Герман улс, Франкфурт хот. 2009 оны 8 дугаар сарын 3. Дээрхийн гэгээн Далай ламын 4 өдрийн шашин, оюун санааны арга хэмжээ өндөрлөхөд Франкфурт хотын “Коммерцбанк Арена” цэнгэлдэх хүрээлэнд нийт 50 мянга гаруй хүн хүрэлцэн иржээ. Германы хэвлэл мэдээллийн хэрэгслүүдийн мэдээлснээр, 40 мянга гаруй хүн Дээрхийн гэгээн Далай ламын дээдийн номын айлдвар болон энх тайван, байгаль орчин, эдийн засаг, ёс зүй тэргүүт сэдвээр хийсэн айлдварт оролцох тасалбар худалдан авсан байжээ. Зөвхөн Ням гарагт л гэхэд 15 мянга гаруй хүн Дээрхийн гэгээн Далай ламын “Амьдрах урлаг” сэдэвт олон нийтэд зориулсан айлдварыг сонссон гэж мэдээлжээ. Айлдваруудыг герман, испани, итали, вьетнам хэлээр орчуулж хүргэсэн байна.
Дээрхийн гэгээн Германы Буддын шашинтнуудын холбоо тэргүүт хэд хэдэн байгууллагаас зохион байгуулсан эдийн засгийн хямралын тухай бага хуралд оролцжээ. Тэрбээр эдийн засгийн хямралын үр дагаврыг даван туулахын тулд үр дүнтэй, оновчтой арга хэмжээ авч, дэлхий нийтээрээ хамтран ажиллахыг уриалсан байна. Хилийн чанадад амьдарч буй Төвөдийн удирдагч болоод төвөдийн асуудал нь Германд олон нийтийн ихээхэн анхаарал, дэмжлэгийг ихэд татдаг ажээ.
Дээрхийн гэгээн Франкфурт хотод морилон саатах үеэр Хессен мужийн ерөнхий сайд, Германы улс төрийн нөлөө бүхий зүтгэлтнүүдийн нэг Роланд Кох түүнийг Төвөдөд эрх чөлөө тогтоохын төлөөх хүчин чармайлтад нь германчуудын тусламжид найдаж болно хэмээн мэдэгджээ. Германы Төвөдийн нийгэмлэгийн ерөнхийлөгч Лэкшэйгийн мэдээлснээр, тус улсад 400 гаруй төвөд хүн амьдардаг байна. Түүний тэргүүлдэг уг нийгэмлэг нь Германы өнцөг булан бүрд цөөн тоогоор тархан амьдардаг төвөдүүдийг төлөөлдөг байгууллага юм. Төвөдүүд тус нийгэмлэгийн зохион байгуулалтаар онцгой тэмдэглэлт өдрүүд болон төвөдтэй холбоотой арга хэмжээнд тогтмол цуглардаг хэмээн ярьжээ.
Ням гаргийн орой төвөдүүд болоод Төвөдийг дэмжигчид Франкфурт дахь Төвөдийн буддын шашны хийдийн төвд цугларч, Далай ламыг Германд айлчилж буйг тэмдэглэн, мэлмий гийсэн өдрийн мэндчилгээг өргөн дэвшүүлэхээр даруухан ёслол зохион байгуулжээ. Дээрхийн гэгээн Далай лам өнгөрсөн сард 74 нас сүүдрийг зооглосон билээ.
Зураг. 2009 оны 7 дугаар сарын 30-ны өдөр Франкфуртын “Коммерцбанк Арена” цэнгэлдэх хүрээлэнд Дээрхийн гэгээн Далай ламын айлдварыг сонсож буй сүсэгтэн олон. Зургийг Phayul сайт.
“Бид Дээрхийн гэгээн Далай ламын мэлмий гийсний өдрийг 7 дугаар сарын 6-нд тэмдэглэсэн билээ. Гэхдээ түүнийг манай улсад хүрэлцэн ирснийг тохиолдуулан энэхүү тусгай баярын арга хэмжээг дахин зохион байгуулж байна” хэмээн Лэкшэй Phayul сайтад ярьжээ.
Төвөдийн өөр өөр бүс нутгийн нийгэмлэгийн урлагийн хамтлагууд уламжлалт дуу хуур, өлзий бэлгэдэлт бүжгээ толилуулсан байна. Тэр өдөр төвөдүүд болоод Төвөдийг дэмжигч бүлгүүдийн төлөөлөгчид Дээрхийн гэгээн Далай ламтай тусгай уулзалт хийжээ. Уулзалтын үеэр Дээрхийн гэгээн Далай лам төвөдүүдэд хандан энх тайван, хүч үл хэрэглэх тэмцэлдээ итгэл найдвар, зориг тэвчээрээ алдахгүй байхыг захиж, тус улсад амьдардаг хятад иргэдтэй харилцаа холбоо тогтоох чиглэлээр идэвхтэй, эерэг хүчин чармайлт гаргахыг уриалсан байна. “Дэлхий даяар улам олон хүн төвөдийн үйл хэргийг дэмжих болжээ. Учир гэвээс энэ үйл хэрэг үнэн, учир шалтгаан, хүч үл хэрэглэх зарчимд тулгуурладаг билээ” хэмээн Дээрхийн гэгээн Далай лам төвөдүүд болон Төвөдийг дэмжигчдийн цуглаанд хэлжээ.
Тэрбээр цааш “Хятадын дотоодод болон гадаадад амьдардаг улам олон хятад хүн төвөдийн үйл хэргийг дэмжиж буйгаа илэрхийлэх болсон билээ. Өнгөрсөн жил Төвөдөд өрнөсөн өргөн хүрээний үймээн самуунаас хойш хятадын сэхээтэн, зохиолчид Төвөдийг дэмжсэн 600 гаруй нийтлэл бичжээ. Эдгээр нийтлэлийн заримд нь Төвөд тусгаар тогтнох асуудлыг хүртэл зөвтгөсөн байв. Тиймээс бид хятад хүмүүстэй харилцаа холбоо тогтоохын төлөө илүү их хүчин чармайлт гаргах нь зүйтэй. Бидний зүгээс ч боломж гарсан тохиолдол бүрд хятад сэхээтнүүд болоод бусад хүмүүстэй уулзахад онцгой анхаарч ирсэн юм. Тиймээс бид итгэл найдвар, зориг тэвчээрээ алдаж үл болох билээ. Итгэл найдвараа хэзээ ч бүү алд гэж хэлэхдээ би бид өөрсдийн зүгээс, ялангуяа боловсролын салбарт бодит ахиц дэвшил гаргах ёстойг хэлж байгаа юм” хэмээн Далай лам төвөдүүдэд хандан хэлжээ.
Дээрхийн гэгээн Төвөдийг дэмжигчидтэй уулзах үеэрээ “Та бүхэн Төвөдийг чин үнэнээр, хүч үл хэрэглэх зарчимд тулгуурлан дэмжиж байна. Биднийг саад бэрхшээлтэй тулгарах үед та бүхэн бидний талд бат зогсож ирлээ. Тиймээс бид та бүхэнд чин сэтгэлийн талархал илэрхийлж байна” хэмээсэн юм.
Уулзалтад Германы Төвөдийг дэмжигч хамгийн бүлгэм болох “Tibetan Initiative Deutschland” тэргүүт байгууллагын төлөөлөгчид оролцсон байна.
Дээрхийн гэгээн Германд хийх 5 өдрийн айлчлал Даваа гарагт өндөрлөнө. Үүний дараа тэрбээр Швейцарьт айлчлан, энэ долоо хоногийн сүүлээр Энэтхэг улсад буцах юм.
