Энэтхэг, Ражастан, Тилони - 2011 оны 2 дугаар сарын 14 (Аниндо Дэй, TNN). Ням гарагт төвөдийн удирдагч Дээрхийн гэгээн XIV Далай лам хөдөөгийн Раджастханд өдөржин айлчиллаа. Тэрээр Ажмерийн ойролцоох Тилони дахь “Barefoot College”-д зочлон, амар тайван, эв нэгдэл, хөгжил цэцэглэлийн талаар санаа бодлоо хүргэж, тосгоны иргэдтэй хамт зургаа авхуулж, уламжлалт амттанг элбэг дэлбэг зооглон, тухлан өнгөрөөсөн байна.
“Би “Barefoot College”-ийн үзэл санаанд гүнээ сэтгэл ханасан бөгөөд урт хугацааны турш энэ газрыг үзэхийг хүсэж ирсэн билээ. Харин одоо Африк, Латин Америк, Иордан болон бусад олон орны ард иргэдийн төлөө хийж буй ажлуудыг нь хараад сэтгэл хөдөлж байна. Та бүхэн өөрчлөлтийг бүтээхийн төлөө ажиллаж байна” хэмээн Дээрхийн гэгээн XIV Далай лам хэлэв.
Тэрээр мөн тус коллежид 20-30 лакх рупи (ойролцоогоор 25,000-37,000 ам.доллар)-гийн хандив амласан байна.
Гэвч түүний гол анхаарсан зүйл бол дэлхий дахинд баян ядуугийн ялгааг бууруулах байлаа. “Зарим хүн илүү бүхнийг эзэмшиж байхад нь анхан шатны хэрэгцээ ч үгүй амьдарч байна. Энэ ялгаа Америк, Энэтхэг тэр бүү хэл коммунист Хятадад ч байна. Харин Австри, Швейцарь болон Европын зарим оронд энэ зөрүү арай бага байдаг.
Энэ ялгааг бууруулахын төлөө хичээх ёстой. Үгүй бол ядуу хүмүүс өөрсдийгөө дорд хэмээн үзэж, мэдэрч, бухимдал, атаархал, хүчирхийлэлд ч хүргэж мэднэ. Үүнийг арилгахын тулд ядуус өөрсдийгөө ч бас чадна гэсэн итгэлтэй болох хэрэгтэй. Харин баян хүмүүс ямар ч хэлбэрээр хамаагүй туслах үүрэгтэй. Дэлхийн дулааралтай энэ нөхцөл байдалд зөвхөн газар тариалангаас хамааралтай байх нь гамшигт хүргэж мэднэ. Иймээс ядуу хүмүүс өөрсдийгөө технологиор зэвсэглэх хэрэгтэй” хэмээн онцлов. Тэрээр Barefoot College-ийг дипломгүй ч технологи, арга чадварыг хүлээн авсан хүмүүсийн сайн жишээ хэмээн тодорхойлов.
Далай лам дахин тэтгэвэрт гарах төлөвлөгөөнийхөө талаар дурдаад, эх орноо орхисноос хойш 52 жилийн турш өөрийн байр сууриа хамгаалж ирснээрээ бахархан, “Үүнийг би Мао Зэдунтай зүйрлэж болохоор зүйл гэж боддог” хэмээжээ. “XXI зуун бол яриа хэлэлцээрийн эрин байх ёстой. Бараг бүх асуудлыг хүчээр бус, харин хэлэлцээгээр шийдэх боломжтой гэсэн санааг түгээх хэрэгтэй. Бид аливаа зүйлийг өргөн хүрээтэй, бүхэлд нь харж сурсан байх ёстой. Жишээ нь, Пакистан өөрийн бодлогыг өргөн хүрээтэйгээр авч үзвэл Энэтхэгтэй харилцаа нь илүү сайжрах байсан” хэмээн айлдав.
Тэрээр Хятад улс олон хүн амтай учраас дэлхийн тавцанд илүү чухал байр суурь эзлэх боломжтой гэж үздэг. “Гэхдээ үүний тулд тэд бодлогоо ил тод байдлаар боловсруулах шаардлагатай. Зөвхөн энэ тохиолдолд л ард түмнийхээ итгэлийг хүлээж чадна” хэмээжээ.
Англи хэлнээс орчуулсан T.Ялгуун
