АНУ, Нью-Йорк — Дээрхийн гэгээн Далай ламыг АНУ-д хоёр сарын турш эмчилгээ хийлгээд Энэтхэг рүү буцаж морилохоор бэлтгэж байх үед Хойд Америкийн Төвөдийн нийгэмлэг, тус нийгэмлэгийг дэмжигч америк иргэд Далай багшдаа эсэн энх, өлмий бат оршил өргөх ёслол зохион байгуулав. ЮүБиЭс Аренад болсон эл ёслолд 17,000 хүн оролцжээ.
Бат оршил өргөх ёслолын тайзны голд Бурхан багш, Жанрайсиг, Цагаан Дарь эх зэрэг бурхдын дүрийг залсан байв. Урд эгнээнд одоогийн болон өмнөх хамба лам нар, араар нь бусад лам хуврагууд сууцгаажээ. Танхимд үндэсний хувцас, гоёлтой төвөд бүжигчид угтах авах бүжиг бүжиглэн дуу дуулж байлаа. Дээрхийн гэгээнийг сэнтийд залрахаар тайз руу морилоход хуврагууд бүрээ, бишгүүр үлээн дагалдлаа.
Төвөдийн нийгэмлэгийн төлөөлөгч доктор Намжал Чойдүв Дээрхийн гэгээн Далай ламд хандан хэлсэн үгэндээ "Энд цугласан бүх хүн таныг ийн морилон ирсэнд баярлаж байгаа нь дамжиггүй. Мөн танд зориулж бат оршил өргөх завшаан тохиосонд талархаж буй юм" гээд Дээрхийн гэгээнийг эмчилж сувилсан эмнэлгийн хамт олонд, түүний дагалдан явсан хүмүүст тусалж дэмжсэн бүх хүнд талархал илэрхийлэв.
Танхимд цугласан 400 төвөд хүүхэд Дээрхийн гэгээн Далай ламд урт наслахыг ерөөсөн дуу дуулж өглөө. Дараа нь хуврагууд мандал өргөв.
Дээрхийн Гэгээнтэн цугласан олон хандан: Дээрхийн гэгээн цугласан олонд хандан "Өнөөдөр энэ танхимд Төвөд орны гурван бүс нутаг тус бүрээс гаралтай хүмүүс цугласан байгаа нь биднийг ямар сайхан эв найртай гэдгийг илтгэн харуулж байна. Манай Төвөдийн соёл нийт хүн төрөлхтөнд үр өгөөжтэй байх боломжтой. Шагжамуни Бурхан багш гэгээрлийн хутагт хүрээд өнөөгийн Төвөд орон, Хималайн бүс нутагт дэлгэрсэн ном сургаалыг айлдсан билээ. Асар гүн гүнзгий агаад үнэ цэнтэй эл сургаалыг би багаасаа судалсан.
"Төвөдүүд бид Бурхан багшийн айлдсан сургаал номын галыг бөхөөхгүй байхыг ихэд хичээн чармайх хэмжээнд хүртэл энэ сургаал бидний ахуй амьдралын хэв маягт нөлөөлсөн байна. Нас сүүдрийн тухайд би 100 гаруй наслахыг зорьж буйн дээр Төвөдийн ард түмний тусыг бүтээхийн төлөө чадах бүхнээ хийсээр байх болно.
Төвөдийн соёлыг Хятадын коммунистууд үл хэрэгсдэг байж болох ч үнэлдэг анд нөхөд бидэнд дэлхий даяар олон бий. Төвөд бол буддын сургаал номыг хамгийн бүрэн бүтэн хадгалж ирсэн улс. Иймд төвөд үндэстнүүд дэлхий даяар тархан суурьшихын хэрээр бусад орны хүмүүс манай уламжлалын тухай илүү их мэддэг болсон билээ. Биднийг дэмжиж ирсэн олон олон үнэнч анд нөхдөдөө талархлаа илэрхийлье. Дэлхий дахинаа буддын шашныг сонирхож байна. Хятадад ч мөн Төвөдийн буддын шашныг сонирхон судлах хүсэлтэй олон хүн бий" хэмээн айлдлаа.
