Ванкувер, Канад — 2006 оны 9-р сарын 11
(Даг Уорд / Vancouver Sun)
“Аз жаргалыг бий болгож, дотоод амар амгаланг олох” тухай Оюун санааны удирдагчийн айлдварыг сонсохоор мянга мянган хүмүүс GM Place-ийг дүүргэн цугларчээ.
Төвөдийн Шангри-Лагийн тунгалаг номын ухаан Ванкүүверийг сүүлийн хэдэн өдрүүдэд эзэмдэв. 14-р Дээрхийн гэгээн Далай лам Тэнзин Гяцо айлчлалын үеэр өөрийг нь тойрон хүрээлсэн олон мянган бишрэгчдэд ‘би бол энгийн нэгэн бурханы шашинтай лам’ хэмээн байн байн сануулж байлаа.
Түүний айлдварууд энгийн бөгөөд гүн гүнзгий агуулгатай ба энэрэл нигүүлсэл, нинжин сэтгэлийн сургаалууд нь түүний өмсгөл адил даруухан бөгөөд шулуун, ийм энгийн байдал олон хүний сэтгэлийг татаж буй нь илт байлаа. Далай лам Британийн Колумбид одоо ч оюун санааны “супер од” хэвээр.
Материализм, дайн самуунаар дүүрсэн энэ дэлхийд амар амгалан, ёс суртахууны зөв чиглэлийг эрэлхийлэгчдийн хувьд түүний даруу, шүүмжлэлгүй, уужуу дүр төрх онцгой нийцдэг билээ.
2004 онд Vancouver Sun-ы хийсэн судалгаагаар, Британийн Колумбичүүдийн дунд Далай лам хамгийн их хүндлэгдсэн оюун санааны удирдагч байсан ба өнгөрсөн долоо хоногт ч энэ байр суурь огт буураагүй харагдана.
Хүний эрх, үл хүчирхийлэл, өгөөмөр сэтгэлийг хослуулсан түүний “поп бурханы шашин” өнгөрсөн он жилүүдийн адил олон хүний бишрэлийг төрүүлсээр.
Бямба гарагт 13,500 хүн 20–60 доллар төлөн GM Place-д цугларч, “аз жаргалыг бий болгох нь” тухай айлдварыг сонслоо. Тэнд цугларсан олон түүнд Канадын хүндэт иргэн болгосон баримт бичгийг Цагаачлалын сайд Монте Солберг гардуулахад халуун алга ташилтаар хүндэтгэл үзүүлэв.
Энэхүү шагнал нь Төвөдийн хүний эрхийн төлөөх тэмцлийн бэлгэдэл, түүний улс төрийн ач холбогдлыг хүндэтгэсэн хэрэг байлаа. Сольберг түүнд ‘хүний нэр төр, эрхэм чанарын тэргүүн эгнээнд зогсогч’ хэмээн өргөмжлөн хэлэв.
Канадын төрийн ордны шийдвэр Хятадыг хилэгнүүлсэн нь тодорхой. Төвөдийг захирч буй Хятад, Далай ламыг эртнээс шүүмжилж ирсэн билээ.
Канад улс өмнө нь хоёрхон хүнд л хүндэт иргэний цолоо өгсөн нь Өмнөд Африкийн Ерөнхийлөгч асан Нельсон Мандела, мөн Холокостын үеэр олон еврейчүүдийг аварсан Шведийн дипломат Рауль Валленберг нар юм.
Гэхдээ, олон хүний хувьд дотоод амар амгаланд хүрэх тухай Далай ламын сургаал хамгийн хүчтэй сорон татжээ. Түүний зарим үгс өөрийн эрхгүй тунгаан бодоход хүргэж, томоохон өөртөө туслах семинарыг санагдуулам байв.
Далай лам “Бусдыг бодвол өөрийн зовлон өчүүхэн; зөвхөн өөрийгөө бодвол өчүүхэн зүйл ч дааж давшгүй мэт санагдана.” хэмээн айлдлаа.
Элдэв нарийн тайлбаргүй, энгийн зөвлөгөөнүүд нь зарим нэгэн шүүмжлэгчдэд Being There киноны телевизийн богино санаануудыг гүн ухаан мэт өгүүлж явдаг Чонси Гардинерийг санагдуулж мэднэ.
Гэвч GM Place-ийн үзэгчдийн дунд тийм хүн бараг байсангүй.
Викториягаас зорин ирсэн ахлах сургуулийн багш Жоди Вүүд, 32 настай тэрээр: “Далай ламыг нэг амьдралдаа хэд ч удаа харсан ханахгүй. Тэр бол айлддаг айлдвараа зөвхөн үгээр бус үйлдэлээрээ харуулж, хайр энэрэл, дулаан цацаруулдаг” гэж хэлэв. “Хэдийгээр хоёр жилийн өмнө сонсож байсан айлдвар нэг их өөрчлөгдөөгүй ч бид үнэхээр өөрчлөлт авчирч чадна гэдэгт итгэл төрүүлдэг, тайвшруулдаг, бататгадаг. ” хэмээн нэмэн хэллээ.
Харин Сьюзан Жонс, 55 настай багш, айлдвар дууссаны дараа CD худалдан авахаар дугаарлаж зогсоно: “Би Далай ламыг үнэхээр их хүндэлдэг. Тэр олон хүнд хүрдэг, надад ч бас хүрч чаддаг, дэлхийн бүх хүмүүст илүү аз жаргалтай, илүү чин сэтгэлтэй амьдрахад тус болох зүйлийг тэр ярьж байна. Өдөр тутмын мэдээнээс сонсох таагүй зүйлс, эсвэл Жорж Бушийн үзэл бодлоос өөр, илүү сонсогдох ёстой өнцгийг бидэнд авчирч өгдөг нь үнэхээр сайхан.” хэмээн Ванкувер хотын багш Жоунс хэлэв.
Порт Мүдигээс ирсэн 40 настай оффисын ажилтан Чарлин Томпсон харин: “Тэр бол гайхамшиг. Хүн байхын үлгэр жишээ, тэр бол Бурхан” хэмээн бахдан өгүүлэв.
‘Эрх чөлөөт Төвөд’ гэсэн бичигтэй цамц өмссөн Жозеф Чарумски, 44 настай: “Би өөрийн аз жаргалыг хайж энд ирсэн. Энгийн байх нь сайн зүйлийн эхлэл юм байна.” хэмээн тэрээр хэллээ.
