Их Британи, Лондон хот. Дээрхийн гэгээн Далай лам өчигдөр үдээс хойш Дарамсалагаас Дели рүү нислээ. Энэ өглөө Их Британи руу мордохынхоо өмнө "India Today" сонины сэтгүүлч Жёти Малхотратай ярилцжээ. Лондон хотод газардах үед үүлэрхэг байсан тул үзэгдэх орчин ихэд хязгаарлагдмал байв. Дээрхийг гэгээнийг онгоцноос буухуйд Энэтхэгийн Дээд комиссын Тэргүүн нарийн бичгийн дарга М.П.Сингх, Дээрхийн гэгээний төлөөлөгч Чонпэл Цэринг нар угтан авчээ. Дараа нь түүнийг Их Британийн Буддын шашны нийгэмлэгийн төвийн ерөнхийлөгч Кажи Шерпа VIP танхимд хүлээн авсан байна.
 |
| Дээрхийн гэгээн Далай ламыг Лондон хотод ирэхэд уламжлал ёсоор угтан авч буй нь.., Их Британи, Лондон хот. 2015 оны 6 сарын 27. Зургийг Жереми Расселл / Дээрхийн гэгээн Далай ламын ажлын алба |
Нисэх буудлаас холгүй орших зочид буудалд Дээрхийн гэгээнийг угтан авах, уламжлалт ёсоор хүндэтгэл үзүүлэхээр Их Британийн Буддын шашны нийгэмлэгийн төвийн непал гишүүд хүрэлцэн ирсэн байв. Дээрхийн гэгээнийг амрахын өмнө "Press Association" агентлагийн сэтгүүлч бяцхан чөлөөг ашиглан хэд хэдэн асуулт асуужээ. Сэтгүүлч юун түрүүнд Дээрхийн гэгээнийг Гластонберийн наадамд хүрэлцэн ирсэн зорилгыг асуув. Тэрбээр “Урилга ирвэл би дуртайяа хүлээн авдаг. Би бээр энэхэн дэлхийн 7 тэрбум хүмүүний нэг. Бид бүгд бусдын сайн сайхны төлөө санаа тавих ёстой гэдэгт итгэдэг. Бид нийгмийн амьтад. Бид бие биеэсээ хамааралтай. Би бээр боломж л олдвол энэ л зүйлийг хуваалцахыг хичээдэг юм. Бид бие махбод, оюун санаа, сэтгэл хөдлөлийн хувьд үндсэндээ ижил учраас хүмүүст миний өчүүхэн туршлага хэрэг болно хэмээн найдаж байна” хэмээн хариулжээ.
Урлагийн тоглолтыг саатан үзэх эсэхийг асуухад тэрбээр “Буддын шашны хувраг хүний хувьд үзэхийг үл зөвшөөрдөг ч сонсох боломжтой” хэмээн хариулжээ.
Сэтгүүлч энэхүү айлчлалын эсрэг Олон улсын Шүгдэнгийн нийгэмлэгийн эсэргүүцлийн жагсаал болон хятадын эрх баригчдын зүгээс гаргаж буй хурц шүүмжлэлд хэрхэн хариу өгч буйг асуув. Тэрбээр “Хятад улсын эсэргүүцэх нь уламжлал билээ. Тэд намайг чөтгөр хэмээн дүрсэлдэг. Хятадын эрх баригчдын хатуу үзэлтнүүд Төвөдийн тусгаар тогтнолыг эрэлхийлэхгүй байна. Харин ч эсэргүүцэх ёстой хэмээн үздэг. Гэсэн ч төвөдийн өвөрмөц шашин, соёл, хэлийг хадгалан үлдэх ёстой” хэмээсэн юм.
“Шүгдэнгийн асуудлын хувьд бараг 400 орчим жил үргэлжилж байна. 1950-иад оны эхээс 1970-аад оны эхэн үе хүртэл миний бие мэдлэг дутуугийн улмаас энэ сахиусыг шүтэж байлаа. Харин дараа нь би бээр үүнтэй холбоотой олон асуудал байгааг анзаарч, зарим нэг судалгаа хийж үзсэн билээ. Шүгдэн сахиусыг V Далай ламын үед тахин шүтэж эхэлсэн ч тэрбээр үүнийг хор хөнөөлт сахиус хэмээн үзэж байсныг олж мэдсэн юм.
 |
| Дээрхийн гэгээн Далай лам 2015 оны 6 сарын 27-нд Их Британийн Лондонд хийсэн айлчлалын үер Press Association агентлагийн сэтгүүлчид ярилцлага өгч буй нь... Зургийг Жереми Расселл / Дээрхийн гэгээн Далай ламын ажлын алба |
Хүмүүс юунд итгэх нь өөрийн хэрэг. Харин хор хөнөөлийн эх үүсвэрийг тодорхой болгох нь миний үүрэг билээ. Уг сахиусыг тахин шүтэж буй хүмүүс надад уурлах ч тэд зүгээр л үг хэлэх эрх чөлөөгөө эдэлж байгаа хэрэг” хэмээн айлдсан билээ.
Мөн Дээрхийн гэгээнээс өчигдөр болсон террорист халдлагын талаар асуужээ. Тэрбээр Непал дахь газар хөдлөлт, байгалийн гамшгийг террорист зэрэг хүний гараар бүтсэн эмгэнэлт явдлаас ялгаж үзсэн бөгөөд “Бид ийм үйлдлээс урьдчилан сэргийлэх боломжтой. Гэсэн ч хүмүүсийн оюун санааг уур хилэн, үзэн ядалт зэрэг хүчтэй сэтгэлийн хөдлөл ноцтойгоор үймүүлсэн үед тэднийг тайвшруулах машид хэцүү. Шашны нэрийн дор хүчирхийлэл үйлдэх нь огт байж боломгүй зүйл учир хүч хэрэглэх бус, харин яриа хэлэлцээр, зөвшилцлийн замаар мөргөлдөөнийг шийдвэрлэх аргад залуусыг сургах нь нэн чухал билээ” хэмээн хариулсан юм.
Дээрхийн гэгээн маргааш Гластонберийн наадамд оролцож буй хүмүүст үг хэлэхээр баруун хязгаар руу аялах аж.
