Словени, Марибор хот, 2010 оны 4 дүгээр сарын 7 - Өнөө өглөө Словенийн засгийн газрын сайд доктор Боштян Жэкш ерөнхий сайдын нэрийн өмнөөс Дээрхийн гэгээн Далай ламтай зочид буудалд нь уулзжээ.
Зураг. Дээрхийн гэгээн Словенийн Үндэсний театрт үг хэлж байна.
Дараа нь Дээрхийн гэгээн Далай лам Марибор дахь Словенийн Үндэсний Театрыг зорьж, "Энэрэн нигүүлсэхүй: Аз жаргалын урлаг" сэдвээр ярилаа. Энэхүү илтгэлийг Европын Шинжлэх Ухаан, Урлагийн Академи болон Мариборын их сургуулиас зохион байгуулсан бөгөөд орон нутгийн телевизийн сувгаар шууд дамжуулжээ. "Энэрэн нигүүлсэл гэдэг нь өрөвдөх мэдрэмж биш юм" гэж Дээрхийн гэгээн Далай лам хэлэв. Цааш нь тэрбээр энэрэн нигүүлслийг дадуулах нь бусдад болон өөрт ашиг тустай гээд, бусдын сайн сайхны талаар илүү их бодох нь чухал бөгөөд энэ нь хувь хүний амьдралд илүү их аз жаргал авчрах болно хэмээн ярьсан байна.
Олон нийтэд хандсан илтгэлийн дараа Дээрхийн гэгээн Далай лам Мариборын цайзад Жүд дацангийн лам нарын бүтээсэн энэрэн нигүүлсэхүйн бурхан Жанрайсигийн элсэн хот мандлыг аравнайллаа. Уг хот мандалыг Мариборт зохион байгуулсан хоёр долоо хоногийн хугацаатай Төвөдийн соёлын хөтөлбөрийн хүрээнд бүтээжээ.
Словенийн лалын шашны нийгэмлэгийн тэргүүн, Муфти доктор Неджад Грабус Дээрхийн гэгээн Далай ламыг Словенийг орхин Швейцарын Цюрих хотыг зорихоос нь өмнө зочид буудалд нь уулзсан байна.
Зураг. Дээрхийн гэгээнийг Цюрихт хүрэлцэн ирэхэд Төвөдийн уламжлалт хэв маягаар угтан авч байна. (Зургийг Мануэль Бауэр)
Дээрхийн гэгээнийг Цюрихт хүрэлцэн ирэхэд нь Хайат Парк зочид буудалд олон тооны төвөдүүд угтан авлаа. Төвөдийн нийгэмлэгийн соёлын бүжгийн хамтлагийн гишүүд Даши Шолпа хэмээх уламжлалт угталтын бүжгийг сонирхуулав.
Маргааш Дээрхийн гэгээн Рикон дахь Төвөдийн хүрээлэнгээр зочилж, Мэрси Швийз (Баярлалаа Швейцар) арга хэмжээнд үг хэлэх юм.
Орчуулсан Б.Одгэрэл
