Япон улс, Хирошима хот. 2010 оны 11 дүгээр сарын 11. Нийхама хотын нэгэн өдөр эхэллээ. Дээрхийн гэгээн Японд хийж буй айлчлалынхаа 5 дахь өдөр Хирошима хотод морилон саатлаа. Олон арлын үзэсгэлэнт тогтоц бүхий буланг тольдсон зочид буудалд морилох үед Дээрхийн гэгээний айлчлалыг сурвалжлахаар олон тооны телевиз, хэвлэлийн сэтгүүлчид цуглан хүлээж байв. Тэд Хирошимад зохион байгуулагдаж буй Нобелийн Энх тайвны шагналтнуудын дээд хэмжээний XI уулзалт болох “Хирошимагийн өв: Цөмийн зэвсэггүй дэлхий” сэдэвт арга хэмжээг сурвалжлахаар ирсэн аж.
Дээрхийн гэгээн “Цөмийн зэвсэн хоцрогдсон. Бид энх тайваныг бүрмөсөн цогцлоож чадахгүй ч дайныг багасгаж чадна. “Их 8”, “Их 20” зэрэг олон улсын байгууллагууд нь ихэвчлэн мөнгөний асуудлыг голчлон авч үзэж байна. Мөнгө нь бие махбодын тав тухыг бий болгож болох ч оюун санааны амар амгаланг авчирч чадахгүй юм. Мөнгөтэй болсон хүн тодорхой хэмжээнд сэтгэл ханамж мэдэрч болох ч энэ нь үнэндээ хуурмаг зүйл билээ. Илүү чинээлэг болохын хэрээр атаархал нэмэгдэн, сэтгэлийн дарамт, бусдад итгэдэггүй зан, айдас ч мөн нэмэгддэг. Энэ бүх асуудал материаллаг баялгаас үүдэлтэй. Мэдээж бидэнд материаллаг зүйлс хэрэгтэй. Учир нь бид энэ бие махбод дотор амьдарч байгаа билээ. Мөн орчин үеийн технологи ч тодорхой хэмжээгээр хэрэгтэй бөгөөд ач тустай. Гэвч мөнгө гацхан аз жаргалтай амьдралыг авчирна гэж бодож байгаа бол та эндүүрсэн байна. Дотоод үнэт зүйл машид чухал билээ” хэмээн айлдлаа.
Дээрхийн гэгээнийг зочид буудалдаа өдрийн зоог барьсны дараа тэнгэр цэлмэж, наран гийхэд орчин үеийн томоохон байгууламж болох Хирошима хотын Соёлын солилцооны танхимд мориллоо. Уг танхимд Дээрхийн гэгээний “Сансар хорвоо хийгээд шалтгаан, үр” номын айлдварыг сонсохоор танхим дүүрэн сүсэгтэн бараалхан, сэтгэл догдлол дүүрэн хүлээж байлаа.
Дээрхийн гэгээн тайзнаа морилоход нэг талд нь алтлаг шар орхимж, улаан номын хувцсыг асаасан төвөд лам нар, нөгөө талд нь япон лам нар эгнэн бараалхаж, хамтдаа дээдийн номын уншлага үйлдэн, төвөд хүжийн анхилуун үнэр танхим даяар сэнгэнэсэн сүрдмээр уур амьсгал бүрхэв.
Танхимд цугласан олон “Зүрхэн судар”-ын уншлага залбирлыг үйлдсэний дараа Дээрхийн гэгээн урт дараалан зогсох хүмүүст адис хайрлан, “Гадаад ертөнцөөс бид аз жаргалыг олж чадахгүй ба материаллаг тав тух нь үргэлжид хангалттай мэт санагдахгүй. Харин энэрэл нигүүлсэх сэтгэл нь бидний Бурхан багшид үл итгэхээс үл хамааран оршдог ба Бурхан багш хүмүүсийг ганц өөрт нь залбираад байх бус өөрийн зовлон бэрхшээлийг хэрхэн үгүй болгох арга замыг зааж, бидэнд хичээх хэрэгтэйг анхааруулсан билээ” хэмээгээд, үргэлжлүүлэн учир шалтгааны ухаан, бидний үргэлжид анхаарал хандуулдаг “би” хаана байгаа тухай айлдав.
