АНУ, Флорида муж, Майами хот., 2010 оны 2 сарын 23 (Жавид Калим, Майами Херальд) - Ерөнхийлөгч Барак Обаматай олны анхаарлын төвд уулзсанаасаа хойш хэдхэн хоногийн дараа Дээрхийн гэгээн 14-р Далай лам Мягмар гарагт Дэви хот дахь Нова Зүүн Өмнөдийн Их Сургуульд цугласан мянга мянган дэмжигчиддээ хандан илтгэл тавилаа. Уг арга хэмжээний тасалбар бүрэн зарагдаж дууссан байна.
Таних тэмдэг болсон улаан хүрэн, шар өнгийн дээлтэйгээ тайзан дээрх сандал дээр завилан суусан Төвөдийн буддын шашны оюун санааны хүндэт удирдагч "Дэлхийн хамтын нийгэмлэгт энэрэн нигүүлсэхүйн нөлөө" сэдвээр нэг цаг үргэлжилсэн илтгэлдээ дэлхий даяарх хүний эрх, дайн, Төвөд, эдийн засаг зэрэг олон сэдвийг хөндлөө.
Тэрбээр Америкийн Нэгдсэн Улсын "хувь хүний эрх, эрх чөлөө, нээлттэй байдлыг” магтан сайшааж, "энэ гариг дээр төрсөн даруйдаа бид бүгдээрээ, бүх хүн тэгш эрхтэй байдаг" гэдэг утгаараа дэлхий даяараа "үндсэндээ нэг мөн чанартай" болохыг онцлон тэмдэглэв.
Өнөөдөр дэлхий дээрх олон асуудлууд "үндсэндээ бол бидний бүтээл. Гэтэл хэн ч энэ тухай ярихыг хүсдэггүй. Хувиа хичээх хандлага хэтэрхий их байна" гэж тэрбээр хэллээ.
Зураг. Дээрхийн гэгээн Далай лам Нова Зүүн Өмнөдийн Их Сургуульд хэвлэлийнхэнд хандан үг хэлж байна. 2010 оны 2 сарын 23.
Далай лам Хятадын албаны хүмүүс уг уулзалт АНУ, Хятадын харилцаанд “ноцтой хохирол” учруулах болно хэмээн хатуу анхааруулсныг үл харгалзан Пүрэв гарагт Цагаан ордонд өөртэй нь уулзсан Обамаг магтан сайшааж, ерөнхийлөгчийн сонгуулийн кампанит ажил болон ерөнхийлөгчөөр ажиллах хугацаандаа олон улсын хамтын нийгэмлэгт хүрч ажилласан, буулт хийхийг дэмжин сурталчилдаг зэргийг нь өндрөөр үнэлэв.
Обамагийн олон улсад нэр хүндтэй болсон нь "түүнд нэмэлт ёс суртахууны үүрэг хариуцлага ногдуулж байна" гэж Далай лам хэллээ. Буддын шашны удирдагч болон Цагаан ордон уулзалтын талаар тодорхой мэдээлэл өгөөгүй байсан ч Мягмар гарагт Далай ламын ярьснаар тус уулзалтаар зэвсэглэл хураах, дайн, Төвөд, Хятадын зөрчилдөөнийг энхийн замаар шийдвэрлэх Далай ламын "Дундад Замын" онол зэрэг сэдвүүд яригдсан байна.
Тэрбээр Хятад улс түүний ард түмэнд хэрхэн хандаж буйг буруушаадаг ч Хятадад энэрэнгүй сэтгэлээр хандсаар байгаагаа илэрхийлэв.
Хятад улс Хималайн бүс нутгийг эзлэн авахаар коммунист хүчний цэргүүдээ илгээснэс хойш есөн жилийн дараа буюу 1959 онд Далай лам Төвөдөөс Энэтхэгт дүрвэж, хилийн чанад дахь хэмээн өөрсдийгөө нэрлэсэн засгийн газрыг тэргүүлж ирсэн юм.
Тэрбээр яриан дундаа хошигнон, Обамагийн богино үсийг “тэр бас лам шиг харагддаг” хэмээсэн байна.
Олон нийтэд хандсан илтгэлийн өмнөх хэвлэлийн бага хурал дээр 30 минут ярих үеэрээ Далай лам 1 дүгээр сарын 12-ны Хаитийн газар хөдлөлтөд олон улсын зүгээс авч хэрэгжүүлсэн арга хэмжээг магтан сайшаав.
Тэрбээр сэтгүүлчдэд хандан, "Дэлхийн өнцөг булан бүрээс үзүүлсэн хариу үйлдэл үнэхээр гайхалтай байсан гэж би бодож байна. Хүн төрөлхтний нэгдмэл байдлыг харахад тааламжтай байна" гэжээ.
Далай лам 1999 оны Өмнөд Флоридад анх удаа айлчилж, Флоридагийн Олон Улсын Их Сургууль (ФОУИС)-д илтгэл тавьж байсан бол 2004 онд Өмнөд Флоридагийн хэд хэдэн газарт яриа хийж байжээ. Тэрбээр энэ оны 5 дугаар сарын 25, 26-нд ФОУИС, Майамигийн Их Сургууль, Майами Дэйд Коллеж зэрэг газруудад илтгэл тавихаар дахин ирэх аж.
Далай лам Мягмар гарагийн өглөө мөн Нова Зүүн Өмнөдийн Их Сургуулийн багш, оюутнуудтай уулзсан бөгөөд Лхагва гарагт Флорида Атлантик Их Сургуульд зочилж, үдээс хойш Брауард коллежийн Дэви дэх кампуст Өмнөд Флоридагийн коллеж, их сургуулиудын ерөнхийлөгчидтэй хаалттай уулзалт хийх юм байна.
Энэхүү мэдээг Ассошиэйтед Пресс агентлагийн материалаар нэмж баяжуулав.
