Миний 82 насны ойн баярыг тохиолдуулан дэлхийн өнцөг булан бүрээс чин сэтгэлийн мэндчилгээ илгээж, энэ өдрийг хамтдаа тэмдэглэсэн бүх хүмүүст талархал илэрхийлье.
Та бүхний мэдэж байгаачлан миний бие гурван үндсэн үүрэг амлалтыг биелүүлэхийг зорьж байна. Үүнд: илүү энэрэнгүй дэлхий ертөнцийг бүтээхэд хувь нэмрээ оруулах, шашин хоорондын эв нэгдлийг дэмжиж, түүний төлөө ажиллах, мөн энх тайванч, хүчирхийллийг үл хэрэгсэгч соёлтой Төвөдийн Буддын шашны соёлыг хадгалан үлдээх, үүний сацуу Төвөдийн унаган байгалийг хамгаалах зайлшгүй шаардлага тулгарч байгаад дэлхий нийтийн анхаарлыг хандуулах явдал юм. Төвөдийн өндөрлөг нь Азийн томоохон гол мөрнүүдийн эх ундарга тул тэрбум гаруй хүний усны хэрэглээ тэдгээр гол мөрнөөс шууд хамааралтай амьдарч байна.
Төвөдийн Буддын шашны соёл нь зөвхөн сударт бичсэн мэдлэг ухаанд дулдуйдахаас илүүтэйгээр учир шалтгаан болоод шинжлэх оюунд тулгуурлахыг чухалчилдаг Энэтхэгийн түүхт Наландрын их сургуулийн уламжлалаас эхтэй юм. Шинжлэх ухаанд эмпирик туршилт судалгаанд суурилсан үзэл санааг баримталдаг шиг Бурханы шашинд сэтгэл болон сэтгэл хөдлөлийн үйл ажиллагааны талаар гүн гүнзгий судлан шинжилж тогтоосон мэдлэг ухаан өдгөө нэн чухал ач холбогдолтой хэвээр байна.
Бурханы шашны энэхүү мэдлэг ухааныг би бээр дагаж мөрддөг бөгөөд намайг хүндэтгэн хайрладаг ах, эгч, дүүсээ эдгээр сургаал, эрдэм ухааныг миний хамт сахин биелүүлэхэд нэгдэхийг би байнга уриалдаг билээ.
Товчхондоо, бусдад тусалж чадах үедээ тусалж, хэрэв ямар нэг шалтгаанаар тусалж чадахгүй бол ядаж хэн нэгэнд хор хөнөөл учруулахгүй байхыг би та бүхнээс хүсэж байна.
Сайн сайхан бүхнийг ерөөн залбиръя.
Далай лам
Ладакын Лех хот, 2017 оны 7-р сарын 9
