Амаравати (www.phayul.com) – Дээрхийн гэгээнтэн Далай лам 2006 оны Дүйнхорын ванг өчигдөр эхлүүлжээ. Дүйнхорын ванг айлдах нөхцөл бололцоог бүрдүүлж өгсөн Андра Прадэш мужийн засаг захиргаанд талархалаа илэрхийлэн, 70 настай Төвөдийн удирдагч Далай лам Амараватид Дүйнхорын ван тавих нь их чухал ач холбогдолтой хэмээсний учир нь Бурхан багшийн айлдсан хамгийн анхны Дүйнхорын ван их авшиг энэхүү газар болсон гэдэг ажээ.
“Би Амараватид Дүйнхорын номын авшгийг айлдаж байгаагаа их том завшаан гэж бодож байна. Цаашдаа олон Дүйнхорын авшиг болно гэхдээ энэ газар (Амаравати) онцгой чухал ач холбогдолтой байгаа нь Бурхан багш анхны Дүйнхорын номын авшгийг энд айлдсантай холбоотой юм”. Тэрээр Андра Прадэш мужийн удирдагчид Дүйнхорын ван болон мужийн Буддын шашны хөгжилд ихээхэн анхаарал хандуулж байгааг онцолж, тэдэнд талархал илэрхийлжээ. Төвөдийн удирдагч хэлэхдээ Уттар Прадэш болон Бихар мужууд Буддын мөргөл хийх Энэтхэгийн алдартай газруудын нэг бөгөөд Андра Прадэш муж тэдэнтэй нэгдэж байгааг онцолж хэллээ. Андра Прадэш мужийг дэлхий даяар оршин суугаа Буддистуудын хувьд чухал газар болгохын төлөө хүчин чармайж буйгаа тус мужийн удирдагчид илэрхийллээ. VOT радио мэдээлж байгаагаар дэлхий даяар байгаа 100 мянга гаруй сүсэгтэн олон энэхүү өмнөд Энэтхэгийн алслагдсан, Амараватид байх голын эрэг дэх хотод очихоор төлөвлөсөн байна гэжээ. Мөн 400 сэтгүүлч энэ томоохон Буддист шашны цуглааныг сурвалжилхаар Дүйнхорын ван болж буй газар цуглаад байна гэжээ.
Орчуулсан Н.Долгар
