Швейцар, Цюрих хот, 2010 оны 4 дүгээр сарын 12 - Өчигдөр үдээс хойш Цюрих хотын хамгийн том танхим болох Халленстадионд 10,000 гаруй хүн цугларч, Дээрхийн гэгээн Далай ламын "Бүх нийтийн үүрэг хариуцлага ба эдийн засаг" сэдэвт олон нийтэд зориулсан айлдварыг сонслоо. Хөтөлбөр Төвөд хэлний сургуулиудын хүүхдүүд Дээрхийн гэгээн болон үзэгчдийн өмнө төвөд дуу дуулснаар эхэлсэн байна.
Зураг. Дээрхийн гэгээн олон нийтэд зориулсан айлдварынхаа үеэр үзэгчдэд мэндчилж байна. (Зургийг Мануэль Бауэр)
Олон нийтэд зориулсан айлдварын дараа Дээрхийн гэгээн үзэгчдийн хэд хэдэн асуултад хариулав. Төвөдийн өнөөгийн нөхцөл байдлын талаарх асуултад Дээрхийн гэгээн "Бид нэг тал нь хожиж, нөгөө тал нь хожигдохыг эрэлхийлээгүй. Бид яриа хэлцлээр дамжуулан (Хятад, Төвөд хоёрт) харилцан ашигтай байхыг эрмэлзэж байна" хэмээв.
Хятадын нэг тэрбум ард түмэн үнэнийг мэдэж, өөрсдөө дүгнэлт хийх эрхтэй тул Хятад улс ил тод байх ёстой хэмээн Дээрхийн гэгээн хэлсэн байна.
Айлдварын дараа Дээрхийн гэгээн Далай лам, хилийн чанад дахь Төвөдийн парламентын дарга Бямбацэрэн, Калон Трипа Самдон ринбүүчи нар Швейцар, Лихтенштайн дахь төвөдийн нийгэмлэгт хандан үг хэлэв. Мөн энэ үеэр Европ даяарх төвөдийн нийгэмлэгүүдийн ерөнхийлөгч, дэд ерөнхийлөгч нарыг танилцуулсан байна. Нийтдээ 4,000 гаруй төвөд хүмүүс хүрэлцэн ирсэн байлаа.
Зураг. Дээрхийн гэгээн төвөдийн нийгэмлэгийнхэнтэй мэндчилж байна. (Зургийг Мануэль Бауэр)
Нээлтийн үгэндээ Дээрхийн гэгээн Далай лам, энэ бол Швейцарт болж буй төвөдүүдийн хамгийн том цугларалт байх хэмээгээд, төвөдүүдийг Швейцарт үндэсний амьдралын хэв маягаа хадгалж байгаад нь баяр хүргэж, төвөдийн шашин, соёл, хэл, мөн чанарыг хадгалангаа залуу үеээ сайн асран халамжилж байгаа ахмад үеийнхэнд талархал илэрхийлэв. Мөн төрийн үйлчилгээг мэргэжлийн үүрэг даалгавартайгаа хослуулах нь чухал гэдгийг онцоллоо.
Бидний цөллөгт байгаа шалтгаан өөрчлөгдөөгүй бөгөөд бид үүнийг мартаж болохгүй гэж Дээрхийн гэгээн сануулав. "Төвөд дэх элэг нэгтнүүдэд маань тулгарч буй нөхцөл байдал маш ноцтой, аюултай байгаа. Тэд хилийн чанадад буй бидэнд маш их найдлага тавьж байгаа. Бид үүнийг хэзээ ч мартаж болохгүй" гэж Дээрхийн гэгээн хэлэв.
Бид иргэний дайн, гамшгийн улмаас дүрвэгсэд болоогүй, харин урилгагүй шинэ зочин Төвөдөд ирсэн учраас дүрвэгсэд болсон юм гэж Дээрхийн гэгээн хэллээ.
"Үхэн үхтлээ бид төвөдүүд хэвээрээ."
Орчуулсан Б.Одгэрэл
