Энэтхэг, Бихар муж, Патна хот. 2010 оны 2 сарын 8 (Файзан Ахмад, Таймс оф Индиа) - Далай лам энэ оны 5 дугаар сарын 27-нд энд Будда Смрити буюу Бурхан багшийн дурсгалын цэцэрлэгт хүрээлэнг нээхийг зөвшөөрсөн байна. Энэ өдөр нь Бурхан багшийн их дүйчэн хэмээх өлзийтэй сайн өдөр юм.
Даваа гарагт Бихарын тэргүүн сайд Нитиш Кумар Химачал Прадеш мужийн Дарамсала хотоос 15 километрийн зайтай Маклеодганжид орших Төвөдийн хилийн чанад дахь засгийн газрын төв байранд түүнд бараалхах үед Төвөдийн оюун санааны удирдагч зөвшөөрлөө өгсөн байна.
Зураг. Дээрхийн гэгээн Далай лам Бихарын тэргүүн сайд Нитиш Кумарын хамт Дарамсалад. 2010 оны 2 сарын 8. Зургийг Тэнзин Чойжор.
Нитиш 74 настай 14-р Далай ламтай нэг цагийн турш уулзаж ярилцах үеэрээ түүнийг цэцэрлэгт хүрээлэнг нээхийг урьжээ. Бясалгалын танхим бүхий уг цэцэрлэгт хүрээлэнг хотын төвд, Патна зөрлөгийн ойролцоох 22 акр газарт 1 тэрбум 250 сая рупийн өртгөөр барьж байгаа бөгөөд тэнд мөн Бурхан багшийн аварга том сэрэг дүр байх юм.
"Дээрхийн гэгээн бидний урилгыг хүлээн авсанд мөн сонирхол татах үзмэр болох Бурхан багшийн шүтээн эрдэнийг цэцэрлэгт хүрээлэнд хандивлахаар амласанд талархаж байна" гэж Шинэ Делигээр дамжин Патна руу буцах замдаа Нитиш Таймс оф Индиад ярилаа.
Тус мужийн засгийн газар Бурхан багшийн их нирваанд орсны 2550 жилийн ойг тохиолдуулан буддын барилгын хэв маяг бүхий энэхүү дурсгалын цэцэрлэгт хүрээлэнг байгуулж байгаа аж. Далай лам мөн Бурхан багшийн сэрэг дүрийг нээх юм байна.
Нитиш мөн Төвөдийн төрийн тэргүүнд шинээр байгуулахаар төлөвлөж буй Наланда Олон Улсын Их Сургуулийн талаар товч мэдээлэл өгсөн хэмээн мэдэгдлээ.
Нобелийн энх тайвны шагналтан Өмнөд Азийн олон орнууд хамтран байгуулахаар ажиллаж байгаа уг их сургууль болон Бихар дахь Бурхан багшийн холбогдолтой дурсгалт газруудыг хэрхэн хөгжүүлж буй талаар нилээд сонирхжээ. Дэлхий даяар алдартай Далай лам өнгөрсөн сард Бодгаяад таван өдрийн турш номын айлдвар айлдсан юм.
Ням гарагт Дарамсалад очсон тэргүүн сайд мөн оройдоо Төвөдийн хилийн чанад дахь засгийн газрын Ерөнхий сайд Самдон ринбүүчийн түүнд зориулан зохион байгуулсан хүндэтгэлийн оройн зоогт оролцжээ. Тэрбээр мөн Кангрa дахь Чамунда Деви Шактипийт болон Бражешвари Деви сүмд зочилсон байна.
Дээрхийн гэгээн Далай лам Төвөдийн цагаан сарын шашны ёслолд оролцлоо
