Энэтхэг, УТ, Ладак, Занскар, Падум - Дээрхийн Гэгээнтэн Далай Лам өнөөдөр өглөө Занскар хотод өргөөнөөсөө айлдварын асар руу алхахын өмнө Каргил дүүргийн удирдлагын төлөөлөгчидтэй уулзав.
"Занскар, Ладакын ард олон надад сүсэглэж, итгэл тавьдаг учраас би та бүгдэд туслахын тулд чадах бүхнээ хийх үүрэгтэй. Үүний тулд номын айлдвар айлдах нь та нарт туслах хамгийн сайн арга юм. Гэхдээ сургаал сонсох нь амьдралдаа хэрэгжүүлэхийг хичээсэн тохиолдолд л ач тустай. Үүнийг би амьдралынхаа туршид эрхэмлэж ирсэн юм. Амьдралдаа хэрэгжүүлэх хамгийн гол сургаал нь сайхан сэтгэлийг төлөвшүүлж, сэтгэлийн амар амгаланд хүрэх явдал юм шүү.”
Дээрхийн Гэгээнтэн энд хүрэлцэн ирсэн хүмүүст бодьсадвын санваар хүртээж, сайхан сэтгэл, бодь сэтгэлийг хоосон чанарыг ойлголттой хослуулсан нарийн увидсыг хүртээлээ. Тэрбээр буддын сургаалыг учир шалтгааны үүднээс судалж, сайн ойлголттой болохын чухлыг онцлов.
Дээрхийн Гэгээнтэн Далай Лам өнөөдрийн айлдварт зөвхөн хүн төдийгүй нүдэнд үл үзэгдэгч амьтад, нутгийн лус савдагууд, тэр бүү хэл хор хөнөөлтэй гэж үздэг нүдэнд үл үзэгдэгч амьтад цуглан ирсэн гэдгийг тодрууллаа. Энэ үеэр Дээрхийн Гэгээнтэн Далай Лам тэдгээр нүдэнд үл үзэгдэгч амьтдад бодь сэтгэл, хоосон чанарыг ухаарах тал дээр анхаарч, хүмүүст эелдэг хандаж, тэдэнд хор хөнөөл учруулахгүй байхыг уриалав.
Дээрхийн Гэгээнтэн буддизм нь арьс өнгө, нийгмийн гарал, шашин шүтлэг, хүйсээр ялгаварлан гадуурхахыг хүлээн зөвшөөрдөггүй гэдгийг онцлон айлдлаа. Тэрбээр бурхан болж гэгээрэх боломжийн хувьд бид бүгд тэгш эрхтэй гэв. Хүн төрөлхтний хувьд бид сайхан сэтгэлийг төрүүлэх, үүн дээр нэмээд бусдаас хамааран оршдог, өөрийн мөн чанараасаа бүтээгүй гэх хоосон чанарын ойлголтыг зайлшгүй хөгжүүлэх шаардлагатай гэдгийг тайлбарлан айлдлаа.
Дээрхийн Гэгээнтэн товч айлдварынхаа төгсгөлд цугласан олонд өөрийн заасны дагуу дадлага хийхийг уриаллаа. Мөн тэрээр Занскарт эргэн ирсэндээ маш их баяртай байгаагаа дурдав. Төгсгөлд нь түүний гол зөвлөгөө бол сайхан сэтгэлтэй байх, бусдад тустай байх явдал юм гэдгийг давтан айлдсан юм.
Номын айлдварын төгсгөлд Жүдод тарнийн дацангийн хамба лам Гэвш Лувсан Кэдүв Каргил дүүргийн Занскар буддын шашны нийгэмлэг болон Бүх Занскарын хийдүүдийн нийгэмлэгийг төлөөлөн Дээрхийн Гэгээнтэн Далай Ламд зориулан товч залбирал уншив. Залбирлуудын дунд Арван зургаан архадын соёрхол, Дээрхийн Гэгээнтний ёнзин багш нарын зохиосон өлмий бататгах залбирлууд багтсан байлаа.
