Зураг. Брюссель рүү нисэх онгоцонд суухын өмнө Чехийн Гадаад хэргийн сайд Дээрхийн гэгээнд гараа сунган тусалж буй нь...
Чех улс, Прага хот. 2008 оны 12 дугаар сарын 2. Phayul.com. Дээрхийн гэгээн XIV Далай лам 12 дугаар сарын 2-ны өглөө Чехийн Гадаад хэргийн сайд Карел Шварценбергтэй тус улсын Гадаад хэргийн яаманд өглөөний цайны үеэр уулзжээ. Дээрхийн гэгээн “Төвөдийн асуудалд үргэлж чин сэтгэлээсээ анхаарч, биднийг ойлгон дэмжиж ирсэн Чехийн ард түмэн, Засгийн газар, Ерөнхийлөгч асан Вацлав Хавел, парламент болон “Форум 2000”-д талархаж байна. Бид түүхийн хүнд хэцүү цаг үеийг туулж байна. Төвөд үндэстэн мөхлийн аюултай нүүр тулж байна. Төвөдийн соёлыг устгаж байна. Хятадын Засгийн газар Төвөдийн соёлыг аюул занал гэж үздэг” хэмээн айлдсан байна.
Чехийн Гадаад хэргийн сайд Карел Шварценберг Дээрхийн гэгээнийг угтан авахдаа “Дээрхийн гэгээн таныг энд хүлээн авч буй нь бидний хувьд нэр төрийн дээд хэрэг юм. Бид ч бас сэтгэл оюунаа бага ч атугай гэгээрүүлэх хэрэгтэй” хэмээн хэлжээ. Хоёр удирдагчийн уулзалт 1 цаг орчим үргэлжилсэн байна. Уулзалтын дараа Дээрхийн гэгээн Чехийн Гадаад хэргийн сайдтай хамт тус улсын Засгийн газрын цэргийн нисэх онгоцоор Брюссель хотыг зорьжээ. Тэрбээр Брюссельд Европын парламентад үг айлдахаар төлөвлөсөн байна.
Женев дэх Төвөдийн төлөөлөгчийн газрын мэдээлэлд үндэслэв.