Цугласан олноос нэгэн хүн хувьслын тухай асуухад, Дээхийн гэгээн бурхны шашинтнууд бид ухамсрын үргэлжлэл байдагт итгэдэг. Манай галактик үүсэхээс өмнө бидний ухамсар өөр галактикт оршиж байсныг, бид энэ гараг үүсэн бий болоход түр хугацаанд таашаан амьдрахаар ирсэн эгэл жуулчид болохоо, харин суурь оюун ухаан цэвэрлэгдэхгүй л бол энэ амьдрал үргэлжлэн эргэлдэж, харин цэвэрлэгдсэний дараа энэ төрөлтийн эргэлт зогсохыг тайлбарлан айлдав.
Өөр нэгэн хүн суудлаас босон, Дээрхийн гэгээнд хүү нь оюуны хомсдолтой төрсөн ба энэхүү зовлонг хэзээ, хэрхэн гэр бүлдээ эцэслэж болох тухай тайлбарлан асуулаа.
Дээрхийн гэгээн бурхны шашны дээдэс багш нарын сургаал айлдвараас зарим зарчмыг тодруулан тайлбарлаад, “Дэлхий дээр хэдэн хүүхэд таны хүүтэй адил зовлонг эдэлж буй мөн тэднийг харах хүн байхгүй тухай сайтар бодож үзвээс сэтгэлийн ачаа хөнгөрч болох юм. Дэлхий дээр бараг 7 тэрбум хүн бүгд “хүн төрөлхтний нэгэн нийгэмлэг" гэдгээ ойлгох хэрэгтэй. Хэрэв бид харилцан хамаарлын үүднээс бодвол эдгээр эрүүл бус нөхцөл байдлыг багасгаж эхэлж чадна. Бид бүхэн хүчгүй биш. Дан ганц залбирлаар эдгээр асуудлыг шийдвэрлэх боломжгүй. Харин зөвхөн сайн үйл ажиллагаагаар л шийдэгддэг тул алсын хараатайгаар хичээнгүйлэн ажиллах хэрэгтэй. Хүнд хэцүүг туулсан хүн илүү гүн ухаарал олж авдаг шиг та бүхэн сүүлийн хэдэн арван жил цөмийн зэвсгийг хориглох арга хэмжээнд асар их хүчин чармайлт гаргасаар ирсэн нь үнэхээрийн бахархууштай зүйл билээ. Хирошима хотын ард түмэн цөмийн зэвсгийн хор хөнөөлийг өөрсдийн биеэр туулж ирсэн тул цөмийн зэвсгийг хориглох хөдөлгөөнд тэргүүлж чадах билээ” хэмээн айлдлаа.
Дээрхийн гэгээн оройн нарны алтан туяанд нуурын эрэг дээрх зочид буудалдаа морилоход түүнийг камер, микрофон лахин бүчин хүрээлэв. Тэрбээр энэ удаагийн айлчлал нь Япон улсад хөл тавьж буй 4 дэх удаагийн айлчлал болохыг айлдаад, Энх тайвны музейд анх айлчлахдаа зочдын санал хүсэлтийн дэвтэрт галыг галаар унтрааж болдоггүйн адил үзэн ядалтыг үзэн ядалтаар зогсоож чадахгүй бидэнд илүү эерэг санаа хэрэгтэй хэмээн бичиж байснаа сэтгүүлчдэд дурсан айлдав.
Дээрхийн гэгээн дэлхийн Нобелийн шагналтнууд, энх тайвныг дэмжигсдээр дүүрэн танхимд морилсон юм.
