Япон улс, Токио хот. 2007 оны 11 дүгээр сарын 22. Төвөдийн оюун санааны удирдагч Дээрхийн гэгээн Далай лам өнөөдөр япон залуусыг илүү энх тайванч XXI зууныг цогцлоохоор бэлтгэхийг уриаллаа.
Тэрбээр XX зууныг “асар их сүйрэл, хүн төрөлхтний зовлон зүдгүүр, байгаль орчны ноцтой бөгөөд урьд өмнө байгаагүй их хохирол учирсан үе” хэмээн тодорхойлоод, япон залууст хандан XXI зууныг “яриа хэлэлцээ, эвлэрлийн зуун” болгохыг уриалсан байна.
“Энэхүү шинэ зуун өнгөрсөн үеийн алдааны сорвийг одоо ч тээсээр байна. Гэсэнч ч шинэ үеийнхэн дэлхий ертөнцийг илүү энх тайванч болгож чадна гэдэгт итгэж байна” хэмээжээ.
Тэрбээр терроризм болоод дэлхийн дулаарал хурдацтай нэмэгдэж буйг өнөөгийн дэлхий ертөнцийн өмнө тулгарч буй томоохон асуудлууд хэмээн онцолж, тэдгээрийг засаж залруулахын тулд хүн төрөлхтний оюун ухааныг ашиглахыг уриаллаа.
“Бидэнд тулгарч буй олон асуудал үндсэндээ хүний гараар бий болсон зүйл учраас хүн төрөлхтөн тэдгээрийг засаж залруулах эсвэл ядаж л асуудлын цар хүрээг багасгах чадвартай” хэмээн Далай лам айлдсан юм.
Тэрбээр Токио хотын “Сэтагаяа Гакүэн” сургуулийн 1400 орчим сурагчид “XXI зууны залуу үед илгээх захиас” сэдвээр үг хэлэхдээ “Хүн төрөлхтөн өнгөрсөн үеийн алдаагаа шинжилж, ойлгох хангалттай оюун ухаантай. Би бээр ийм залуу сурагчидтай уулзаж буйдаа машид баяртай байна. Та бүхэн энэ шинэ зууныг бодитоор цогцлоож буй шинэ үеийнхэн учраас би маш их баяртай байна. Харин бид бол хуучин зууны хүмүүс. Шинэ үеийг төлөвшүүлэн бүтээх хариуцлага та нарт ногдож байна” хэмээлээ.
Хүний асуудлыг шийдвэрлэхэд хүчирхийлэл ашиглахыг буруушаасан Дээрхийн гэгээн Далай лам, “Та нарын зорилгыг зөвтгөж болох ч хүчирхийллийн арга нь урьдчилан тааварлашгүй. Энэ нь илүү их зовлон авчирна. Тийм арга бол буруу. Тиймээс бид бодитой, үр дүнтэй аргуудыг ашиглах ёстой. Асуудал, ялгаатай байдал, өөр өөр үзэл бодол үргэлж байсаар ирсэн. Гэхдээ бид бодитой арга замуудыг ашиглаж, эвлэрэл, яриа хэлэлцээний үзэл санааг баримтлах хэрэгтэй” хэмээн онцоллоо.
Дээрхийн гэгээн дараа нь Токио хотын Бункё дүүрэгт байрлах Гококужи буддын шашны сүмд морилон саатаж, Далай ламыг Шингон урсгалын тус сүмийн тэргүүн лам Эйши Окамото хүндэтгэлтэйгээр угтан, хүлээн авжээ.
Тэрбээр сүмийн лам хуврагуудтай хэсэг хугацаанд ярилцсаны дараа Гококужигийн “Ничи Дай” ахлах сургуульд зочлон, тэнд цугласан 1300 орчим сурагчид “Утга учиртай амьдрал хийгээд боловсрол” сэдвээр үг хэлэв.
Дээрхийн гэгээн Далай лам ахлах сургуулийн сурагчдад хандан, Япон улс нь орчин үеийн технологи, орчин үеийн мэдлэг, мөн буддын шашныг багтаасан баялаг оюун санааны соёлын маш сайн хослолтой орон болохыг онцолсон байна.
“Тиймээс та бүхэнд орчин үеийн боловсрол эзэмшихийн зэрэгцээ уугуул Шинто шашин болон буддын шашны оюун санааны үнэт зүйлсийг өвлөн авах хосгүй боломж бий. Энэ нь та бүхнийг илүү аз жаргалтай, амар амгалан амьдрах баталгаа болно. Технологи болоод хүний хязгааргүй оюун ухаан гайхалтай. Гэсэн хэдий ч уур хилэн, үзэн ядалт, айдас зэрэг сөрөг сэтгэл хөдлөлөөр удирдуулбал энэ хоёр илүү их сүйрэл авчирна. Үүний үр дүнд XX зуунд асар их зовлон авчиржээ. Удаан үргэлжлэх дэлхийн энх тайван нь дотоод амар амгалангаас эхтэй байх ёстой. Энэ нь дотоод зэвсэг хураалтаас эхтэй байх ёстой. Энэрэн нигүүлсэхүйтэй байвал та бүхний үйлдэл үргэлж эерэг байна. Энэ нь бидний дотоод хүч чадал, илүү утга учиртай амьдралын төлөөх өөртөө итгэх итгэлийг нэмэгдүүлнэ. Миний зуун бүрмөсөн өнгөрсөн. Би хэзээ ч эргэж ирэхгүй. Одоо XXI зуун дөнгөж эхэлж байна. Тиймээс та бүхэн энэ зуунд амьдралаа өнгөрүүлнэ. Тиймээс та бүхэн үнэндээ илүү сайн дэлхий ертөнцийг бүтээхэд бэлтгэж байна” хэмээн Дээрхийн гэгээн Далай лам айлдсан юм.
Хурдацтай өрнөж буй орчин үеийн амьдралын стрессээс болж зовж буй япончуудын хувьд Дээрхийн гэгээн Далай лам оюун санааны тайтгарлын эх үүсвэр болж байна.
Төвөдийн удирдагч Япон улсад хийх 9 өдрийн айлчлалаа дуусгасныхаа дараа Энэтхэг рүү буцах юм.
