Тэгчин Чойлин, Дарамсала, Химачал Прадеш, Энэтхэг – Дээрхийн гэгээнтэн Далай лам Латви улсын Ерөнхийлөгчөөр сонгогдсон Эдгарс Ринкевичст баяр хүргэж, захидал илгээжээ.
Тэрбээр захидалдаа “Танай сайхан оронд 1991 оноос хойш хэд хэдэн удаа зочлох боломж тохиосон юм. Хүн төрөлхтний нэгдмэл чанарыг ойлгуулах, үнэт зүйлсийг эрхэмлэх, шашин хоорондын эв зохицлыг сурталчлах миний өчүүхэн хүчин чармайлтыг танай ард түмэн хөгшин, залуугүй дэмжиж, гүнээ анхаарал хандуулж буйг эдгээр айлчлалуудынхаа үеэр анзаарч, сэтгэл нэн хөдөлсөн билээ.
“Латви болон хөрш улсууд болох Литва, Эстонийн түүхийг харвал эдгээр орны иргэд хүчирхийллийг үл дэмжин, эрх чөлөө, ардчиллын үнэ цэнийг дэлхий нийтэд үлгэрлэн харуулж байна” гэж дурджээ.
Дээрхийн гэгээнтэн “Өнөөдөр дэлхий ертөнц адармаатай, хүнд хэцүү цаг үеийг туулж байна. Энэ үед таны төрийн албанд урт удаан ажиллан, хуримтлуулсан туршлага шинэ үүргээ нэр төртэй гүйцэтгэхэд тань ихээхэн тус нэмэр болно гэдэгт итгэж байна. Латвийн ард иргэдийн хүсэл мөрөөдөл, итгэл найдварын биелүүлэх үйлсэд тань өндөр амжилт хүсэн ерөөе” хэмээн захидлаа төгсгөжээ.
Орчуулсан Р.Манлай