Дээрхийн гэгээн Далай лам “Өнөөдөр би бодь сэтгэлийг үүсгэх тухай товч тайлбарлаж өгье. Энэ нь энгийн боловч хүчтэй. Бодь сэтгэлийг бясалгаснаар бид өөрийн болон бусдын тусыг бүтээж чадна. Үндсэндээ хамаг амьтны тусын тулд бурхан болохыг хүсэж, тэмүүлэхийг бодь сэтгэл гэнэ” хэмээн айлдлаа.
Дараа нь тэрбээр цугласан олны хамт Гурван эрдэнэд аврал одуулах, бодь сэтгэлийг үүсгэх залбирлыг гурван удаа уншлаа. Мөн Дээрхийн гэгээн өөрөө олон төрөлдөө бурхны сургаалыг дагаж, хамаг амьтанд туслахын тулд бурхан болохыг хүсэх бодь сэтгэлийг дадуулж ирсэн гэдгээ хэлж, хуран чуулсан олныг ч мөн ийм амлалт өгөхийг уриалсан юм.
"Чингэж чадвал бид энэ сайн үйлд даган баясах болно" гэлээ.
Дээрхийн Гэгээнтэн Бурхан Багш, Дарь Эх, Жанрайсиг, Манзушри, Дамдин Янсан, Манал болон Ловон Бадамажунайн тарнийн аман дамжлагыг хүртээн цугласан олныг тэргүүлэн тарни тус бүрийг уншлаа.
Дараа нь Дээрхийн гэгээн Будда багш, Ногоон Дарь эх, Жанрайсиг, Манзушир, Хаянхярваа, Манал, Ловон Бадамжунай бурхны зүрхэн тарнийн лүн хайрлав. Эхлээд дээрх бурхдын тарнийг өөрөө уншаад, дараа нь цугласан олноор давтан хэлүүллээ.
Цааш нь "Дэлхий дээр олон шашны уламжлал байдаг агаад би тэдгээрийг бүгдийг нь хүндэлдэг. Гэхдээ буддын шашин учир шалтгаан, логикт суурилсан байдаг тул эрдэмтдийн сонирхлыг татдаг юм. Тэрчлэн буддын шашин даян дэлхийд энх тайвныг тогтооход хувь нэмэр оруулах асар их чадамж бүхий юм.
Та нар бүгд буддын шашиндаа үнэнч байж, шашин, соёлоо бүрэн бүтнээр нь уламжлан хадгалахын төлөө сайн ажилласан билээ. Цаашдаа ч энэчлэн хичээж, баяр баясгалантайгаар залбирлаа үйлдээрэй” хэмээн айлдав.
Дараа нь лам хуврагууд Дээрхийн гэгээний өлмий бататгах залбирал уншиж, өлзийт тахил өргөл хийгээд мандал өргөснөөр өнөөдрийн ёслол өндөрлөв.
Төвөдийн нийгэмлэгийн төлөөлөгч доктор Намжал Чойдүв тайзнаа дахин гарч, Дээрхийн гэгээний өвдөгний үе солих мэс заслыг амжилттай зохион байгуулсан эмнэлгийг хамт олон, гэртээ хүлээн авч сувилан тэнхрүүлсэн Наппигийн гэр бүлд онцгойлон талархал илэрхийлэв. Кэрол, Сэм нарыг сэнтийд дөхөн ирэхэд Дээрхийн гэгээн талархлаа илэрхийллээ. Ийн талархлаа илэрхийлэх үед танхимд цугласан олон алга нижигнүүллээ.
Хөтлөгч Гунгаа Даш өнөөдрийн өлмий бататгах ёслолын зохион байгуулж, хувь нэмэр оруулсан бүх хүнд талархал илэрхийлэв. Дараа нь Төвөдийн үндэсний дуурь толилуулав. Үүний дараа хуврагууд зориулга ерөөл талбих залбирал уншиж, ёслолыг өндөрлөв. Дээрхийн гэгээн тайзны урд захад дөхөж ирээд, цугласан олны зүг инээмсэглэн гараа даллан мэндлэхэд тэд ч мөн цагаан хадгаа дэлгэн хариу хүндэтгэлээ илэрхийллээ.
Орчуулсан Б.Ганчимэг
