АНУ, Вашингтон хот, 2011 оны 7 дугаар сарын 5-ны үдээс хойш Дээрхийн гэгээн XIV Далай лам Энэтхэг улсаас Вашингтон хотод хүрэлцэн ирэв. Нисэх буудалд түүнийг Дээрхийн гэгээний тусгай элч Касур Лоди Гяри, Америк дахь төлөөлөгч Касур Лувсаб Няндак Зайүл нараас гадна АНУ-ын төрийн департментын протоколын хэлтсийн төлөөлөгч болон Энэтхэг улсын элчин сайдын яамны төлөөлөгч ч мөн угтан хүлээн авлаа. Дүйнхорын ван айлдварыг зохион байгуулж буй “Вашингтоны төвөдийн нийгэмлэг”-ийн ерөнхийлөгч Калден Лодё Дээрхийн гэгээнийг төвөд иргэдийн нэрийн өмнөөс угтан авсан байна.
|
Зураг. Дээрхийн гэгээн XIV Далай лам Вашингтон хотод байрлах зочид буудалдаа ирэхэд төвөд иргэд түүнийг угтаж буй нь… АНУ, Вашингтон хот. 2011 оны 7 дугаар сарын 5. Гэрэл зургийг: Тэнзин Чойжор / OHHDL |
Зочид буудалд төвөд нийгэмлэгийн гишүүд уламжлалт гялшэй буюу хааны бүжиг толилуулахын зэрэгцээ залуус түүнийг угтан дуу дуулж, уламжлалт Дросо Чемар өргөв. Дээрхийн гэгээнийг АНУ-ын төвөдийн асуудал хариуцсан тусгай зохицуулагч, төрийн дэд нарийн бичгийн дарга хатагтай Мариа Отэро, төвөдийн Парламентын дарга Пэнпа Цэрэн, шинээр сонгогдсон Калон Трипа (ерөнхий сайд) доктор Лувсан Сангай, Намжил дацны хамба Тромтог ринбүүчи болон бусад ахмад төвөд лам нар угтан авчээ. Мөн төвөдийн Дээд шүүхийн комиссар асан Лувсан Даржил Пүнраб, Касур Алак Жигмэ, Касур Жецүн Пэма, төвөдийн сонгуулийн хорооны комиссар асан Дорж Дамдүл Гоншар нар хүлээн авлаа.
Дээрхийн гэгээн XIV Далай лам хатагтай Отэро нар тус өдрийн ажлаа өндөрлөхийн өмнөхөн богино уулзалт хийжээ.
Дээрхийн гэгээний 7 дугаар сарын 6-ны өдрийн хөтөлбөр нь залбиралаар эхэлж, түүний 76 насны төрсөн өдрийг тэмдэглэх ёслолоор үргэлжлэх юм.
Ирэх өдрүүдэд Дээрхийн гэгээн АНУ-ын конгрессын дарга Жон Бонер болон бусад гишүүдтэй уулзахаар Капитол Хиллд (Capitol Hill) айлчлах төлөвтэй байна.
Англи хэлнээс орчуулсан T.Ялгуун
