Энэтхэг, Mахараштра, Mумбай хот - 2011 оны 2 дугаар сарын 19 (Пратибха Масанд, TNN). “Нийгмийн өрсөлдөөн сэтгэлийн амар тайван байдлыг үгүй хийж байна. Харин технологи, энх тайвны хослол нь хөгжил дэвшлийн гол түлхүүр юм” хэмээн Дээрхийн гэгээн XIV Далай лам Баасан гарагт болсон мэдрэлийн мэс засалчдын бага хурлын үеэр хэлэв.
Евразийн мэдрэлийн мэс засалчдын 16 дахь удаагийн чуулга уулзалтын нээлтийн үеэр үг хэлсэн тэрбээр шинжлэх ухаанд сонирхолтой байдгийн шалтгаан нь өөрийнх нь сониуч зан хэмээн тайлбарлав. “Нүдэнд харагдах бодисын хувьд шинжлэх ухаан, технологи үнэхээр гайхалтай хөгжилд хүрсэн. Харин оюун ухааны шинжлэх ухааныг эртний Энэтхэгийн самади, випассанагийн уламжлалуудаас харж болно. Хэрвээ эдгээр хоёр шинжлэх ухааныг хамтад нь эзэмшиж чадвал илүү сайхан нийгмийг бий болгох боломжтой” хэмээжээ.
Тэрээр өвчтөнүүдэд шинэ, дэвшилтэт эмчилгээ нэвтрүүлж буй эмч нарыг магтан, “Эдгээр эмч, эрдэмтэд өөрсдийн салбартаа үнэхээр гайхамшигтай ажил хийж байна. Гэхдээ хүмүүс тайван, тогтуун сэтгэлээ хадгалахын тулд урьдчилан сэргийлэх арга хэмжээ авах хэрэгтэй. Эмчлэх ажилд мэдрэлийн мэс засалчид байгаа” хэмээн хэлэв.
Гурван өдрийн турш үргэлжлэх уг бага хуралд Ази, Европ тивийн мэдрэлийн мэс засалчид оролцож, технологийн шинэчлэл, туршлагаа солилцоно. “Энэхүү бага хурлын зорилго бол мэдрэлийн мэс заслын хөгжил дэвшлийг үнэлэх, бусдаас суралцах явдал билээ” хэмээн арга хэмжээг зохион байгуулсан Доктор Кеки Тюрэл хэллээ.
Залуучууд шашны үнэт зүйлсээс холдож байгаагийн талаар асуухад Дээрхийн гэгээн XIV Далай лам хариулахдаа хүмүүсийн баримталдаг хоёр төрлийн зам байдаг хэмээжээ. “Нэг нь шашны итгэлд тулгуурладаг бол нөгөө нь өөрийн ухамсар, ёс суртахуунд суурилдаг. Залуучууд зайлшгүй ёс суртахууны үнэт зүйлтэй байх шаардлагатай” хэмээн онцолсон.
Мөн тэрбээр нийгмийн өрсөлдөөн нь амар тайвны хамгийн том саад гэдгийг дурдлаа. “Бүх сөрөг сэтгэл хөдлөлийн эх үүсвэр, ялангуяа өрсөлдөөн нь хүний дотоод амар амгалан байдлыг булааж байна. Аз жаргалын нууц нь бурхан, тэнгэр эсвэл шашинд итгэх эсэхээс үл хамаарч жаргалтай байх түлхүүр нь өөртөө сэтгэл хангалуун байдал, энэрэл хайр юм” хэмээн айлдсан билээ.
Англи хэлнээс орчуулсан T.Ялгуун
