АНУ, Сан Франциско 2006 оны 4 дүгээр сарын 16. (Луис Сахуган, Л.А. Таймс сонин)
Бямба гарагт исламын шашны нэр хүндтэй зүтгэлтнүүд дэлхийн хамгийн нэр нөлөөт буддын шашны тэргүүн Дээрхийн гэгээн Далай ламтай анх удаа уулзаж, исламын нийгмийн дунд дэлгэрээд буй туйлширсан үзэл санааг намжаах, барууны ертөнцөд унаж буй шашны нэр хүндээ сайжруулахад нь туслалцаа үзүүлэхийг хүсжээ.
Энэхүү уулзалт нь экстремизмийн аюул, барууны орнуудад терроризмтой холбоотой исламын шашны тухай улам бүр нэмэгдэж буй сөрөг хандлагын талаар исламын шашны дундыг баримтлагч удирдагчид, эрдэмтэд гүнээ түгшиж буйг илтгэв. Үнэндээ исламын шашин уламжлалаараа буддизмыг хүлээн зөвшөөрдөггүй.
Далай ламд урилга илгээсэн Марин мужийн Имам Мехди Хорасани, "Энэ хурлын гол зорилго нь хайр энэрлээс өөрийг ярьж, бусад зүйлд хөрөнгө оруулах боломжгүйг бүгдэд ойлгуулах явдал юм" хэмээжээ. “Энэ үйлсэд Дээрхийн гэгээн өөрийн хүчээ зориулах шийдвэр гаргасанд бид баярлаж, талархаж байна”.
Шаргал өнгийн хувцас дээрээ хүрэн улаан орхимж нөмөрсөн Дээрхийн гэгээн Далай лам 600 орчим хүний өмнө тайван, баясгалантай харагдаж байсан нь дэлхийн энх тайвны төлөөх хамгийн тууштай тэмцэгчдийн нэгэн гэдгээ дахин илтгэлээ.
ИнтерКонтинентал Марк Хопкинс зочид буудлын тайзны төвд байруулсан түшлэгтэй сандал дээр лянхуа суудлаар сууж буй Далай лам, “Зарим хүн исламын шашныг түрэмгий гэж ойлгодог. Би үүнийг туйлын буруу хэмээн боддог. Ислам бол дэлхийн аугаа шашнуудын нэг бөгөөд хүмүүст хүргэх гол санаа нь хайр энэрэл юм” хэмээв. Тэрбээр өөрийн төрөлх нутаг Төвөдийг жишээ болгон дурдаж, буддист, мусульманчууд зуун зууны туршид энх тайван оршин, зэрэгцэн амьдарч ирснийг тэмдэглэв.
Нобелийн Энх тайвны шагналтан, Төвөдийн бурхны шашны тэргүүн өмнөхөн өгсөн нэгэн ярилцлагадаа “Исламын жинхэнэ сургаал, муслим ертөнцийн талаарх зөв сэтгэгдэл түгээн дэлгэрүүлэх нь нэн чухал” хэмээн өгүүлсэн билээ.
Орчуулсан: Н.Долгар
