Патна, Бихар, Энэтхэг, 2013 оны 1 сарын 4 - Өчигдөр, Дээрхийн гэгээн Далай ламыг Энэтхэгийн эртний хот болох Патнагийн нисэх онгоцны буудалд буухад нь Бихарын Ерөнхий сайд Нитиш Кумар халуун дотноор угтан авчээ. Дараа нь түүнийг ойролцоох тус мужийн зочид буудалд хүргэсэн бөгөөд тэндээ амрахаар орсон байна.
Орчин үеийн Бихар мужийн нийслэл Патна хот нь дэлхий дээрх хамгийн урт хугацаанд хүн амьдарч ирсэн газруудын нэг юм. Анх Буддагийн үед амьдарч байсан Магадхагийн хаан Ажаташатру нийслэлээ Ражгираас энд нүүлгэж ирснээр Патна хот чухал ач холбогдолтой газар болжээ. Хоёр зууны дараа, буддын шашныг тосон авч, түгээн дэлгэрүүлсэн, мөн Энэтхэг улсыг нэгтгэсэн анхны удирдагч Ашока эзэн хаан ч мөн Патнаг өөрийн нийслэлээ болгосон түүхтэй. Одоогийн Ерөнхий сайд Нитиш Кумарын удирдсан засгийн газар энэ түүхэн өвийг хүндэтгэн, 2010 онд Дээрхийн гэгээн Далай ламыг Будда Смрити цогцолборын нээлтэд урьсан юм.
|
| Зураг. Дээрхийн гэгээн Далай лам Бихар мужийн Ерөнхий сайд Нитиш Кумартай хамт Патна дахь Ерөнхий сайдын өргөөнд … 2012 оны 1 сарын 4 , Бихар, Энэтхэг Зургийг: Жереми Руссел |
Дээрхийн гэгээн Далай лам өнөөдөр Ерөнхий сайдын өргөөнд үдийн зоогт уригдсан бөгөөд тийш машинаар хүрч очжээ. Түүнийг машинаас буухад нь Ерөнхий сайд өөрийн биеэр угтан авч албаны хүмүүстэй танилцуулсны дотор дэд ерөнхий сайд Сушил Кумар Моди, Урлаг соёлын сайд Сухна Пандей, Усжуулалтын сайд Вижай Кумар Чаудхари болон Гаяа дүүргийн засаг дарга Вандана Приасси нар байлаа.
“Би Ашока хааны хот, мөн Ерөнхийлөгч асан Доктор Ражендра Прасад, нэрт эрдэмтэн, нийгмийн зүтгэлтэн Жаяпракаш Нараян нарын түүхэн хот болох Патнад ирсэндээ маш их баяртай байна. Өчигдөр үдэш нисэх онгоцны буудалд буухдаа онгоцны буудлыг түүний нэрээр нэрлэснийг харахад их таатай байсан.”
Дээрхийн гэгээн Далай лам Патна хот буддын шашны түүхэнд чухал үүрэг гүйцэтгэдэг бөгөөд хэдийгээр бүх шашин энэрэл нигүүлслийн тухай сургадаг ч, Буддагийн сургаалыг "Хоосон чанарын үндэс" нь илүү тодруулж, энэ нь бидний оюун санаан дахь эрсдэлт сэтгэл хөдлөлүүдтэй тэмцэхэд маш их тустай болохыг айлдаад, Бихарын засгийн газар буддын шашинд ихээхэн анхаарал тавьж байгаад талархал илэрхийлжээ.
|
| Зураг. Дээрхийн гэгээн Далай лам Бихар мужийн Ерөнхий сайд Ништиш Кумарын өргөөнд тарьсан Бодь модыг адислаж буй нь. … 2012 оны 1 сарын 4 , Бихар, Энэтхэг Зургийг: Жереми Руссел |
Үдийн хоолны дараа Ерөнхий сайд Дээрхийн гэгээн Далай ламыг гараас нь хөтлөн цэцэрлэгт тарьсан бодь модон дээр аваачжээ. Тэр Дээрхийн гэгээнээс уг бодь модыг адислан, ерөөл айлдахыг хүсэхэд Намгял хийдийн төвөд лам нар, Бодьгаяагийн Энэтхэгийн тэравада урсгалын лам нарын хамт энэ номыг айлдлаа.
