Бодгаяа, Бихар, Энэтхэг - Дээрхийн гэгээнтэн Далай лам Салугара дахь Сэд-гьюд хийдэд ном айлдсаны дараа өчигдөр Багдограгаас Гаяа руу нисэж ирэв. Түүнийг Бодгаяад хүрэлцэн ирэхэд Төвөдийн гол хийд болох Гандэн Пэлжээлинд албан ёсны товчхон угтал хүндэтгэл үзүүлэв.
Өглөө нь Дээрхийн гэгээнтэн Гандан Пэлжээлин хийдийн төв танхимд зочлон Бурхан багшийн ариун шүтээн дүрд мөргөв. Энэхүү сүмийг 1938 онд Ладакын лам Наваан Самдан байгуулсан бөгөөд Төвөдөд буцаж очсоныхоо дараа тус улсын Засгийн газарт өргөн барьжээ. 1951 онд Дардо ринбүүчиг хийдийн хамба ламаар томилж, 1952 онд түүний удирлагаар лам нарын хороолол баригдсан юм. Энэ үед Дээрхийн гэгээнтэн тус хийдэд Гандан Пэлжээлин хэмээх нэрийг хайрлажээ. 1965 онд Лин ринбүүчиг Гандандива буюу хийдийн хамба ламаар томилсон байна. Өнөө өглөө Дээрхийн гэгээнтэн сэнтийдээ залрах Лин ринбүүчи багшийн хөргийн өмнө хүндэтгэлтэйгээр мөргөв.
Дараа нь Дээрхийн гэгээнтэн гольфийн тэргэнд сууж, Ашокийн эзэнт гүрний үеийн дурсгалын баганын ойролцоох өмнөд хаалгаар Махабоди сүмийн цогцолборыг зорилоо. Тусгайлан байрлуулсан налуу тавцангийн тусламжтайгаар дотогш саадгүй нэвтэрч, сүсэгтнүүдийн гороолдог тойрог замаар хүндэтгэлтэйгээр алхав. Ийн алхаж байхдаа сүмийн чулуун хашлагаар шагайсан олон түмэн рүү инээмсэглэн, даллан мэндчиллээ. Тэрбээр Бурхан багшийн төгс гэгээрэлд хүрэх үедээ сууж асан газрыг тэмдэглэсэн очирт суурь болон Бодь модны дэргэд хүрч ирснийхээ дараа хашлага даван, Гаржүдийн ёсны их ерөөл хурах ёслолд оролцож байсан сүсэгтнүүдийг чиглэх нь тэр.
Сүмийн гол хаалган дээр Бодгаяагийн сүмийн Удирдлагын хорооны гишүүд Далай ламыг угтан авав. Дээрхийн гэгээнтэн сүм доторх Бурхан багшийн сэрэг дүрд хүндэтгэл үзүүлж, залбирлын сэнтийд залрав. Намжил хийдийн лам нар түүнтэй хамт “Гурван үест”, “Зүрхэн судар”, “Гурван итгэл - Наландагийн 17 бандидагийн магтаал”, “Бурхан багшийн магтаал”, “Самантабадрагийн долоон үет залбирал”, “Үнэн үгс” зэрэг тарни, ном уншлаа.
Тус сүмээс гарч явахдаа Дээрхийн гэгээнтэн бээр Бурхан багшийн сэрэг дүрд дахин нэг удаа мөргөлөө. Хийдийн шатны доор цугласан хэвлэл мэдээллийнхэнд хандан тэрбээр “Энэ ариун дагшин газар ирж, Бурхан багшийн сэрэг дүрд мөргөн хүндэтгэл үзүүлсэндээ баяртай байна. Өнөө цагт, ялангуяа цаг уурын өөрчлөлттэй холбоотойгоор дэлхий дахинд олон бэрхшээл тулгарч байна. Эдгээр сорилтыг даван туулах ивгээл хүсэж Бурхан багшид залбирлаа. Энэ ариун газрын нөлөөгөөр залбирал маань илүү үр дүнтэй болно гэж найдаж байна” хэмээв.
Дараа нь Дээрхийн гэгээнтэн зам дагуух сүсэгтнүүд инээмсэглэн даллан мэндчилсээр Гандан Пэлжээлин хийд рүү буцлаа.
Англи хэлнээс орчуулсан Г.Оюунгэрэл
