хийд байх шаардлагагүй. Амьтад хүртэл сайхан сэтгэлд талархдаг” гэж Далай лам тэмдэглэв. Олон нийтийн лекц болон түүний өмнөх тусгай уулзалтад оролцсон хүндэт зочдын дунд Оксфорд хотын захирагч байсан.
Өнөөдөр Дээрхийн гэгээний оролцсон дараагийн уулзалтад 1950 онд Төвд орон Хятад улсыг нэгтгэхээс өмнө Төвдөд амьдарч байсан Британийн 40 дипломатч, албан тушаалтан, цэргийн албан хаагчид, аялагчдын 240 гаруй үр хойч нар оролцжээ. Төвд орон чөлөөт улс байх үед тэнд амьдарч байсан азтай 50-80 насны таван хүнийг тайзнаа урьж Дээрхийн гэгээнтэй мэндчилэв. Мөн 1940 онд одоогийн Далай ламыг залах ёслолд оролцсон Британийн 4 төлөөлөгчийн үр хойч болох гурван хүн ирсэн байлаа. |