Тэрээр мөн энэхүү үйл явдлыг тэмдэглэн дурсгалын хүрэл самбар нээж цагаан өнгийн хадаг өргөжээ.
Дотно, найрсаг уур амьсгал дунд болсн үдийн зоогийн төгсгөлд, Ерөнхий сайд Нитиш Кумар Энэтхэгийн эртний уламжлалын дагуу Дээрхийн гэгээн Далай ламд нөмрөг алчуур бэлэглэжээ. Дээрхийн гэгээн түүнд Буддагийн алтадмал бурхан өргөн барьж, Бихар мужийг амжилттай удирдаж буйд нь талархаж байгаагаа илэрхийлсэн байна.
Дээрхийн гэгээн Далай лам, Ерөнхий сайд Нитиш Кумар нар үдээс хойшхи үйл ажиллагаагаа хотоос холгүй орших Будда Смрити цогцолбор буюу Буддагийн дурсгалын цэцэрлэгт хүрээлэнд үргэлжлүүллээ. Дээрхийн гэгээн Далай лам, Ерөнхий сайдыг харахаар цэцэрлэгт хүрээлэн рүү явах замд олон хүн цугларчээ. Тэд хамтдаа Паталипутра каруна суварга руу алхаж очоод, Дээрхийн гэгээн Далай ламыг дахин ерөөл айлдахыг хүссэн байна. Энэхүү барилгын голд найман өнцөгт шилэн байгууламж байх ба дотор нь буддын шашинт олон орноос хандивласан жижиг сац суваргууд, эд өлгийн дурсгалт зүйлс хадгалагдаж байгаа юм байна. Тэд суварганаас цааш алхан, шинээр босгосон Буддагийн гантиг чулуун хөшөө бүхий талбай руу алхах үедээ Дээрхийн гэгээн энэхүү газрыг зүгээр нэг эргэл мөргөлийн газраас илүү зүйл болгох хэрэгтэй юм байна даа гэж онцлон хэллээ. Түүний төсөөлж буйгаар энэ газар буддын шашинтнууд, эрдэмтэд болон бусад хүмүүс буддын шашныг хамтран судалж, харилцан бие биенийхээ мэдлэгийг тэлж баяжуулж болох сургалтын төв байвал хэрэгтэй аж.
Маргаашийн олон улсын хуралд оролцохоор ирсэн олон улсын төлөөлөгчид Буддагийн хөшөө тийш хүрэх зам дүүрэн эгнэсэн байсан бөгөөд Дээрхийн гэгээн Далай лам тэдний олонхтой ярилцан, гар барьж явлаа. Дараа нь тэрээр Ерөнхий сайдын хамт Ражастаны хар гантиг чулуугаар сийлсэн Буддагийн том хөшөөг нээлээ. Түүнээс ярилцага авахыг хүссэн олон сэтгүүлчдэд анхаарлаа хандуулан:
Буддын шашны гол сургаал болох энэрэл нигүүлсэл, тэсвэр тэвчээр, уучлал өршөөл, өөрийгөө хянах чадвар нь амар тайван амьдрахад тусалдаг бол, атаа хорсол, шунал тачаал, уур хилэн нь стресс бухимдлыг үүсгэдэг, тиймээс диваажин, нирвааны тухай ярихгүй байсан ч, эдгээр хайр энэрлийн сургаал нь өнөөгийн бидэнд хүн чанартай, сайн сайхан амьдрахад тустай юм гэжээ.
