Зураг. Лам хуврагууд Дээрхийн гэгээн Далай ламын өргөөний гадна буддын шашны ариун нандин эд зүйлсийг барин, оюун санааны удирдагчаа ёслол төгөлдөр угтан авч буй нь...
Энэтхэг улс, Дарамсала хот. 2007 оны 11 дүгээр сарын 5. Бямба гарагт Дарамсалагийн орон нутгийн нисэх буудлаас өргөө хүртэл нь олон түмэн баяр хөөрөөр дүүрэн эгнэн зогсож, ёслолын арга хэмжээг зохион байгуулан, Дээрхийн гэгээн Далай ламыг угтан авлаа.
Дээрхийн гэгээн Далай лам АНУ-д хийсэн дээд түвшний айлчлалынхаа дараахан буюу 10 дугаар сарын 17-нд тус улсын иргэний дээд шагнал болох Конгрессын Алтан медалийг хүртсэн бөгөөд үүнийхээ дараа Энэтхэгийн хойд хэсэгт орших, цөллөг дэх үндсэн суурь нутаг болох Дарамсалагийн Маклеод Ганжид хүрэлцэн ирсэн юм. Мөн айлчлалынхаа үеэр Канадад зочилж, ерөнхий сайд Стивен Харпер Оттава дахь Парламентын ордны албан өрөөндөө түүнтэй албан ёсоор уулзан, дипломат ёсоор халуун дотно угтжээ.
Төвөдүүд болон төвөдийн үйл хэргийг дэмжигчид АНУ Дээрхийн гэгээн Далай ламд төрийн дээд түвшинд хүндэтгэл үзүүлсэн нь тэдний урам зоригийг машид сэргээн, Төвөдийн үйл хэрэгт түлхэц болсон гэж үзэж байна. Өмнө нь Төвөдийн удирдагчтай саяхан албан ёсны түвшинд харилцсан олон улс орны удирдагч Хятад улсын дургүйцлийг хүргэхээс зайлсхийж, Дээрхийн гэгээн Далай ламтай албан ёсны орчинд уулзахаас цэрвэдэг байв.
Ерөнхий сайд Харпер, АНУ-ын ерөнхийлөгч Жорж Буш нар Хятадын засгийн газрын байнга гаргадаг ширүүн, зүй бус эсэргүүцлийг үл тоомсорлон, сүүлийн саруудад хилийн чанадад буй Төвөдийн удирдагчийг албан ёсны орчинд олон нийтийн өмнө хүлээн авч уулзсан барууны орнуудын удирдагчдын эгнээнд нэгдлээ. Төвөдүүдийн зүгээс маргаангүй удирдагч, дэлхий дахинд эрх чөлөөнийх нь итгэл найдварын бэлгэ тэмдэг хэмээн хүндлэгддэг Дээрхийн гэгээн Далай ламыг энэ оны эхээр Австралийн ерөнхий сайд мөн Герман, Австрийн канцлерууд албан ёсны түвшинд олон нийтийн өмнө хүлээн авч уулзсан юм.
Дээрхийн гэгээн Далай ламыг Гаггал нисэх онгоцны буудалд хүрэлцэн ирэхэд Жалавгармаа ринбүүчи, Калон Трипа Самдан ринбүүчи, Хилийн чанад дахь Төвөдийн Парламентын дарга ноён Гармаачойпил, дэд дарга хатагтай Жирдулам, Хилийн чанад дахь Төвөдийн Парламентын гишүүд болон Дарамсала дахь Төвөдийн бүх байгууллагын тэргүүд угтан авлаа.
Дээрхийн гэгээн Далай ламыг дагалдан явсан автомашины цуваа онгоцны буудлаас Маклеод Ганжийн толгод дээрх өргөө рүү нь чиглэн явах үед хүндэтгэлийн хадаг барьж, хүж асаасан лам хувраг, гэлэнмаа нар, Төвөдийн үндэсний далбааг намируулан дуу дуулж буй сурагчид мөн нутгийн Энэтхэг иргэд болон зочлон ирсэн жуулчид зэрэг олон мянган хүн замын дагуу гар даллан, баяр хөөртэйгөөр угтан авч байлаа. Төвөдийн удирдагчийг хилийн чанад дахь хотдоо эргэн ирж буйг угтан авахын тулд замын дагуух гол цэгүүдэд уламжлалт маягаар чимэглэсэн хэд хэдэн угтах хаалга босгожээ. Маклеод хотоор дайран өнгөрөх гол замыг төвөдийн буддын шашны өлзийт тэмдгүүдээр чимэглэсэн байсан бөгөөд олон мянган лам, гэлэнмаа тэргүүт хадаг, цэцэг, буддын шашны ариун бумба, бусад эд өлгийн зүйлсийг барин, Дээрхийн гэгээн Далай ламыг ёслол хүндэтгэлтэйгээр угтан авахаар зогсож байв.
Бүс нутгийнхаа уламжлалт хувцсыг өмссөн төвөдүүд Дээрхийн гэгээн Далай ламыг угтан авч, түүнийг нэг харах, үүгээрээ адис хүртэхийн тулд олон цагийн турш тэсэн ядан хүлээлээ. Дээрхийн гэгээн Далай лам хүрэлцэн ирэх үед хүжсийн үнэр ханхалж, хүмүүс ёслолын хадаг барин угтаж, замын хажуугаар Төвөдийн үндэсний далбаанууд өндөрт намирч байлаа.
Маклеод хотын орох хэсэгт энэтхэгийн хөгжмийн хамтлаг хөгжмөө эгшиглүүлэн, энэтхэг иргэд ч мөн нэгдэн, өөрсдийн хэлээр “Гуру Жи” хэмээн хүндэтгэн нэрлэдэг Төвөдийн удирдагчийг баяр хөөртэйгөөр угтан авлаа.
Ердийн үедээ жижигхэн хэдий ч олон үндэстэн, соёлын өнгө аяс шингэсэн Маклеод хот цоо өөр өнгө төрхтэй болсон байв. Хот бүхэлдээ уламжлалт төвөдийн баярыг бүх өнгө аястай нь тэмдэглэж буй мэт харагдаж байлаа. Төвөдийн айл өрх, дэлгүүрүүд өөрсдийн хамгийн их урам зориг өгдөг удирдагчийнхаа авчирсан бахархал, ялалтын бэлгэдэл болгон Төвөдийн үндэсний далбааг мандуулсан байв.
Зураг. Орос, Монгол, Тайвань улсаас зочлог ирсэн сүсэгтэн олон Дээрхийн гэгээн Далай ламыг хүрэлцэн ирэхийг хүлээж буй нь...
Төвөд настнууд өөрсдийн заншлын дагуу удирдагчийнхаа төлөө чин сэтгэлийн ерөөл, залбирлыг уйгагүй уншиж байлаа. Төвөдийн удирдагчийг өргөө рүү нь түргэн хүргэх үед төвөдийн уран бүтээлчдийн дуулсан дуурь мэт өндөр өнгөөр эгшиглэх дуу болон буддын шашны хөгжмийн сүрлэг, нижигнэсэн дуу чимээ агаарт нэгдэн сонсогдож байв.
Энэ бүх үйл явдлын төгсгөлд төвөдүүд 10 дугаар сарын 17-ны өдрийг хилийн чанад дахь эрх чөлөөний төлөөх тэмцлийнхээ бас нэгэн түүхэн өдөр болгон үүрд санах нь тодорхой байлаа. Дээрхийн гэгээн Далай ламыг угтан авсан энэхүү гайхамшигт ёслол хүндэтгэл нь үүний тод гэрч болон үлдэх болно.
