Аргентин, Буэнос-Айрес. 2006 оны 5 дугаар сарын 3. Дээрхийн гэгээн Далай лам өчигдөр Аргентин улсын нийслэл Буэнос-Айрес хотод хийсэн айлчлалаа олон нийтэд зориулсан чухал 4 арга хэмжээнд оролцсоноор өндөрлүүлэв.
Өчигдөр өглөө Дээрхийн гэгээн Далай лам Залуу ерөнхийлөгчдийн холбоо (ЗЕХ)-ны ээлжит чуулганд оролцож, үг хэллээ. Тус арга хэмжээнд ЗЕХ-ны 500 орчим гишүүн оролцсон бөгөөд Дээрхийн гэгээн удирдагч хүнд ёс зүй чухал байх ёстойг онцгойлон хэлжээ. Тэрбээр “Улс төр, бизнес, нийгмийн салбарын аль ч түвшинд удирдлагын амжилт нь чин сэтгэлийн итгэлцлээс ихээхэн хамаардаг. Жинхэнэ итгэлцэл нь бусдыг хайрлан халамжлах мэдрэмжээ хуваалцах замаар буй болгож болохоос дүрэм журам хэрэгжүүлэх, эрх мэдэл ашиглах замаар бий болгох боломжгүй юм” хэмээгээд бизнесийн салбарын удирдагчдын анхаарлыг дэлхий нийтийн байгаль орчны асуудалд хандуулж, баян, ядуугийн хоорондох эдийн засгийн асар их ялгаа орон нутаг, улс орон, олон улсын түвшинд ямар үр дагавар авчирч буйг онцоллоо. Дээрхийн гэгээн Төвөд орон болон төвөдийн соёлын тухай “Төвөдийн баялаг соёлын өв нь XXI зуунд хүн төрөлхтөнд үйлчлэх асар их боломжтой билээ. Энэхүү баялаг соёлын өв, иргэншлийг хамгаалах нь олон улсын хамтын нийгэмлэгийн үүрэг юм. Төвөдийн соёлын өв дэлхий ертөнцөөс үгүй болбол энэ нь төвөдийн ард түмэнд төдийгүй нийт хүн төрөлхтөнд нөхөж баршгүй их гарз болох болно” хэмээн айлдсан юм.
Дээрхийн гэгээн энэ өдрийн үдээс хойш “Ла Рурал” хурлын төвд аргентины буддын шашинтнуудад зориулан “Оюунаа сургах долоон утга” айлдварын хоёр дахь хэсгийг айлдлаа. Өмнөх өдрийн адил 4000 гаруй хүн оролцжээ.
Далай лам айлдварынхаа дараа бусад шашны уламжлалын төлөөлөл тэргүүнүүдийн хамт энх тайвны төлөөх олон шашны залбиралд оролцов. Уг арга хэмжээнд Аргентины Эпископын чуулганы Ерөнхий нарийн бичгийн дарга Матияс Морео, хиндү шашны төлөөлөгч Свами Парешнанда, еврейн шашны төлөөлөгч Рабби Сергио Бергман, исламын шашны утөлөөлөгч Шейх Ариел Мохсен Али, Умар Аббуд, солонгосын буддын шашны төлөөлөгч Чуэ Кай тэргүүт оролцжээ. Ойролцоогоор 7000 хүн оролцсон тус арга хэмжээнд Дээрхийн гэгээн “Шашин бүр хүн төрөлхтөнд үйлчлэх адилхан боломж, чадавхтай бөгөөд бүх шашны уламжлал хайр, энэрэл, тэвчээр зэрэг ижил үнэт зүйлсийг номлодог билээ. Тиймээс хүн бүр өөрийн шашны уламжлалыг чин сэтгэлээсээ шүтэхийн зэрэгцээ бусад шашны уламжлалыг хүндэтгэж сурах хэрэгтэй” хэмээн зөвлөжээ.
Далай лам 1530-1700 цагийн хооронд Буэнос-Айрес хотын Латин Америкийн урлагийн музейн танхимд Аргентин улсын 300 гаруй сэхээтэн, нөлөөлөгчдөд “Ёс зүй, соёл, нийгмийн тогтвортой байдал” сэдвээр айлдвар айлдсан юм. Энэхүү арга хэмжээнд Аргентины Нобелийн Энх тайвны шагналт Адольфо Перес Эскивель, Буэнос-Айрес хотын захирагч Хорхе Телерман нар оролцжээ. Арга хэмжээний төгсгөлд хотын захирагч Хорхе Телерман Дээрхийн гэгээн Далай ламын дэлхий дахинд хүний суурь үнэт зүйлс, шашин хоорондын эв нэгдлийг бэхжүүлэхийн төлөө тасралтгүй хүчин чармайлт гаргаж буйг өндөр үнэлж, хүндэтгэн Буэнос-Айрес хотын “Хүндэт иргэн” хэмээн өргөмжилж, үнэмлэх, дурсгалын самбарыг өргөн барилаа.
Дээрхийн гэгээн Далай ламын Буэнос-Айрес хотод хийсэн 3 өдрийн айлчлал ийнхүү амжилттай өндөрлөв. Үндэсний болоод орон нутгийн хэвлэл мэдээллийн хэрэгслүүд төдийгүй олон нийт Далай ламын айлчлалд ихээхэн анхаарал хандуулжээ.
Дээрхийн гэгээн Далай лам энэ өдөр Чили улсыг зорин мордох юм.
Мэдээг Нью-Йорк хотын Латин Америкийн харилцааны алба ирүүлэв.
