Энэтхэг, Шинэ Дели. 2007 оны 11 дүгээр сарын 13. Дээрхийн гэгээн Далай лам өнөөдөр Жавахарлал Неругийн Их Сургуульд зохион байгуулсан “Гандийн арга замыг даяаршуулах нь: Сатьяграхын социологи, улс төр ба шинжлэх ухаан” сэдэвт Сатьяграхын 100 жилийн ойд зориулсан олон улсын хурлыг нээж үг хэлэв.
Жавахарлал Неругийн Их Сургуульд 11 дүгээр сарын 13-16-ны хооронд 4 өдөр, харин үлдсэн 3 өдрийг Ганди бээр энэтхэгийн нутаг дэвсгэрт анхны сатьяграхуудыг сургаж байсан Бихитарва тосгонд зохион байгуулахаар төлөвлөсөн тус хурал нийт 7 хоног үргэлжлах аж. Тус хуралд 14 орны төлөөлөгчид оролцож байгаа бөгөөд нээлтийн өдөр олон нэр хүндтэй зочдын хамт хэдэн зуун төвөд, энэтхэг хүн хүрэлцэн иржээ.
Төвөдийн хилийн чанад дахь Засгийн газрын Калон Трипа, Гандийн үзэл санааг тууштай дэмжигч профессор Самдан ринбүүчи мөн тус бага хуралд оролцсон байна.
Хөтөлбөр Дээрхийн гэгээнд дурсгалын бэлэг тэргүүтэн өргөн барьснаар эхэлжээ. Дараа нь Бирмийн сатьяграхын нэгэн оролцогч Нобелийн Энх тайвны шагналт Аун Сан Су Чигийн хөргийг Дээрхийн гэгээн Далай ламд өргөн барьсан байна. Мөн Дээрхийн гэгээн Далай лам хилийн чанадад очсоныхоо дараахан өгсөн анхны ярилцлагыг багтаасан номыг хүлээн авчээ. Үүний дараа “Залуучууд ба Гандийн зам” сэдвээр зохион байгуулсан улсын хэмжээний мэтгэлцээн, эсээ бичлэгийн уралдаанд тэргүүлсэн оролцогчдод шагнал гардуулав.
Дээрхийн гэгээн Далай лам Энэтхэгийн эртний ахимса буюу хүчирхийлэл үл хэрэглэх үзлийг хэрэгжүүлэхийн чухлыг онцлон ярив. Тэрбээр улс төрийн тэмцэлд ахимса үзлийг ашиглаж байсан Махатма Гандийг биширдэгээ хэлжээ. Мөн асуудлыг шийдвэрлэхэд яриа хэлэлцээр машид чухал болохыг онцлоод, “Хүчирхийлэл хүчирхийллийг л буй болгодог. Залуучууд Гандийн философийг сонирхон судалж, түүнд анхаарал хандуулж байгаад би бээр машид баяртай байна” хэмээжээ.
11 дүгээр сарын 14-нд Дээрхийн гэгээн Далай лам Шинэ Делигийн Индрапрастха цэцэрлэгт хүрээлэнд Вишва Шанти суваргыг нээх ёслолд оролцон, суваргыг аравнайлах юм. Уг төслийг Делигийн Хөгжлийн газар, Ниппонзан Мёохожи Фүжий Гүрүжи Шанти суваргын нийгэмлэг санаачлан хэрэгжүүлжээ.
Энэтхэгийн ерөнхийлөгч Пратибха Патил мөн уг ёслолд оролцож, цугларагсдад хандан үг хэлэхээр төлөвлөж байгаа аж.
Үүний дараа Дээрхийн гэгээн Далай лам Япон улсыг зорин мордох юм.
