2012 оны 01 дүгээр сарын 03
Бодгаяа, Бихар муж, Энэтхэг
(Phayul.com-ийн сурвалжлагч Тэндар Цэрэнгийн мэдээ)
Энэтхэгийн Бихар мужийн Бодгаяа хотноо зохиогдож буй Дүйнхорын авшиг хүртээх ёслолын үеэр Дээрхийн гэгээн XIV Далай лам “Махатма Гандигийн нэрэмжит энх тайван, найрамдлын олон улсын шагнал”-ыг албан ёсоор гардан авлаа.
|
| His Holiness the Dalai Lama receives the Mahatma Gandhi International Award for Reconciliation and Peace from Ela Gandhi, the granddaughter Mahatma Gandhi, in Bodh Gaya, India, on January 4, 2011. Photo/Tenzin Choejor/OHHDL |
Энэхүү шагналыг Өмнөд Африкийн Дурбанд төвтэй Гандигийн Хөгжлийн Сангийн нэрийн өмнөөс Махатма Гандигийн ач охин Эла Ганди Дээрхийн гэгээнд биечлэн гардуулсан юм.
Ёслолын үеэр Эла Ганди “Дэлхийн энх тайванд Далай ламын оруулсан хувь нэмэр, хүчин чармайлтыг өндрөөр үнэлж, энэ шагналыг гардуулж байгаа нь сайхан завшаан болохыг дурдаад тус шагналыг өнгөрсөн оны аравдугаар сард Далай лам Өмнөд Африкт зочлох үеэр гардуулах байсан ч виз гарах хугацаа нь таван долоо хоногоор хүлээгдсэн учир цуцлагдсан” тухай хэлэв.
Эла Ганди цааш тодруулан: “Өмнөд Африкийн ард иргэд Дээрхийн гэгээнд энэхүү шагналыг биечлэн өгж чадаагүй нь маш харамсалтай явдал байлаа. Визийг тэгэж удаан хүлээлгэх ямар ч шаардлагагүй байсан. Гэсэн ч Дүйнхорын авшиг хүртээх энэ онцгой мөчид Дээрхийн гэгээнд хүндэтгэл үзүүлж байгаа нь аз ерөөл мэт санагдаж байна” хэмээн онцлов.
Махатма Ганди болон Далай ламын сургаал бид бүгдийг хүнлэг, даруу боловч энгийн амьдралаар амьдрах урам зориг өгдөг,” гэж тэр нэмж хэллээ.
|
| His Holiness the Dalai Lama speaking after receiving the Mahatma Gandhi Award in Bodh Gaya, India, on January 4, 2012. Photo/Getty Images |
Гандигийн баримал бүхий шагналаа гардан авсны дараа 76 настай Далай лам дэлхий дахинд хүчирхийлэл бус энэрэл, энх тайвны үнэт зарчмыг ойлгох хүмүүсийн тоо нэмэгдэж байгааг дурдаад “Махатма Ганди бидний дунд үгүй ч, түүний хүчирхийллийн эсрэг философи өнөөдөр ч бидний сэтгэлд оршсоор байна” хэмээв.
Тэрээр Махатма Гандийг “Эртний Энэтхэгийн ахимса буюу хүч үл хэрэглэх энх тайвны үзлийг орчин үеийн боловсролоор дахин сэргээсэн гавьяатай хүн” хэмээн магтаж, үүнийг амьдралынхаа туршид сахин хамгаалах итгэл үнэмшлээ илэрхийллээ.
Мөн Дээрхийн гэгээн шавь нартаа хандаж дэлхий даяар хайр, энэрэл нигүүлсэл, энх тайвныг түгээн дэлгэрүүлэх үйл хэрэгт сэтгэл зүрхээрээ дэмжлэг үзүүлэхийг уриалав.
“Жинхэнэ хүч үл хэрэглэх гэдэг нь зөвхөн гадна талын зөрчлийг зогсоох бус, харин дотоод сэтгэлийн гүнд орших уур хилэн, шунал, атаархлыг дарж, сэтгэлээ зэвсэггүй болгох үед л төрнө. Зөвхөн дотоод сэтгэл амгалан байж гэмээнэ гадаад ертөнцөд энх тайван тогтоно” гэж тэр айлдлаа.
“Дэлхий дахинд үүсэж буй олон асуудал шунал, мунхагийн сэтгэлээс үүдэлтэй. Хүн оюун ухаанаа ашиглан сөрөг сэтгэл хөдлөлийг эерэг бодлоор даван туулах нь хүчирхийллийг зогсоох цорын ганц зам юм” хэмээн Нобелийн Энх тайвны шагналт Төвдийн удирдагч онцлон тэмдэглэв.
Өмнө нь энэхүү “Махатма Гандийн Энх эв нэгдлийн олон улсын шагнал”-ыг Бүрмийн ардчиллын удирдагч Аун Сан Су Чи, Өмнөд Африкийн ерөнхийлөгч асан Нельсон Мандела, Танзанийн удирдагч Жулиус Ньерере зэрэг эрхмүүд хүртэж байжээ.
