Зураг. Дээрхийн гэгээн Белла конвенцын төвийг зорин явахынхаа өмнө Гадаад хэргийн сайд асан Ликкефот тэргүүтэй парламентын зарим гишүүнтэй ярилцан, үдэх ёс хийж буй нь... Зургийг Дина Кнудсен.
Дани улс, Копенхаген хот. 2009 оны 5 дугаар сарын 30. Дээрхийн гэгээн Далай лам Нагаржуна гэгээний “Бодь сэтгэлийн тайлбар”, Камалашила гэгээний “Бясалгалын дунд шат” бүтээлд тулгуурлан, дээдийн номын айлдвараа эхлүүлэхийнхээ өмнө цугласан 3600 гаруй хүнд “Би бээр хэн нэгнийг шашин шүтлэгээ өөрчлөхийг дэмждэггүй. Тиймээс хэнийг ч бурхны шашинд оруулахыг оролддоггүй. Барууныхан уламжлалт христийн шашныг шүтдэг тул өөрсдийн уламжлалаа баримтлах нь зүйтэй. Харин хэн нэгэн хүн өөрийн хүсэл зоригоор бурхны шашныг шүтэж, түүний дадлага номлолоос өөрт хэрэгтэй зүйлийг олж харвал үүнд буруудах зүйлгүй” хэмээн айлджээ.
Төвөдийн шашин, төрийн тэргүүн “Өнгөрсөн цаг үед хүмүүс, тухайлбал Төвөдөд амьдардаг төвөдүүд, гадаад ертөнц болоод бусад шашин шүтлэгтэй хүмүүстэй харилцаа холбоо тогтоолгүй, тусгаарлагдмал амьдрах боломжтой байв. Гэвч дэлхий ертөнц өөрчлөгдөж, улс орнууд болоод хүмүүсийн харилцан хамаарал нэмэгдсэн өнөө үед өөр өөр шашин шүтлэгийг хүндэтгэн дээдлэх нь чухал болжээ. Мөн энд, сонсогчдын дунд хиндү, ислам, христ тэргүүт өөр өөр уламжлалыг дагадаг хүмүүс ч байж болох юм” хэмээсэн юм.
Айлдвар Данийн Белла конвенцын төвд болж, Дани болон Европын бусад орны хүмүүс оролцжээ. Мөн Европт тархан суурьшсан төвөд иргэд, цөөн тооны хятад хүн танхимд ирсэн байв. Номын айлдвар маргааш өндөрлөх бөгөөд Дээрхийн гэгээн үдээс хойш 4500 хүний багтаамжтай танхимд “Дотоод амар амгалангаар дамжуулан энх тайванд хүрэх нь” сэдвээр олон нийтэд зориулсан айлдвар айлдахаар төлөвлөжээ.
Дээрхийн гэгээн өглөө эртлэн хэвлэл мэдээллийн 80 орчим төлөөлөгчтэй уулзан, Төвөдийн асуудлаас эхлээд аз жаргалыг хэрхэн нэмэгдүүлэх тухай хүртэл олон сэдвээр тавьсан асуултад хариулжээ. Хятад, Төвөдийн яриа хэлэлцээрийн явцын талаар сэтгүүлчийн асуусан асуултад “Бүх хүчээ дайчлан ажилласан ч ахиц дэвшил гараагүйг хүлээн зөвшөөрөх хэрэгтэй. Мөн Хятадын Засгийн газар “Төвөдийн ард түмэнд жинхэнэ өөртөө засах эрх олгох тухай санамж бичиг”-ийг хүлээн авахаас татгалзсан. Гэсэн ч хятадын ард түмэнд итгэх итгэл нь хэвээр байгаа билээ” хэмээн Далай лам хариулжээ. Тэрбээр хятадын ард түмэнд бодит мэдээлэл хүргэхийн төлөө бүхий л хүчин чармайлтаа гаргаж буйгаа хэлсэн юм. Мэдээлэл, ойлголт нэмэгдэхийн хэрээр хятадууд төвөдийн ард түмний шударга зорилгыг ойлгон, тэднийг өрөвдөн дэмжиж буйг мөн дурджээ.
Дээрхийн гэгээн Далай лам олон улсын хамтын нийгэмлэгт хандан, Хятадын Засгийн газраас ямар нэгэн хязгаарлалт тавилгүйгээр Төвөдөд очиж, тэндхийн бодит нөхцөл байдлыг бие даан шалгахыг уриалсан байна. Хэрэв Хятадын Засгийн газрын мэдэгдэж буйгаар Төвөдөд амьдарч буй бүх төвөд хүн машид жаргалтай байгаа бол Дээрхийн гэгээн болон дүрвэн амьдарч буй төвөдүүд үүнийг хүлээн зөвшөөрөхөөс өөр аргагүй болно хэмээжээ.
