Энэтхэг, Химачал Прадеш муж, Дарамсала, Тэгчин Чойлин. Дээрхийн гэгээн Далай лам өнөөдөр Наргес Мохаммадид захидал илгээн, хүний эрх, эрх чөлөө, тэгш байдлын төлөө зоригтой тэмцэж ирснийг нь үнэлэн, энэ жилийн Нобелийн энх тайвны шагналыг хүртсэнд баяр хүргэжээ.
Тэрбээр захидалдаа, “Өнөөдөр ардчилал, ил тод байдал, хүний эрхийг дээдлэх, тэгш эрхийг эрхэмлэх тэргүүт нь бүх нийтийн үнэт зүйлс болохыг улам бүр хүлээн зөвшөөрч байна. Эдгээр нь бид бүгдэд ашиг тусаа өгөх нь гарцаагүй билээ. Би бээр өмнө нь Нобелийн шагнал хүртсэн олон хүнтэй уулзаж, санал бодлоо солилцож байлаа. Тэдний дунд таны нэгэн цагт хамтран ажиллаж байсан Ширин Эбади ч байв. Эмэгтэйчүүдийн эсрэг ялгаварлан гадуурхалтыг даван туулж, нийгмийг энх тайвны замаар сайжруулахын төлөө тэдний гаргаж буй хүчин чармайлтыг машид өндрөөр үнэлдэг билээ. Энэхүү олгож буй Нобелийн Энх тайвны шагнал нь биднийг төрсөн цагаас эхлэн хүн бүрийн амьдралд эмэгтэйчүүдийн гүйцэтгэдэг амин чухал үүргийг мөн хүлээн зөвшөөрсөн хэрэг хэмээн бодном.
Дэлхий дахинд өөрчлөлтийг хүсэх хүсэл улам бүр нэмэгдэж байна. Энэ нь зөрчил мөргөлдөөнийг яриа хэлэлцээ, хүчирхийлэл үл хэрэглэх замаар энх тайвнаар шийдвэрлэдэг өөрчлөлт байх учиртай. Ийм өөрчлөлтийн үндэс нь нинжин сэтгэл, энэрэн нигүүлсэхүй болоод хүний хариуцлага юм. Хүн төрөлхтөн нэгэн бүхэл гэдгийг гүнзгий ойлгоход суурилсан боловсролоор дамжуулан энэ зорилгод хүрч чадна гэдэгт би бээр машид итгэдэг. Бид машид нягт харилцан хамааралтай учир энэ бол бид бүгдийн сайн сайхан байхтай холбоотой асуудал билээ” хэмээсэн байна.
Дээрхийн гэгээн захидлаа залбирал, сайн сайхан ерөөлийг дэвшүүлэн төгсгөжээ.
