Мексик улс, Mехико хот. Дээрхийн гэгээн XIV Далай лам 2011 оны 9 дүгээр сарын 11-ний өдөр “Цөвүүн цагт аз жаргалыг олох нь” сэдвээр нийт олонд айлдвар айлдахаар “Cruz Azul” цэнгэлдэх хүрээлэн рүү мордохынхоо өмнөхөн Затекас мужийн амбан захирагч Мигель Алонсо Рейестэй уулзлаа. Уулзалтын үеэр амбан захирагч Дээрхийн гэгээнийг Затекас мужид зочлохыг урихад Дээрхийн гэгээн урилгыг уриалгахан хүлээн авлаа.
 |
Дээрхийн гэгээн Далай лам Мексик хотын “Cruz Azul” цэнгэлдэх хүрээлэнд цугласан 30,000 гаруй хүний өмнө айлдвар айлдаж буй нь... Mексик улс, Mехико хот. 2011 оны 9 дүгээр сарын 11. Гэрэл зургийг Оскар Фернандес /Каса Tөвөд Mексик. |
“Cruz Azul” цэнгэлдэхэд 30,000 гаруй сонсогч олон Дээрхийн гэгээний айлдварыг сонсохоор цуглажээ. Дээрхийн гэгээнийг Цэнгэлдэх хүрээлэнд морилон ирэхэд Мексик хотын “Шашны зөвлөл”-ийн төлөөлөгчид угтан авсан юм. Төвөдийн олон жилийн анд нөхөр, Дээрхийн гэгээний шавь Ричард Гир түүнийг тайзнаа гарч ирэхийн өмнө олноо танилцуулжээ.
Дээрхийн гэгээн айлдвараа “Бид бүгд адилхан. Бүгд жаргалтай амьдрахыг хүсдэг. Жаргалтай байх ч эрхтэй” хэмээн эхлүүллээ. Дээрхийн гэгээн төөнөх нарны дор цаг гаруй зогсоогоороо айлдсан бөгөөд 30,000 үзэгч анхааралтай нь аргагүй сонордлоо. Дараа нь Далай лам үзэгчдийн асуултад хариулсан юм.
|
.“Cruz Azul” цэнгэлдэхэд өлгөөтэй байсан зарим хулсан самбарууд... Mексик улс, Mехико хот. 2011 оны 9 дүгээр сарын 11. Гэрэл зургийг Ёнсүк Ка. |
Мексикийн ард түмэн Төвөдийн далбааг мандуулж буй талаар саналаа хэлэхийг нь хүсэхэд Дээрхийн гэгээн 1954 онд БНХАУ-д айлчлан, Мао Зэдун даргатай уулзахад Мао түүнд “Төвөд өөрийн далбаатай. Төвөдийн ард түмэн далбаагаа ашиглаж байх ёстой” гэж хэлж байсан тухай дурсан ярив. “Тиймээс хүмүүс Төвөдийн далбааг үзүүлэхэд гомдол гаргавал та бүхэн Мао дарга өөрөө ч энэ далбааг хэрэглэхийг эсэргүүцээгүй юм шүү гэж хэлж болно” хэмээн Дээрхийн гэгээн хэлэв. Энэхүү үгийг хэлэхүйд Төвөдийн далбаа барьсан бүх хүн далбаагаа зэрэг өргөн намирууллаа.
Цэнгэлдэх хүрээлэнд хөл бөмбөгийн багийн сандлын дээхэн талаас “Мексик Төвөдөд хайртай” хэмээсэн аварга том хулсан самбар олныг өлгөсөн байх агаад мянга мянган хүн Төвөдийн жижиг далбаа барин зогсож байсан нь хэвлэлийнхний анхаарлыг татжээ.
|
Дээрхийн гэгээн Далай лам Мексик хотод айлдсан айлдварынхаа дараа үзүүлбэрээ толилуулсан хөгжимчидтэй уулзаж буй нь... Mексик улс, Mехико хот. 2011 оны 9 дүгээр сарын 11. Гэрэл зургийг Оскар Фернандес /Каса Tөвөд Mексик. |
Айлдвараа өндөрлөхүйд хөтлөгч талархлын үг хэлж, үзэгчид нэгэн дуугаар Дээрхийн гэгээн XIV Далай ламд зориулан испани хэлээр
“Цаст уулсаар хүрээлэгдсэн энэ нутагт
Та бүхий л тайтгарлын эх булаг билээ
Бүхнийг чадагч Жанрайсиг, Дэнзин Гяцо минь
Самсара дуусах хүртэл оршин байх болтугай” хэмээн бат оршил өргөн залбирлаа. Үргэлжлүүлэн Мексикийн ардын дууч Мариачи хөгжимчдийн хамт тайзан дээр гарч ирэн, Далай ламд зориулан уянгалаг агаад сэтгэл хөдөлгөм үдэлтийн дуу өргөхөд үзэгчид ч түрэн дуулав.
Дээрхийн гэгээн цэнгэлдэхийн тайзнаас буухын өмнө Мексик хотын “Шашны зөвлөл”-ийн гишүүд, мексикийн ардын хөгжмийн уран бүтээлчидтэй хамт дурсгалын зураг татууллаа.
|
Дээрхийн гэгээн Далай лам Леандро Валле соёлын төвийн танхимд Мексикийн улсын боловсролын салбарын ажилтнуудад айлдвар айлдаж буй... Mексик улс, Mехико хот. 2011 оны 9 дүгээр сарын 11. Гэрэл зургийг Оскар Фернандес /Каса Tөвөд Mексик. |
Дээрхийн гэгээн өдөр өнгөрөхөд Леандро Валле соёлын төвд зочилж, “Цогц хандлага: Оюуныг хурцалж, сайхан сэтгэлийг төлөвшүүлэх нь” сэдвээр мексикийн боловсролын салбарын ажилтнуудад айлдвар айлджээ. Энэхүү өндөр түвшний айлдварт Мексикийн боловсролын ажилтны холбооны 1000 гаруй гишүүн оролцсон бөгөөд түүнийг Азтека телевик Мексик даяар шууд дамжууллаа.
Дээрхийн гэгээн XIV Далай лам Мексик улсад хийсэн гурван өдрийн айлчлалаа дуусгасны дараа Аргентин улсын нийслэл Буэнос Айрес хот руу мордож, хоёр өдрийн хөтөлбөрөө үргэлжлүүлэх болно.
Англи хэлнээс орчуулсан T.Ялгуун
