Австрали, Мельбурн хот 2011 оны 6 дугаар сарын 10 (Цэрэн Кинзом Дхондүгийн мэдээ) – Дээрхийн гэгээн XIV Далай лам өнөө өглөө Мельбурны Брейбрук дүүрэгт байрлах Вьетнамын буддын шашны Куанг Мин сүмийг нээж өглөө.
Зураг. Вьетнамын буддын шашинтнууд Австралийн Мельбурн хот дахь Куанг Мин сүмд Дээрхийн гэгээн ийг угтан авч буй нь. Австрали, Мельбурн хот. 2011 оны 6 дугаар сарын 10. Гэрэл зургийг: Кунчок Гялцэн/DLIAL
1,500 гаруй вьетнамын буддын шашинтай хүмүүс Дээрхийн гэгээн XIV Далай ламыг ирэхэд залбирч, уухайлан угтан авчээ. Тэдний олонх нь Дээрхийн гэгээн XIV Далай лам өөрсдийнх нь дунд ирсэнд баярлан догдолж, нулимс дуслуулсан байна.
Дээрхийн гэгээн XIV Далай ламын залбирсны дараа вьетнам лам хуврагууд цугтаа уншлага өргөв. Дээрхийн гэгээн материаллаг баялаг бус дотоод амар амгаланг хөгжүүлэхийн чухлыг онцлон тэмдэглэв. Тэрээр төвөд, вьетнамын буддын уламжлалыг харьцуулан олон мянган сүсэгтнүүдэд “21-р зууны буддын шашинтнуудын хувьд бид Бурханы шашныг бүрэн мэдэх ёстой. Зүгээр л ном уншсанаар буддын шашинтан болно гэж хэлэх нь хангалтгүй” хэмээн зөвлөсөн байна. Энэ нь шашнаа гүнзгий судалснаар л бий болохыг тэрээр тэмдэглэсэн юм.
Дээрхийн гэгээн XIV Далай лам 15 жилийн өмнө хуучин хийдэд зочилж байсан бөгөөд одоо энэ шинэ том барилга нь зөвхөн залбирал үйлдэх танхим биш, харин анги танхим болон ашиглагдаасай хэмээн хүссэн байна.
Зураг. Залуу охин Австралийн Мельбурн хотноо болсон залуучуудын уулзалтын үеэр Дээрхийн гэгээн XIV Далай ламд асуулт асууж буй нь. Австрали, Мельбурн хот. 2011 оны 6 дугаар сарын 10. Гэрэл зургийг: Кунчок Гялцэн/DLIAL
Дээрхийн гэгээн XIV Далай лам дараа нь олон үндэстэн цугласан цагаачдын хорооллоороо алдартай Футскрей дүүрэгт очиж, тухайн бүсийн эрсдэлт залууст зориулсан цуглаанд хандан үг хэлэв. Орон гэргүйдэл, ядуурлын асуудлыг шийдвэрлэхээр ажилладаг “20th Man Foundation”-ийг удирддаг залуучуудын нийгмийн ажилтан Лес Твентиман энэхүү арга хэмжээг зохион байгуулжээ. Цугласан хүмүүсийн дийлэнх нь орон нутгийн сургуулийн хүүхдүүд байсан бөгөөд тэд Дээрхийн гэгээн XIV Далай ламын яриаг сонсохоор ирсэн байв. 6–18 насны хүүхдүүд түүнд амьдралын тухай олон асуулт асуусан байна. Дээрхийн гэгээн XIV Далай ламын сангаас уг буяны байгууллагыг дэмжин хандив өргөжээ.
Өдрийн хоолны дараа Дээрхийн гэгээн XIV Далай лам Бирм, Хятад, Вьетнам, Эритрейгээс ирсэн дүрвэгсдийн бүлэгтэй ярилцлага хийв. Эдгээр хүмүүс эх орондоо бүх бэрхшээлийг туулж, Австралид амжилттай амьдрал цогцлоож чадсан байлаа. Дүрвэгсдийн асуудал тухайн үед Австралийн улс төрийн гол маргааны нэг байсан юм. Дээрхийн гэгээн XIV Далай лам өөрийн дүрвэгсдийн амьдралын замналаа хуваалцаж, асуудлын шийдлийг олохын тулд эх сурвалжийг нь олж харах хэрэгтэй гэж хэлэв. Заримдаа байгалийн гамшиг дүрвэгсдийн хямрал үүсгэдэг ч олон тохиолдолд энэ нь удирдагчдын ёс суртахууны хомсдолоос үүдэлтэй байдаг гэдгийг тэрээр онцолсон юм. Үүний дараа тэрээр Хятадын Төвөдийг эзэлснээс болж өөрийн амьдрал хэрхэн дүрвэгсдийн хувь тавиланд шилжсэн тухайгаа ярьсан байна.
Зураг. Австралийн Мельбурн хотноо болсон арга хэмжээний үеэр Дээрхийн гэгээн XIV Далай лам, түүний хуучны найз бөгөөд Төвөдийг дэмжигч Ногоон намын удирдагч сенатор Боб Браун нартай уулзав. Австрали, Мельбурн хот. 2011 оны 6 дугаар сарын 10. Гэрэл зургийг: Расти Стевард/DLIAL
Өдрийн сүүлийн арга хэмжээ нь Холбооны Ногоон намын парламентын гишүүн Адам Бандтын зочид хүлээн авалт байлаа. Энэ үеэр мөн Төвөдийг удаан хугацаанд дэмжиж ирсэн Ногоон намын удирдагч сенатор Боб Браунтай уулзав. Дээрхийн гэгээн XIV Далай лам хотуудыг тогтвортой ирээдүй рүү чиглүүлэх тухай сэдвээр үг хэлж, экологийн асуудалд өөрийн гүн гүнзгий дур сонирхлоо илэрхийлэв. “Сайн хот гэж ямар байх вэ?” гэсэн асуултад хариулахдаа тэрээр илүү олон ногоон байгууламж, зам дээрх машины тоо багассан байхыг хүсдэг гэжээ.
“Чин сэтгэлийн хүчин чармайлт гаргаж, орчин үеийн технологийг зөв ашигласнаар бид эх дэлхийгээ аварч чадна” хэмээн Дээрхийн гэгээн XIV Далай лам үгээ өндөрлөв.
Англи хэлнээс орчуулсан T.Ялгуун
