Австрали улс, Куинсланд муж, Саншайн Кост хот (Цэрэн Кийнзом Дхонгдүгийн мэдээ) - Дээрхийн гэгээн XIV Далай лам барууны анхны буддын төвүүдийн нэг болох Жанрайсиг институтэд зочлов. Тэрээр хүрээлэнгийн нам гүм, уужим орчныг биширч, дараа нь ногоон байгаль дунд хэсэг хугацаанд алхсан байна.
Зураг. Дээрхийн гэгээнийг Жанрайсиг институтэд морилон ирэхэд Губби Губби омгийн уугуул абориген уламжлалт бүжгээр угтаж буй нь. Австрали улс, Куинсланд муж, Саншайн Кост хот. 2011 оны 6 дугаар сарын 16. Гэрэл зургийг: Расти Стюарт/DLIAL
Түүний айлчлалын онцлох үйл явдал нь Бурхан багшийн амьдралын найман их үйлсийг харуулсан найман суварга бүхий гоёл чимэглэлийн цэцэрлэг болох Гэгээрлийн цэцэрлэгт хүрээлэнгийн нээлт байлаа. Куинсланд мужийн Саншайн Кост хотын уулсын бэлд орших энэхүү буддын төвд 3500 гаруй хүн цуглан Дээрхийн гэгээнийг харж, үгийг нь сонсохоор цугларан иржээ.
Нутгийн уугуул Губби Губби омгийн бүжигчид Дээрхийн гэгээн XIV Далай ламд “Mанй улсад тавтай морил” хэмээх нэртэй хүндэтгэлийн бүжгээ толилуулав. Өнөөдрийн айлдварын сэдэв нь “Өөрийгөө болон бусдыг энэрэх сэтгэлийг хөгжүүлэхүй” байв. Tус нутгийн сургуулийн 400 орчим сурагч ёслолд оролцож, Дээрхийн гэгээнээс урьдчилж бэлдсэн асуултаа асуусан байна.
Австрали улсад хийж буй энэ удаагийн айлчлалынхаа туршид Дээрхийн гэгээн XIV Далай лам олон нийтийн асуултад мэргэн онч, ойлгомжтой хариулж, онцгой сэтгэгч, манлайлагч гэдгээ харуулж байв. Нэг хүн түүнээс “Таны амьдралдаа хүрсэн хамгийн том амжилт юу вэ?” хэмээн асуухад Дээрхийн гэгээн “Дүрвэн амьдарч байгаа маань миний хамгийн том амжилт юм” хэмээн хэлсэн нь олныг гайхшруулав. Дээрхийн гэгээн эх орноосоо дүрвэн амьдрах болсноор хүн төрөлхтний төлөө сайн үйл хийх боломж гарсан тухайгаа тайлбарлав.
Парламентын гишүүн, Төвөдийн асуудлаар ажилладаг парламентын гишүүн Питер Слиппер болон Саншайн Костын хотын дарга Боб Абботт нар ёслолд оролцсон байна.
Зураг. Дээрхийн гэгээн XIV Далай лам Куинсланд дахь Жанрайсиг институтийн гишүүдтэй хамт. Австрали улс, Куинсланд муж, Саншайн Кост хот. 2011 оны 6 дугаар сарын 16. Гэрэл зургийг: Расти Стюарт/DLIAL
Өглөөхөн Дээрхийн гэгээн хүрээлэнгийн засвар хийсэн дуганд 500 гаруй лам, гэлэнмаа болон эгэл гишүүдтэй уулзсан байна. Тэрээр “Австрали улс бол уламжлалт буддын орон биш хэдий ч энд олон хүн амьдралынхаа суурь асуултуудын хариултыг буддын шашнаас олж байна. Таны итгэл үнэмшил жинхэнэ байх эсэхийг мэдлэг тань шалгадаг” хэмээжээ. Бурхан багшийн Наландрын уламжлалыг тууштай дэмждэг тэрээр буддын зан үйлийг хэт хөөцөлдөх хандлагад анхаарлаа хандуулж, сүсэгтнүүдэд Бурхан багшийн сургаалын мөн чанарыг судалж, гүнзгий ойлгохыг зөвлөсөн байна.
Үдийн хоолны үеэр Төвөдийн хөгжимчин, Куинсланд мужийн оршин суугч Дэнзэн Чойжил шинэхэн ногоон цэцэрлэгт хөгжмөө тоглож, баярын уур амьсгалыг бүрдүүлэв. Төвөд бараа зардаг дэлгүүрүүд Австрали улсын энэ алслагдсан өнцөг буланд худалдаагаа дэлгэсэн нь баярын уур амьсгал оруулж бд улам .
Англи хэлнээс орчуулсан T.Ялгуун
