Эх дэлхийн өдөр тохиож буй энэ өдөр, хүн бүр аз жаргалтай амьдрахыг л хүсдэг гэдгийг санацгаая. Зөвхөн хүмүүс гэлтгүй амьтад, шувууд, шавж хүртэл жаргалыг хүсдэг нь дамжиггүй. Бид бүгд өөр хоорондоо шүтэн барилдаж оршдог болохыг анхаарч үзье. Гайхамшигт оюун ухаан бүхий хүн болохынхоо хувьд бидэнд гайхалтай сайн үйлсийг хийх боломж үргэлж байдаг ч өнөөдрийн дэлхийн нөхцөл байдал ямар байгааг харвал илүү сайн сайхныг бүтээх ёстой болжээ. Үүний тулд цогц боловсрол буюу бусдын сайн сайхны төлөөх энэрэнгүй сэтгэлийг төлөвшүүлэх агуулгыг багтаасан зүрх сэтгэлийн боловсрол нэн хэрэгтэй байна.
Бид өөр хоорондоо маш нягт харилцан шүтэн барилдлагатай амьдаж буй билээ. Өмнө тулгарч буй шинэ сорилт болох уур амьсгалын өөрчлөлт бидэнд нөлөөлж байгаагийн зэрэгцээ дэлхийн эдийн засгийн үйл ажиллагаан дахь бидний оролцоо зэргээс үзэхэд хүн төрөлхтөн бүгд энэ бүхнийг анхаарах хэрэгтэй гэдэг нь тодорхой юм. Дэлхий нийтийн ашиг сонирхолыг бид нэн тэргүүнд тавих учиртай.
Шатамхай ашигт малтмалын хэрэглээг бууруулж, оронд нь салхи, нарны эрчим хүч буюу сэргээгдэх эрчим хүчийг хэрэглэх яаралтай арга хэмжээг авах шаардлагатай. Ой мод олноор устаж байгаад анхаарч хүрээлэн буй орчноо илүү сайн хамгаалах хэрэгтэй юм. Илүү олон мод тарьж түүнийгээ арчилдаг байх нь зүйтэй. Төвөдөөс эхлээд Дарамсалад хүртэл мөнх цасны хэмжээ буурч байгааг би нүдээрээ харж байна. Үнэхээр ч хэд хэдэн эрдэмтэн надад Төвөд шиг газрууд хүртэл хуурай цөл болох эрсдэл бий гэж хэлж байсан билээ. Тийм ч учраас би Төвөдийн эмзэг байгалийг хамгаалахын төлөө дуу хоолойгоо өргөсөөр байх болно.
Бидний амьдрал сайн сайхан зүйл болно гэсэн хүсэл, найдвар дээр суурилдаг. Найдвар нь ирээдүйтэй холбоотой. Хэдий ирээдүйн талаарх ямар ч зүйл баталгаагүй ч итгэл найдвар дүүрэн байх нь гутранги байхаас хавь илүүтэй билээ. Дэлхийн дулаарал эрчимжиж байгаа хэдий ч үүнд чиглэсэн шийдэл олж, хуваалцахын төлөө хамтран ажиллаж байгаа залуус олон бий. Тэд бол бидний найдвар юм.
Өнөө үед уур амьсгалын өөрчлөлтийн улмаас ноцтой асуудлуудтай тулгарч байгаа тул энэ өөрчлөлтийн төлөө цагийн хуваарь, төлөвлөгөө гаргах замаар бие биедээ туслах, ажиллах шаардлагатай болж байна. Нэг л дэлхий дээр амьдарч буй хүн төрөлхтний хувьд бид аз жаргалтай амьдрахын тулд хүчин чармайлт гаргах ёстой билээ. Уур амьсгалын өөрчлөлтийн аюул нь улс үндэстний хилээр хязгаарлагдахгүйгээр бид бүгдэд нөлөөлж байна. Цорын ганц гэр болсон байгаль, дэлхийгээ хамгаалахын төлөө бид хичээн зүтгэх учиртай юм.
Далай лам
Англи хэлнээс орчуулсан Б.Баярмаа
