Сиэтл хот, Вашингтон муж, АНУ, 2008 оны 4-р сарын 15 (Женнифер Лэнгстоны нийтлэл, Seattle Post Intelligencer) - Далай лам Сиэтл хотод айлчилж эхэлснээс хойш Молли Холлиман (16 настай) алдсан боломжуудынхаа талаар эргэцүүлэн бодсон. Тэр хүнсний дэлгүүрийн дараалалд оочерлож байхдаа урдаа оруулж болох байсан ч, тэгээгүй. Замын хөдөлгөөнд түүний машины урдуур дайрсан хүн бухимдсанаа бодсон. Хүнсний банкинд сайн дураар ажиллах, гудамж цэцэрлэг цэвэрлэх зэрэг тогтмол сайн дурын ажил хийдэг Холлиман "Өөрийгөө өөрчилж чадах жижиг зүйлс хүмүүсийг аз жаргалтай болгодог" гэж хэлэв.
Таван өдрийн турш энэрэн нигүүлсэхүйд анхаарлаа хандуулснаар хувь хүмүүсийн амьдралд болон нийгэм хамт олонд удаан хугацааны нөлөө үзүүлэх эсэхийг харах л үлдлээ. Хүмүүс завгүй тул, тэдний урам сэдэл бүдгэрч, сонголт шийдвэр сулардаг. Мягмар гарагт болсон арга хэмжээн дээр зорилгодоо хүрч чадахгүй бүтэлгүйдвэл хэрхэн давж гарах вэ гэсэн асуултад хамба Десмонд Туту “Дахин оролдоод үз” гэж зөвлөв.
Энэрэл нигүүлслийн үр арга хэмжээнд оролцсон олон хүмүүс тэд өөрсдийгөө бодит өөрчлөлт хийх чадвартай гэж хэлцгээсэн. Далай ламын айлдварыг сонсохоор 6 сартай Юли охиноо авчирсан Михал Инспектор “эх хүний элбэрэл болон хүүхдээ хайрлаж өсгөх ач холбогдлын талаар Далай ламын хэлсэн үгийг дэмжиж буйгаа илэрхийлсэн. Израйль гаралтэй тэрбээр Дээрхийн гэгээн асуулт бүрийг нухацтай түр бодож хариулж байгаад сэтгэл нь хөдөлсөн гэв. Михал “Асуултад хариулахдаа бодож хариулах нь америк хэв маяг биш. Би үүнийг өөртөө болон Юли охиндоо зааж сургах болно” гэж хэлэв.
Олон жилийн турш йогоор хичээллэсэн сайн дурын ажилтан, 23 настай Жесси Бурмейстер “Далай лам ерөнхийдөө оюун санааны баялаг амьдралаар амьдардаг. Гэвч түүний анхаахал дотоод сэтгэлээ шинжихэд чиглэдэг. .. Хэрхэн аз жаргалтай болохыг ойлгож мэдэх нь бусдыг аж жаргалтай болгоход туслах чухал алхам” гэж тэр хэлсэн ч, тэр өөрөө энэ талаар хангалттай зүйл хийсэн эсэхийг эргэцүүлж байгаа аж. "Миний амьдрал нэлээд бие даасан шинжтэй бөгөөд би өөртөө болон хаана байхыг хүсч байгаа газартаа илүү анхаарч ирсэн. Ийм арга хэмжээнд ирэх нь намайг хэтэрхий их өөрийнхөө талаар боддог байж магадгүй гэж бодоход хүргэж байнаг" гэж тэр хэлэв.
Өнгөрсөн амралтын өдрүүдэд Далай ламын айлдвар зарим бүлгүүдэд хүрч сонордсон ажээ. Беллвью хотоос ирсэн Таня Маурер нь Ардчилсан намын бүлгийн хурал дээр нухацтай харцтай улс төрчид хүртэл энх тайван, энэрэн нигүүлсэхүйн тухай ярьж байхыг сонссон гэж хэлэв. Тэрбээр “Далай ламын айлдвар хүмүүст нөлөөлж байна. Хэр удаан үргэлжлэн хүрэхийг би мэдэхгүй. Олон хүмүүс итгэл, үнэмшлээ шинэчилснээр дэлхий илүү сайхан болохыг би харж магадгүй” гэв.
Мерсер арлын 17 настай Элиана Беленки Далай лам уураа барихын тулд өөрийн өмнө мэдэрсэн эерэг сэтгэл хөдлөлд анхаарлаа төвлөрлүүлэхийг зөвлөсөн зөвлөгөө түүнд таалагдсаныг дурдав. Тэрбээр “өсвөр насны хүүхдүүд эцэг эх, ах эгчтэйгээ ам зарах амархан байдаг. Заримдаа би уурладаг. Тэр үедээ би тэдэнд жинхэнээсээ уурласан уу эсвэл би өөрийн сэтгэл хөдлөлөө тэдэнд гаргаад байна уу? гэдгийг нэг минут бодож тунгаах хэрэгтэй гэв.
Баллард дахь Гайагийн сүмд дарь эхийн залбирал мөргөлд оролцдог Беленки “сүнслэг нөлөө бүхий илтгэлүүд нь өөрчлөлт авчрахад үнэхээр нөлөөлж чадна. Мартин Лютер Кингийг хар л даа” гэв. Цааш нь "Хүн бүр “Би дэлхийг аврахыг хүсч байна. Би бүх мөнгөөрөө Африкийн ядуу хүмүүст хоол хүнс авч өгнө гэж хэлж чадахгүй байх. Гэхдээ л би үнэхээр ямар нэг зүйл хийж чадна гэж хэлэх цөөн ч гэсэн хүмүүс байгаа. Цөөн ч гэсэн байхгүйгээс дээр шүү дээ" гэж тэр хэлсэн юм.
