Бразил улс, Сан Пауло хот. Дээрхийн гэгээн XIV Далай лам 9 дүгээр сарын 17-ны өдөр Латин Америк дахь 10 өдрийн айлчлалынхаа сүүлийн өдөр Сан Пауло хотын Анхемби конвенцийн цэцэрлэгт хүрээлэнд “Хамтын хариуцлагаар эв нэгдлийг бүтээхүй” сэдвээр 6500 орчим сүсэгтэн олонд айлдвар айлдлаа. Энэхүү арга хэмжээг Сан Пауло хотын захиргаа хамтран зохион байгуулсан юм.
 |
Дээрхийн гэгээн Далай лам “Хамтын хариуцлагаар эв нэгдлийг бүтээхүй” нийт олонд зориулсан айлдварын үеэр... Бразил улс, Сан Пауло хот. 2011 оны 9 дүгээр сарын 17. Гэрэл зургийг Палас Афина холбоо. |
Дээрхийн гэгээнийг Конвеншн төвд ирэхэд Сан Пауло хотын дарга Жилберто Кассаб, Сан Пауло хотын хамба лам Одило Шерер, Сан Пауло хотын Их Сургуулийн захирал Жоау Грандино Родас, Хамгаалалтын албаны дарга нар угтан авч, товч уулзалт хийсний дараа тайзанд заллаа. Хотын дарга Кассаб Дээрхийн гэгээнийг хүлээн авч, олон нийтэд танилцуулжээ.
Нээлтийн дараа “Хамтын хариуцлагаар эв нэгдлийг бүтээхүй” нийт олонд зориулсан илтгэлээ эхлүүллээ. Дээрхийн гэгээн илтгэлдээ “Дайн хийгээд хүч хэрэглэх үзэл хэдийн үеэ элээж хоцрогдсон. Өнгөрсөнд улс орнууд бие даан оршин тогтнодог байсан тул нэгнийх нь ялалт нөгөөгийнх нь ялагдал болдог байв. Харин энэ өдөр дэлхий асар гүн холбоо хамааралтай болсон тул хөршийнх нь сүйрэл бол өөрийн сүйрэл л гэсэн үг. Иймээс ХХI зуунд илүү тайван, тогтвортой, эв нэгдэлтэй амьдрахын тулд бүхий л асуудал зөрчлийг зөвхөн яриа хэлэлцээрийн аргаар шийдвэрлэх хэрэгтэй. Энэ ажлыг гүйцэтгэхэд ХХI зууны залуусын гүйцэтгэх үүрэг их бөгөөд тэд дотоод үнэ цэн, ёс суртахуун, өөр итгэл үнэмшил бодолтой хүмүүст хүндэтгэлтэй хандахыг сурах шаардлагатай юм” хэмээн айлдав. Тэрбээр илтгэлийн дараа сонсогч олны асуултад хариуллаа.
Илтгэлд тулгуур эрхтэн, сонсгол, хэл ярианы бэрхшээлтэй олон иргэн хүрэлцэн ирсэн байв.
|
Дээрхийн гэгээн XIV Далай лам Дэлхийн худалдааны төвийн Алтан танхимд айлдвар айлдаж буй нь... Бразил улс, Сан Пауло хот. 2011 оны 9 дүгээр сарын 17. Гэрэл зургийг Палас Афина холбоо. |
Дээрхийн гэгээн үдийн дараа Дэлхийн худалдааны төвийн Алтан танхимд эерэг, бүтээлч сэтгэл хөдлөлийг төлөвшүүлэх тухай ном айлдлаа. Тэрбээр зан үйлд хэт баригдах бус судалгаа, мэдлэгт илүү анхаарч, мэдлэг, дадлага хоёрыг зэрэг хөгжүүлэхийг уриалсан юм.
Сан Пауло хотод болсон арга хэмжээнд 5000 гаруй хүн ирсэн бөгөөд Дэлхийн худалдааны төвийн Алтан танхим ердөө 4000 хүний суудалтай тул олон хүн газар суун сонсжээ.
Арга хэмжээний төгсгөлд Палас Афина холбоог хaмтран үүсгэн байгуулагч, айлчлалын зохион байгуулагч, доктор Лиа Дискин Дээрхийн гэгээнд бразилын ард түмний өмнөөс талархал илэрхийлж, ирэх жил дахин айлчлан ирэхийг хүсэв. Үзэгчид суудлаасаа босон алга ташиж, зарим сүсэгтний нүдэнл нулимс цийлэгнэн байлаа.
Дээрхийн гэгээн арга хэмжээ дуусмагц Сан Пауло хотоос Франкфурт хот руу мордов.
Англи хэлнээс орчуулсан T.Ялгуун
