Аргентин улс, Буэнос Айрес хот. Дээрхийн гэгээн XIV Далай лам 2011 оны 9 дүгээр сарын 13-ны өдөр Мексик хотоос 9 цаг үргэлжилсэн нислэгийн дараа Аргентин улсын нийслэл Буэнос Айрес хотод хүрэлцэн ирлээ. Түүнийг Аргентин улсын Гадаад хэргийн яамны албан хаагчид, айлчлалыг зохион байгуулагч Кагью Тэгчин Чойлингийн профессор Хорасио Э.Араухо (Санж Дорж лам), Ринчен лам, бусад гишүүд угтан авлаа.
Дээрхийн гэгээнийг “Four Seasons” зочид буудалд ирэхэд айлчлалыг хамтран зохион байгуулагч Дунгьолинг (Друкпа Кагью) буддын төвийнхөн болон хүндэт зочид угтан мэндчилэв.
 |
Дээрхийн гэгээн XIV Далай лам хэвлэл мэдээллийн төлөөлөгчидтэй уулзаж буй нь... Аргентин улс, Буэнос Айрес хот. 2011 оны 9 дүгээр сарын 13. Гэрэл зургийг Помпи Гутниски. |
Дээрхийн гэгээн 9 дүгээр сарын 14-ний өглөө Аргентин улсын хэвлэл мэдээллийн байгууллагын төлөөлөгчидтэй 1 цагийн уулзалт хийлээ. 25 сэтгүүлч, мэдээллийн агентлагийн төлөөлөгчид тус хэвлэлийн бага хуралд оролцжээ. Уулзалтын үеэр Дээрхийн гэгээн олон найз нөхдийн урилгаар Аргентин улсад хүрэлцэн ирсэн бөгөөд айлчлалын зорилго нь үндсэн хоёр зорилгоо хэрэгжүүлэх явдал хэмээн тодотгов. “Эхнийх нь хүн төрөлхтний нийтлэг үнэт зүйлсийг дэмжин хөгжүүлэх, нөгөөх нь шашны уламжлал хооронд эв найрамдал, эв нэгдлийг бэхжүүлэх явдал” хэмээжээ.
Дээрхийн гэгээн хэвлэл мэдээллийн ажилтнуудад хандан, “Та бүхэн ч мөн энэ нийтлэг үнэт зүйлсийн ойлголтыг түгээх, нийгмийн асуудлыг шударга, үнэн зөв мэдээлэх хариуцлагатай билээ. Дэлхийн олон оронд авлигал бараг шинэ төрлийн “хорт хавдар” мэт түгээмэл болсон бөгөөд ийм буруу үйлдэлд гар бие оролцогчид үүнийгээ хэзээ ч хүлээн зөвшөөрдөггүй. Иймд нийгмийн эрх ашгийг хамгаалахын тулд хэвлэл мэдээлэл үнэн бодитоор, шударгаар илчлэх нь нэн чухал” хэмээн тайлбарлажээ.
Дараа нь бясалгал, буддын үнэт зүйлсийг өдөр тутмын амьдралд хэрхэн шингээх, буддизмыг өөр өөр соёлын орчинд хэрхэн хэрэглэх, Төвөд улсын нийгэмд ардчилал хэрхэн хөгжсөн зэрэг сэдвүүдийн талаар нэн дэлгэрэнгүй хариуллаа. Төвөдийн ардчиллын тухайд “Бага наснаасаа л төвөдийн засаг захиргаанд олон ноцтой алдаа дутагдал буйг анзаарч, 1952 оноос эхлэн засаглалыг шинэчлэх бодит алхмууд хийж ирсэн юм. Харин 1959 онд дүрвэж ирснээсээ хойш аажмаар ардчиллын тогтолцоог нэвтрүүлж, эцэст нь 2002 онд төвөдийн ард түмэн анх удаагаа гүйцэтгэх засаглалын тэргүүн Калон Трипагаа шууд ардчилсан сонгуулиар сонгодог болсон билээ”.
|
Дээрхийн гэгээн XIV Далай лам Нобелийн энх тайвны шагналт Перес Эскивельтэй уулзаж буй нь... Аргентин улс, Буэнос Айрес хот. 2011 оны 9 дүгээр сарын 13. Гэрэл зургийг Помпи Гутниски. |
“Тэр цагаас хойш 10 жилийн хугацаанд төвөдийн ард түмэн илүү их хариуцлагатай болж, улс төрийн хувьд ч илүү төлөвшжээ. Тиймээс төрийн, засаг захиргааны бүх эрх мэдлээ ард түмний сонгосон удирдагчдад бүрэн шилжүүлэх зүй ёсны цаг ирсэн юм. Зөвхөн улс төрийн эрх мэдлээ шилжүүлээд зогсохгүй би бээр хоёргүй үнэнч сэтгэлээр, тун их баяртай хөөртэйгөөр Далай ламын 400 зуун жил оршин тогтносон түр засгийн тэргүүний тогтолцоог ч төгсгөсөн билээ” хэмээв.
Хэвлэлийн бага хурлын төгсгөлд Аргентин улсын Нобелийн Энх тайвны шагналт Перес Эскивель нэгдэн оролцжээ. Хэвлэлийн бага хурал дууссаны дараа Дээрхийн гэгээн Эскивэльтэй хувийн уулзалт хийж, гэр бүлийнх нь хамт өдрийн зоог барьжээ.
Дээрхийн гэгээн Аргентин улсын конгрессын гишүүн доктор Мария Лаура Легисамон болон гэр бүлийнхэнтэй нь уулзав.
Үдээс хойш Колисео танхимд зочилж, “Залуусыг илүү сайхан ертөнц бүтээх чадвартай болгох нь” сэдвээр 2000 орчим хүнд айлдвар айлдсан бөгөөд сонсогч олны олонх нь залуучууд байлаа.
|
Дээрхийн гэгээн Далай лам Колисео танхимд айлдвар айлдаж буй нь... Аргентин улс, Буэнос Айрес хот. 2011 оны 9 дүгээр сарын 13. Гэрэл зургийг Рүтерс. |
Дээрхийн гэгээн айлтгалын үеэр “XXI зуун бол залуу үе, ялангуяа 30-аас доош насныханд хамаатай зуун билээ. XXI зууныг илүү энх тайван, тогтвортой, илүү эе эвтэй болгохын тулд үүрэг хариуцлага залуусын нуруун дээр ирж байна. Боловсрол дан ганцаараа дотоод амар амгалан, аз жаргал авчирдаггүй. Халуун дулаан энэрэл нигүүлсэл нь амар амгаланд хүрэхэд нэн чухал билээ. Нийгмийн хөгжил дэвшилд бодит хувь нэмрээ оруулахын тулд залуу хүн бүр илүү хариуцлагатай хандах ёстой юм шүү. Гаднаас ямар нэгэн “аврагч” ирж, энэ нийгмийг цэвэрлэхгүй тул хүн бүр дор бүрнээ санаачилга гаргах хэрэгтэй” хэмээн айлджээ.
Дээрхийн гэгээн цахимаар ирсэн асуултуудад болон танхимд цугласан олны асуултад хариулж, айлдвараа өндөрлөв.
