Энэтхэг, Одиша муж, Бхубанесвар хот - Дээрхийн гэгээн Далай лам өнөө өглөө Одиша мужийн Бхубанесвар хот руу мордохынхоо өмнө Дарамсала хотыг зорин яваа Австралийн Парламентын төлөөлөгчдийн гишүүдтэй уулзалт хийлээ.
Дээрхийн гэгээн Дели хотоос хоёр цаг орчим ая тухтай нисээд Бхубанесвар хотын Бижү Патнайк олон улсын нисэх онгоцны буудалд газардлаа. Түүнийг Одиша мужийн засгийн газрыг төлөөлж Иргэний хангамж, хэрэглэгчийн эрх ашгийг хамгаалах сайд Суряа Нараяна Патра, Соёл, аялал жуулчлалын сайд Ашок Панда, Аялал жуулчлалын яамны ерөнхий нарийн бичгийн дарга хатагтай Мона Шарма болон Аялал жуулчлалын газрын дарга Нитин Жавале нар хүлээн авлаа. Мөн Дээрхийн гэгээнийг урьсан Калингагийн Үйлдвэрлэлийн технологийн хүрээлэн (KIIT) болон Калингагийн Нийгмийн шинжлэх ухааны хүрээлэнг (KISS) үндэслэгч, профессор Ачюта Саманта, Пүнцоглин Төвөд иргэдийн суурин хариуцсан төлөөлөгч болон Лхүнбо ринбүүчи нар биечлэн угтан авсан юм.
Нисэх онгоцны буудлын гадаа Одиша мужид аж төрөн суугаа төвөд иргэд Дээрхийн гэгээнийг угтан авахаар хуран цуглаж, Дээрхийн гэгээнтэй инээмсэглэн мэндчилж, гар даллаж байв. Мөн хэвлэл мэдээллийнхэн түүний хүрэлцэн ирсэн агшныг сурвалжлахаар тал талаас нь бүчин авсан байлаа. Дээрхийн гэгээн сэтгүүлчдэд хандан, дэлхий ертөнцийг илүү амар амгалан болгоход хувь нэмэр оруулахын тулд хүмүүс өөрсдийн сөрөг сэтгэл хөдлөлөө хянах чадварт суралцах нь нэн чухал бөгөөд зайлшгүй шаардлагатай байгааг онцлон тэмдэглэв.
Одиша мужийн Ерөнхий сайд Навийн Патнайк Дээрхийн гэгээнийг өөрийн өргөөндөө хүлээн авч, тэд найрсаг дотно яриа өрнүүллээ. Уулзалтын дараа Дээрхийн гэгээн гадаа хүлээж байсан хэвлэл мэдээллийн төлөөлөгчдөд хандан товч үг хэлэхдээ, ноён Патнайкыг Энэтхэг улсдаа хамгийн удаан хугацаанд Ерөнхий сайдын албыг хашиж буй удирдагчдын нэг болохыг онцлон тэмдэглэв. Мөн тэрээр тус мужид суурьшсан төвөд иргэдэд халуун дотноор хандаж, зочломтгой зан гаргаж ирсэн мужийн төр засаг, ард иргэдэд гүн талархлаа илэрхийллээ. Ийнхүү Дээрхийн гэгээн буудаллах зочид буудалдаа хүрэлцэн ирснээр тухайн өдрийн айлчлал өндөрлөсөн юм. Маргааш Дээрхийн гэгээн Калингагийн Нийгмийн шинжлэх ухааны хүрээлэнд (KISS) зочилж, 20,000 гаруй оюутан залууст хандан сургаал айлдвараа хүргэх болно.