 |
| Зураг. Дээрхийн гэгээн Далай лам хэвлэлийнхэнд ярилцлага өгч буй нь … 2012 оны 1 сарын 4 , Бихар, Энэтхэг Зургийг: Жереми Руссел |
Тэрээр буддын шашны лам хуврагийн хувьд, дэлхийн гол шашнууд Энэтхэгт сүүлийн мянган жилийн турш энх тайвнаар зэрэгцэн оршиж, хөгжиж ирсэнд нэн талархалтай байдаг тухайгаа илэрхийлсэн. Энэхүү шашин хоорондын зохицол нь Энэтхэгийн үндэсний уламжлалын салшгүй нэг хэсэг болсон төдийгүй шашнаас болж зөрчилдөн мөргөлдөж буй нөхцөл байдлыг олноор харж байгаа энэ үед энэ энх тайван, эв нэгдэл нь бусдад үлгэр жишээ болж байна.
Эцэст нь Дээрхийн гэгээн Далай лам Наландагийн уламжлалын сурагчийн хувьд залбирлаас гадна тодорхой сэтгэлгээ болон логик дүн шинжилгээ шаардлагатай гэдэгт итгэлтэй байгаагаа хэлээд, Энэтхэгийн эртний сэтгэлгээний гол үзэл болох "Хоосон чанар"-ыг өнөө үед шашны ойлголт гэхээсээ илүүтэй академик судалгааны нэг судлагадахуун болгон үзэх ёстой гэдгийг онцоллоо.
Тэрээр орчин үеийн эрдэмтэдтэй 30 гаруй жил ярилцсан, хэлэлцсэний үр дүнд төвөдүүд орчлон ертөнц болон атомын тухай мэдлэг олж авсан бол, эрдэмтэд эртний Энэтхэгийн гүн ухаанаас оюун ухаан болон сэтгэл хөдлөлийн талаар судалсан гэдгийг хэлжээ. Далай лам сэтгэлийн амар амгалан нь эрүүл мэндэд тустай ч, эрсдэлт сэтгэл хөдлөлийн бие махбодод илрэх хариу богино хугацаанд үргэлжилдэг тул, бидний хийх ёстой гол зүйл бол оюун санааг дадуулан сургах явдал юм хэмээн айлджээ.
|
| Зураг. Дээрхийн гэгээн Далай лам Патна дахь Будда Смрити дурсгалын цэцэрлэгт хүрээлэнд боссон Буддагийн шинэ хөшөөний өмнө залбирч буй нь … 2012 оны 1 сарын 4 , Бихар, Энэтхэг Зургийг: Жереми Руссел |
Нар буухын алдад Дээрхийн гэгээн Далай лам Буддагийн шинэ хөшөөний өмнө заларч залбирал, ерөөл айлдаад, цогцолбороос явахдаа Ерөнхий сайд Нитиш Кумарт хандан: "Таны удирдлага дор энэ төв эртний судруудыг судлах сургалтын төв болно гэдэгт итгэлтэй байна" гэлээ. Мөн тэрээр буддын судруудыг буддын шинжлэх ухаан, гүн ухаан, шашин гэсэн гурван хэсэгт хувааж үзэж болох бөгөөд, шинжлэх ухаан, гүн ухаан нь зөвхөн буддын шашны сүсэгтнүүдэд зориулсан бус хүн бүрд хэрэгтэй, сонирхолтой байх боломжтой юм шүү гэдгийг онцлон тэмдэглэлээ.
Энэтхэг болон бусад орнууд тулгарч буй ёс суртахууны хямралыг цэрэг цагдаагийн хүчээр шийдэж чадахгүй, харин шашнаас ангид ёс зүйн үндсэн дээр тогтсон өөрөө өөрийгөө хянах чадвараар удирдан зохицуулах боломжтой бөгөөд, олон зуун жил энэхүү шашнаас ангид ёс зүйг дэмжиж ирсэн Энэтхэгийн уламжлалыг одоо дэлхий дахинд түгээн дэлгэрүүлэх цаг нь болсон гэж нэмж хэллээ.
