Энэтхэг, Химачал Прадеш муж, Дарамсала хот— 2011 оны 5 дугаар сарын 18-нд (phayul.com сайтад Калсанг Ринчен бичжээ) Tөвөдийн шашны тэргүүн Дээрхийн гэгээн XIV Далай лам Энэтхэгийн ерөнхий сайдын орлогч асан Бхаратия Жанта намын ахмад удирдагч Лал Кришна Адвани өөрийн өргөөндөө хүлээн авч уулзлаа.
Зураг. Энэтхэгийн Ерөнхий сайдын орлогч асан Л.К.Адванигийн охин, Химачал Прадеш мужийн Ерөнхий сайд профессор Прем Кумар нар Дарамсалад Дээрхийн гэгээн XIV Далай ламтай уулзав. Энэтхэг, Химачал Прадеш муж, Дарамсала хот. 2011 оны 5-р сарын 18. Гэрэл зургийг: OHHDL
Хоёр тал Дээрхийн гэгээн Далай ламын өргөөнд болсон өдрийн зоогийн үеэр уулзжээ. Адванийг түүний охин болон Химачал Прадеш мужийн Ерөнхий сайд профессор Прем Кумар Дхумал дагалдан хүрэлцэн ирсэн байна.
Уулзалтын дараа сэтгүүлчидтэй ярилцахдаа Адвани хэлэхдээ тэрээр Химачал Прадешийн Крикетийн Холбооны урилгаар өчигдөр болсон “Кингс XI Панжаб” болон “Роял Чалленжерс Бангалор” багуудын Энэтхэгийн Премьер Лиг (Indian Premier League)-ийн тоглолтыг үзэхээр Дарамсала хотод хүрэлцэн ирсэн хэмээв. “Өмнөх уулзалтуудын үеэр би Дээрхийн гэгээн Далай ламд өөрийн нутаг Дарамсалад нь ирж уулзана хэмээн хэлж байсан. Харин крикетийн тоглолтод уригдсан болохоор яагаад тоглолтоо ч үзээд мөн Дээрхийн гэгээн Далай ламтай ч уулзаж болохгүй гэж хэмээн бодсон” гэдгээ ярьжээ.
Дээрхийн гэгээн XIV Далай ламын хамт ямар асуудлаар ярилцсан талаар асуухад Адвани “Би Дээрхийн гэгээн XIV Далай ламаас Tөвөдийн асуудлаарх Хятадын байр суурь өөрчлөгдсөн эсэхийг сонирхон асуусан. Тэр одоогоор өөрчлөлт гараагүй ч өөрчлөгдөнө гэж найдаж байгаа” хэмээн хариулсан байна.
Дээрхийн гэгээн XIV Далай лам Адванитай уулзсаны дараа Зүглагхан дуганы хашаанд “Кингс XI Панжаб” багийн тамирчид, үйл ажиллагааны ажилтнуудтай мөн уулзав. Дээрхийн гэгээн XIV Далай лам АНУ-д хийсэн урт аяллаас саяхан ирсэн тул урилгатай байсан ч өчигдөрхөн болсон тоглолтод очиж чадаагүйдээ уучлал хүсэв. “Өчигдөр очиж чадаагүйн учир нь миний унтах цаг 19:30, харин 5-дугаар сарын 21-ний өдрийн 16:00 цагаас эхлэх өдрийн тоглолтод очно” хэмээн түрүүхэн улс төрийн эрх мэдлээ сонгуулиар сонгогдсон удирдагчид шилжүүлэх болсноо мэдэгдсэн Tөвөдийн шашны удирдагч тэрээр хэлжээ.
Зураг. Дээрхийн гэгээн XIV Далай лам Дарамсала хотод “Кингс XI Панжаб” IPL крикетийн багийн гишүүдтэй буй агшин. Энэтхэг, Химачал Прадеш муж, Дарамсала хот. 2011 оны 5-р сарын 18. Гэрэл зургийг: Дэнзин Чойжор OHHDL
Тэрээр спортын талаархи өөрийн мэдлэг тэг хэдий ч Энэтхэг улсынхны крикетийг хайрлах энэрэл, баяр баясгаланг цугтаа хуваалцахыг хүсэж буйгаа илэрхийлэв. “Сүүлд тоглолт үзэж байхдаа хэн нь хожиж, хэн нь хожигдож байгаа талаар Ерөнхий сайд Дхумалаас асууж байсан” тухайгаа хөхрөн инээж ярив.
Шашин хоорондын эв найрамдлын талаар ярьж байхдаа Дээрхийн гэгээн XIV Далай лам Энэтхэг нь олон шашин эв найрамдалтайгаар оршин тогтнож буй орон бөгөөд хааяа энэ тэнд хэсэг газарт хүчирхийлэл гардаг ч ерөнхийдөө энх тайван оршин ноёлодог хэмээн онцлов. “Миний тархи эртний Наландрын сургуулийн сургаалиар баялаг бол бие минь энэтхэгийн чапати, будаа, далаар тэжээгдэн баялаг” хэмээн тэрээр өөрийгөө “Энэтхэгийн хүү” гэж хэлдэг шалтгаанаа тайлбарлав.
Англи хэлнээс орчуулсан T.Ялгуун
