Энэтхэг, Орисса муж, Чандрагири. 2010 оны 1-р сарын 11 (Нагешвар Патнайк, Экономик Таймс) - Төвөдийн оюун санааны удирдагч Далай лам даваа гарагт маоистуудад хандан, хүчирхийллээс зайлсхийж, бүх асуудлыг хүчирхийллийн бус аргаар шийдвэрлэхийг зөвлөжээ.
Зураг. Төвөдийн оюун санааны удирдагч Далай лам Энэтхэгийн Бубанешвараас баруун урагш 300 орчим километр (186 миль) зайд орших Чандрагири дэх Ригон Түвдэн Миндролин хийдийн ойролцоо гар даллан мэндчилж байна. Даваа гараг, 2010 оны 1-р сарын 11 (Ассошиэйтед Пресс)
"Хүчирхийлэл бол аливаа асуудлыг шийдвэрлэх зөв арга зам биш. Нийгэмд дарлал мөлжлөгийн асуудал байдаг хэдий ч хүчирхийлэл хэзээ ч шийдэл болж чадахгүй." гэж тус мужид дөрвөн өдрийн айлчлал хийхээр ирсэн Нобелийн шагналтан Бижу Патнак нисэх онгоцны буудалд сэтгүүлчдэд ярив.
"Маоистууд хүчирхийллээс татгалзаж, эртний Энэтхэгийн ахимса буюу үл хүчирхийллийн уламжлалд итгэх хэрэгтэй. Бид бүх асуудлыг ахимса, яриа хэлцэл, харилцан хүндлэлээр шийдвэрлэх хэрэгтэй." хэмээн тэрбээр хэллээ.
Оюун санааны удирдагч харин улс орны зарим хэсэгт үүсээд буй хэт ядуурал болон нийгэм, эдийн засгийн ялгаварлан гадуурхлыг маоистуудын хүчирхийлэл нэмэгдэж байгаатай холбон тайлбарлав. Тэрбээр хоцрогдож, орхигдсон бүх нутгууд дахь иргэдийн боловсрол, эрүүл мэндийг дэмжих замаар хөгжих боломжийг нь хангахыг засгийн газраас хүслээ.
Тэрбээр мөн хот, хөдөөгийн бүс нутгуудын эдийн засгийн тэгш бус байдал нэмэгдэж байгааг асуудлыг хөндөж, хөдөөгийн бүс нутгуудын хөгжилд анхаарснаар энэ ялгааг багасгахыг уриаллаа.
"Хөгжил зөвхөн хэдхэн хотоор хязгаарлагдахгүй гэдгийг Энэтхэг улс анхаарах хэрэгтэй. Зарим газар цэцэглэн хөгжөөд, бусад нь хоцрогдож үлдэх ёсгүй." хэмээн тэрбээр тэмдэглэв.
Зураг. Төвөдийн оюун санааны удирдагч Далай лам Энэтхэгийн Бубанешвараас баруун урагш 300 орчим километр (186 миль) зайд орших Чандрагири дэх Төвөдийн төв сургуулийн хүүхдүүдтэй ярилцаж байна. Даваа гараг, 2010 оны 1-р сарын 11 (Ассошиэйтед Пресс)
Зургаан жилийн завсарласны дараа Орисса мужид ес дэх удаагаа айлчилж буй Далай лам эндээс 300 орчим километрийн зайд орших Гажапати дүүргийн Чандрагири дахь Төвөдийн суурьшлын бүс рүү тусгай нисдэг тэргээр шууд нислээ. Чандрагирийн цагдаагийн газар түүнийг хүндэт харуулаар өргөмжилсөн байна.
Нисдэг тэрэгний буудлаас Чандрагири дэх Төвөдийн суурин хүртэлх замын хоёр талаар шашин шүтлэг, үндэс угсаа, итгэл үнэмшлээс үл хамаарсан хүмүүс эгнэн зогсож, түүнийг угтан авлаа.
Маоистуудын түшиц газар гэгддэг Чандрагири дахь түүний айлчлалыг элдэв асуудалгүй явуулахын тулд өндөр түвшний хамгаалалтын арга хэмжээ авсан байна. Болзошгүй аливаа нөхцөл байдлаас сэргийлэхийн тулд дээд зэргийн хамгаалалтын 10 салаа, тусгай ажиллагааны бүлэг, Орисса мужийн зэвсэгт цагдаагийн хүчийг тус бүс нутагт дайчилжээ.
Оюун санааны удирдагч Чандрагирид Өмнөд Азийн хамгийн том буддын хийд болох Жиран хийдийн нээлтээс гадна хэд хэдэн хөтөлбөрт оролцох төлөвлөгөөтэй аж. Тэрбээр Орисса муж дахь айлчлалынхаа төгсгөлд, 1-р сарын 14-нд буддын шашны түүхийн семинарт үг хэлэх хуваарьтай байгаа юм байна.
Орчуулсан Б.Одгэрэл
