Швейцарь улс, Женев хот, 2011 оны 8 дугаар сарын 12-ны Төвөд, Монгол, Швейцарь, Франц улсуудын хэдэн зуун сүсэгтэн шинээр барьж байгуулсан “Шэдрүб Чойжорлинг” хэмээх Төвөдийн буддын төвд Дээрхийн гэгээнийг угтан хүндэтгэл үзүүлэв.
Дээрхийн гэгээн ирэхдээ машиныг зай завсарт зогсоон урт дарааллаар сийрэг жигд зогссон хүмүүсийн дундуур алхаж, гар барин мэндчилж байлаа. Энэхүү ёслолын эрхэм ач холбогдлыг хүндэтгэн Орос улсын буддын шашинтнууд хүртэл тусгайлан зорин иржээ.
|
| Зураг. Дээрхийн гэгээн Шэдрүб Чойжорлинг төвд хүрэлцэн ирэхэд хүндэтгэл үзүүлж буй хүмүүс… Швейцарь улс, Женев хот. 2011 оны 8 дугаар сарын 11. Гэрэл зургийг: Игорь Янчоглов |
Төвийн залбирлын танхимд орохын өмнө Дээрхийн гэгээн, Дрепүнг Гоманг дацны хамба лам, унзад болон лам нар ариусгалын залбирал эхлүүлэв.
Дээрхийн гэгээн Далай лам өөрөө “Шэдрүб Чойжорлинг” нэрийг хайрласан. Энэхүү төвийг Орос улсын парламентын гишүүн, бизнес эрхлэгч Раэфэл Гималов байгуулжээ. Байршлын хувьд Франц улсын нутагт байдаг ч Швейцарийн Женев хотын хилээс ердөө цөөн километрийн зайтай.
Ноён Гималов төвийн барилга байгууламжийг босгоход Дээрхийн гэгээн биечлэн анхаарч, дэмжиж ирсэнд талархаад төвийн гол зорилгын нэг нь Төвөдийн буддизмыг илүү гүнзгий, зөв ойлголттойгоор хүргэх явдал хэмээн онцлов.
|
| Зураг. Дээрхийн гэгээн Шэдрүб Чойжорлинг төвд айлдвар хийж буй нь… Швейцарь улс, Женев хот. 2011 оны 8 дугаар сарын 11. Гэрэл зургийг: Мануэл Бауэр |
Дээрхийн гэгээн төвд хүрэлцэн ирсэндээ тун баяртай байгаагаа илэрхийлж, Орос улсын зарим бүс нутаг хэдэн зууны турш Төвөдийн уламжлалт буддын шашинтай маш ойр холбоотой байсныг дурдав. XIII Далай ламын үед энэ харилцаа бүр ч бэхжин өргөжсөн.
Тэрээр 21 дүгээр зуунд материаллаг хөгжил огцом өсөн нэмэгдсэн ч эд хөрөнгөөр элбэг, өндөр боловсролтой олон хүн аз жаргалгүй хэвээр байгааг хэлэв. Үүний шалтгаан нь: богино хараатай байдал, өөрт төвлөрсөн хандлага, уур, үзэн ядалт, атаа жөтөө зэрэг сүйтгэгч сэтгэл хөдлөлийн хор уршгийг ойлгохгүй байх явдал хэмээн тайлбарлав. Харин хүн төрөлхтөн эдгээр сөрөг сэтгэл хөдлөлийг багасгах бүрэн чадвартай хэмээн нэмэв.
Дээрхийн гэгээн “Шэдрүб Чойкёрлинг” нэрийн утга нь “Шэба” гэдэг нь тайлал, мэдлэг, “Друб” гэдэг нь бясалгал, хэрэгжүүлэлт гэсэн утгатай хэмээн тайлбарлав.
Тиймээс шашин шүтлэггүй хүн хүртэл ухамсар, сэтгэл хөдлөлийн талаарх мэдлэгээ дээшлүүлэхийн тулд энэ төвд суралцаж, олсон мэдлэгээ амьдралдаа хэрэгжүүлэх боломжтой гэж айлдав.
|
| Зураг. Дээрхийн гэгээн Шэдрүб Чойжорлинг төвийн газар нутгаар зочилж буй нь… Швейцарь улс, Женев хот. 2011 оны 8 дугаар сарын 11. Гэрэл зургийг: Мануэл Бауэр |
Өдрийн хоолны үеэр Дээрхийн гэгээн “итгэл үнэмшил бол үнэмших шалтгаан, гүн шинжлэл эргэцүүлэл дээр суурилсан байх ёстой, тэгвэл л тогтвортой байна” хэмээн онцлов.
Дрепүнг хийдийн хамба болон таван лам нар Энэтхэг улсаас зорин ирж энэхүү нээлт, ариусгалын ёслолд оролцжээ.
Өнгөрсөн жил төв Дрепүнг Гоман хийдтэй албан ёсны хамтын ажиллагааны гэрээ байгуулсан бөгөөд энэ нь төвийг Энэтхэг улсын өмнөд хэсэгт оршдог, төвөдийн сонгодог буддын гүн ухааны сургалтын томоохон төвтэй холбож өгч байна.
Түүхэн уламжлалаараа Дрепүнг Гоман хийд Монгол, Орос улсуудын буддын шашинтнуудтай гүн холбоотой бөгөөд өнөөдөр Энэтхэг улсын өмнөд хэсэгт байрлах тус хийдэд 200 гаруй монгол, орос лам хувраг суралцаж байна.
Англи хэлнээс орчуулсан T.Ялгуун
