Тайвань, Жя Шиань. 2009 оны 8 дугаар сарын 31. Хар салхины улмаас хохирол амссан иргэдийн төлөө ном айлдахаар Тайваньд айлчилж буй Дээрхийн гэгээн Далай лам улс төрийн зорилгоор тус аралд ирсэн гэх Хятадын мэдэгдлийг няцаажээ.
Дээрхийн гэгээн CNN телевизийн сурвалжлагч Сара Сиднерт өгсөн ярилцлагадаа аймшигт хар салхи Морокотын гамшигт өртсөн иргэдийг тайвшруулж, сэтгэлийн дэм өгөхөөр ирснээ хэлжээ. Мөн айлчлалыг улс төржүүлэхгүйн тулд Тайванийн ерөнхийлөгч Ма Инжөүтэй уулзахгүй гэдгээ мэдэгджээ.
Зураг. Дээрхийн гэгээн Далай лам Тайванийн өмнөд хэсгийн Гаошюн мужийн хар салхинд нэрвэгдсэн Шяолинь тосгонд зочилж байна.
“Урилга хүлээн авсан даруйдаа энэ айлчлал тодорхой хүндрэл дагуулж магадгүй гэдгийг ойлгосон юм. Гэхдээ хүнд хэцүү үеийг туулж буй хүмүүстэй уулзаж, тэдний дэргэд байх нь миний үүрэг гэж бодсон юм” хэмээжээ.
Дээрхийн гэгээн Далай лам Энэтхэгээс ирснийхээ маргааш нь Тайванийн өмнөд хэсэгт очиж, гамшгаас амьд үлдсэн иргэдтэй уулзан, тэдний төлөө ном хурсан юм. 8 дугаар сарын 8-нд Тайванийг дайран өнгөрсөн Морокот хар салхины улмаас тус арлын өмнөд хэсэгт хүчтэй үер бууж, 500 гаруй хүний аминд хүрчээ.
Тэрбээр Тайваньд газардсаныхаа дараахан CNN телевизэд өгсөн ярилцлагадаа “Буддын шашны хувраг хүний хувьд тэдэнтэй уулзаж, ядаж л уй гашуу, зовлонгоос нь бага болов хуваалцах нь миний зарчим билээ” хэмээн хэлсэн юм.
Хятадын төрийн Синьхуа агентлаг мэдээлэхдээ, Бээжин Дээрхийн гэгээн Далай ламын айлчлалыг “эрс эсэргүүцэж” байгааг дурджээ. Мөн уг айлчлал нь “эх газрын Хятад болон Тайванийн харилцаанд сөргөөр нөлөөлөх нь гарцаагүй” гэж мэдэгдсэн байна. Синьхуа агентлаг Хятадын Засгийн газрын Тайванийн асуудал эрхэлсэн газрын нэрээ нууцалсан төлөөлөгчийн хэлснийг эш татан, “Бид нөхцөл байдлыг анхааралтай ажиглах болно” гэж мэдээлжээ. Бээжин Тайванийг салан тусгаарласан муж хэмээн үздэг бөгөөд Дээрхийн гэгээн Далай ламыг Төвөдийг Хятадаас тусгаар тогтнуулахыг дэмждэг хэмээн буруутгадаг. Тайвань болон эх газрын Хятадын харилцааны талаар асуухад Дээрхийн гэгээн Далай лам Тайванийн удирдагчдад Хятадтай ойр дотно харилцаатай байх хэрэгтэй гэж зөвлөж байснаа хэлжээ.
“Эцсийн эцэст энэ бол мэдээж танай ард түмний өөрсдөө шийдэх асуудал. Гэхдээ эдийн засгийн болон батлан хамгаалахын шалтгаанаар эх газрын Хятадтай ойр дотно харилцаатай байх хэрэгтэй гэж боддог юм. Сүүлийн үед эх газрын Хятадтай харилцаа ойртож байгаа бололтой. Энэ бол машид сайн хэрэг. Энэ нь миний бодлоор Тайваньд байгаа хүмүүсийн айдас түгшүүрийг багасгаж байгаа нь илт байна” хэмээн айлдсан юм.
Дээрхийн гэгээн Далай лам Энэтхэг улс руу буцахаасаа өмнө энэрэн нигүүлсэхүй хийгээд шашин хоорондын эв найрамдлын талаар олон нийтэд зориулсан айлдвар айлдана хэмээн түүний хэвлэлийн төлөөлөгч Данзандаглха мэдэгджээ.
Морокот хар салхи эх газрын Хятад руу чиглэхээс өмнө Тайванийн нутагт 3,3м-ээс давсан хур тунадас буужээ. Үүний улмаас үер, хөрсний гулгалт үүсэж, хамгийн багадаа 543 хүн амиа алдсан бол 117 хүн сураггүй хэвээр байгааг Тайванийн Онцгой байдлын төв шуурхай ажиллагааны төв мэдээлсэн байна.
Аврагчид арлын алслагдсан өмнөд хэсгийн уулсаар сураггүй болсон олон хүнийг эрэн хайх ажиллагаа явуулахад хүндрэлтэй тулгарчээ. Мөн гамшгийн үед Засгийн газар хариу арга хэмжээг маш удаж авсанд ерөнхийлөгч Ма өнгөрсөн уучлал хүсжээ.
