Шинэ Дели, 12 дугаар сарын 6 - Энэтхэгийн парламент дахь Төвөдийг дэмждэг бүлгийн гишүүд (APIPFT) Дээрхийн гэгээн Далай ламын олон улсын энх тайвныг дэмжих үйлсэд оруулсан хувь нэмрийг хүндэтгэн, түүнд зориулан ёслолын үйл ажиллагааг парламентын байранд зохион байгууллаа. 1700 цагт эхэлсэн ёслолд Энэтхэгийн парламентын 130 гаруй гишүүн болон нөлөө бүхий хүмүүс оролцов. Шри.Башиста Н Сингх (парламентын гишүүн) мөн зохион байгуулагч, APIPFT танхим дүүрэн үзэгч, хүндэт зочид Дээрхийн гэгээн Далай ламыг угтан авснаар ёслол эхэлжээ.
Энэтхэгийн парламент дахь Төвөдийг дэмждэг бүлгийн тухай товч танилцуулга хийж, APIPFT-Энэтхэгийн парламент дахь Төвөдийг дэмжих бүлэг нь төвөдүүдийн бүхий л асуудлыг хэлэлцэн, дэмжин тусалж ирснээ өгүүллээ. Дээрхийн гэгээнтэн Энэтхэгийн парламентыг хуралдаж байх үеэр энэхүү ёслолыг зохион байгуулсанд баяртай байгаагаа илэрхийлээд, парламентын гишүүдэд хандан үг хэлэх өдөр ирнэ гэдэгт итгэж байна хэмээв.
APIPFT, зохион байгуулагчаас Дээрхийн гэгээнтэнд цэцгийн баглааны хамт өргөн барьсан хүндэтгэлтийн захидлыг Шри.Мохан Сингх (парламентын гишүүн) уншиж өгөв. Дээрхийн гэгээнтэн талархлаа илэрхийлэн, парламентын ийм олон гишүүнтэй нэг дор уулзсандаа баяртай байна хэмээжээ. Тэрбээр хошигнон өгүүлэхдээ өөрийгөө энэ улсад 46 жил амьдарч байгаа "Энэтхэгт хамгийн удаан хугацаанд байгаа зочин" хэмээн нэрлэсэн. Төвөдийн дүрвэгсдийн нийгэмлэгийг халуун дотноор хүлээн авсан Энэтхэгийн парламентад талархал илэрхийлэн, “Энэтхэгт хэмжээлшгүй их эрх чөлөөг эдэлсэн” хэмээжээ. Дээрхийн гэгээнтэн Төвөдөд үргэлжилж буй соёлын геноцид, Төвөдийн өвөрмөц, унаган байгаль орчин, түүний Энэтхэгийн орчим бүс нутагт үзүүлж буй нөлөөнд Хятад улс хайхрамжгүй хандаж байгаад санаа зовж байгаагаа дахин илэрхийлэв. Мөн Төвөдийг цэрэггүй, энх тайван бүс болгоход найдаж буйгаа хуваалцсан юм.
Парламентын гишүүн, доктор Л.М.Сингхви уг ёслолын арга хэмжээг удирдсан бөгөөд тэрээр хэлэхдээ Дээрхийн гэгээнтний ахимса буюу хүч үл хэрэглэхийн төлөөх тасралтгүй эрэлд нь гүн талархал илэрхийллээ. Түүнийг "энх тайван, хүч үл хэрэглэгч үзлийн элч төлөөлөгч" хэмээн нэрлээд, Хятадын Засгийн Газартай өөрөө удирдах эрхийн зохицуулалт хийх тухай Дээрхийн гэгээнтний санаачилсан саналыг ариун шударга үзлээр хүндэтгэн үзнэ хэмээн найдаж буйгаа илэрхийлжээ. Улмаар парламентын гишүүн, зохион байгуулагч, (APIPFT) Шри М.А.Кхарабела Свэйн ёслолын ажиллагааг хааж, үг хэлэхдээ Дээрхийн гэгээнтэн Далай ламд Энэтхэгийн парламентын гишүүдэд хандан үг хэлсэнд талархал илэрхийлж, энэхүү арга хэмжээнд оролцсон парламентын гишүүд, хүндэт зочдод чин сэтгэлээсээ талархал илэрхийлэв. Профессор Самдхон Ринбучи (Калон Трипа), Лоди Гьяри Ринбүчи (Дээрхийн гэгээнтэн далай ламын тусгай төлөөлөгч), ноён Пема Жунгней (ATPD-гийн дарга), ноён Тенпа Цэринг (Дээрхийн гэгээнтний Шинэ Дели хот дахь төлөөлөгч) нар ч мөн ёслолд оролцсон юм.
Дээрхийн гэгээнтэн Энэтхэгийн парламентын гишүүдэд зориулан хоёр дахь удаагаа үг хэлж байгаа юм. Хамгийн анх 1995 онд тун санамсаргүй байдлаар парламентын байранд зохион байгуулагдсан арга хэмжээнд үг хэлж байжээ. APIPFT нь Энэтхэгийн парламент дахь Төвөдийг дэмжигч бүлгийн гишүүдийн чуулган юм. Энэ чуулганыг 1970 онд ноён М.С.Чагла үндэслэсэн аж. Тэр цагаас хойш энэхүү байгууллага нь Энэтхэгийн парламентын туршлагатай, олонд танигдсан, нэр нөлөө бүхий гишүүдийн удирдлага, чиглүүлэлт дор Төвөдийн асуудлыг дэмжин ажиллаж иржээ. Гишүүдэд ноён Мадху Лимайе, Жорж Фернандес, Раби Рэй, Аталь Бихари Важпай, Т.Н.Чатурведи, Мохан Сингх, Сатьяврат Чатурведи нар багтдаг. Одоогоор уг чуулганыг парламентын гишүүн Мохан Сингх, Башиста Нараян Сингх, Кхарабела Свайн, П.Т. Гямцо нар удирдаж байна.
Орчуулсан Н.Долгар
